DC解碼
DC革命 F1.8光圈大晒
2011年03月09日 非洲國家有茉莉花革命，香港又有洋紫荊革命，近排連 DC都搞革命！
事關 DC喺 M4/3機種大熱之下，傳統嘅 DC類別，不論係高階嘅單反、中階嘅 Prosumer，抑或最入門嘅 DC仔，若然再唔搵啲新突破，就好難爭番個市場返嚟。所以近排單反愈嚟愈強化拍片功能， DC仔就趁住 3D熱潮影立體相，而 Prosumer就興玩大光圈，家就由新作 Olympus XZ-1帶頭，高中低階 3路 DC一齊革命。
互動片段
Spec.
像素： 1,000萬
變焦： 4倍（ 28-112mm）
光圈： F1.8-2.5
感光度： ISO 100-6400
影片： 720p
屏幕： 3" OLED
記憶： SDXC
體積： 110.6x64.8x42.3mm
重量： 275g
顏色：黑/白
售價：$3,790
查詢： Olympus（ 2376 2150）
放大圖片
機身提供最大路嘅黑、白兩色揀，簡單得嚟都夠潮。
放大圖片
內置 pop-up閃燈，隔籬仲有 hotshoe位，插外置閃燈亦得。
放大圖片
改用 OLED芒，比普通 DC芒光猛，喺太陽底下睇相都清楚。
放大圖片
奴 COMMENT︰那個不限廣角的大光圈和低光模式很貼心呢！很想試試 F1.8的威力！買買買！
Prosumer強攻大光圈 Olympus XZ-1
以前只有貴價單反鏡頭先會有大光圈玩，但近年呢項勁規格已有下放趨勢。而且相機機身冇因鏡頭大咗而變大，反而整得更加 slim，有 F1.8光圈嘅 XZ-1，體形只比一般 DC仔大少少，當 snap機用都冇問題。
光圈愈大（即 F後數字愈細），鏡頭入光嘅速度就愈快，用較高速快門影相時，張相都能 keep住明亮，最大好處係能喺昏暗環境中影到夠光嘅相。 XZ-1最難得係用埋 Olympus單反級數嘅 ZUIKO鏡頭，有 4倍變焦之餘，即使 zoom到最盡，最大光圈都有 F2.5，仍比普通 DC大得多，影遠嘢同樣夠光。
放大圖片
鏡頭外圍個環可作快速設定，例如我用 A mode影相，轉環就係校光圈大細，用 P mode就校 ISO。
放大圖片
易影散景相
大光圈另一優點，係較容易營造到淺景深，影嘢前清後矇。家好多人鍾意 DC有內置背景模糊功能，但筆者覺得用 XZ-1嘅大光圈影出嚟，效果比內置功能自然得多，會成日影人嘅話，用 XZ-1就啱晒。
放大圖片
試暗拍
間酒吧嘅現場環境幾暗，酒樽下面只有微弱嘅藍光射出嚟，但我用 F2.0去影，成張相睇落好光猛，唔知仲以為現場好光。
放大圖片
試散景
Model大頭好 sharp，後佢少少嗰幅畫已開始矇，後面嘅大廈更加矇晒。不過我發現唔 zoom嘅話，散景效果唔突出，反而 zoom咗少少之後，用 F2.0或 F2.5光圈影，背景會更加矇。
大光圈 DC對決
鬥光圈， XZ-1比 LX5同 S95兩部 hit機更大，就連上代大光圈王 GRD III都唔夠佢大，喺呢方面的確稱霸。
放大圖片
Ricoh GRD III
1,000萬像素．定焦． F1.9光圈．$5,000
F1.9光圈僅僅細過 XZ-1，而且定焦鏡頭冇得 zoom。
放大圖片
Panasonic LX5
1,010萬像素． 3.8倍變焦． F2.0-F3.3光圈．$4,390
Zoom到 3.8倍後，光圈會收細至 F3.3。
放大圖片
Canon S95
1,000萬像素． 3.8倍變焦． F2.0-F4.9光圈．$3,480
體形最細，不過冇 hotshoe插閃燈。
DC仔靠 3D上位 Sony TX100V
放大圖片
裸眼 3D咁貴，玩住眼鏡 3D先。
自從上年爆發 3D熱潮後， 3D已成為唔同 gadget嘅發展方向，玩樂味最重嘅 DC仔，當然係 3個相機級別中最適合靠 3D上位。不過裸眼 3D芒因成本高而暫未普及，而 3DS雖然都影到 3D相，但始終係「玩具」質素，所以想影高質素立體相，現時始終都係眼鏡 3D最實際。呢方面 Sony就好着數，因為有自家嘅 BRAVIA 3D TV，用家買完佢部 3D電視，再買佢啲 3D DC意欲自然大好多，而最新嘅款式就係呢部 TX100V，認實喇！
Spec.
像素： 1,620萬
變焦： 4倍（ 25-100mm）
光圈： F3.5-4.6
感光度： ISO 125-3200
影片： 1,080p
屏幕： 3.5" OLED
記憶： SDXC、 MS PRO-HG Duo
體積： 97x58.5x17.8mm
重量： 275g
顏色：黑/銀/紅/香檳金
售價：$3,090
查詢： Sony（ 2345 2966）
放大圖片
Zoom掣縮到得番一粒的咁細，女仔先容易㩒到。
放大圖片
機背乜掣都冇，全靠篤芒操作，好彩啲 icon幾大粒易篤。
放大圖片
內置 GPS都係新 DC仔賣點之一，可記低拍攝位置，去旅行好啱使。
單鏡影 3D相
TX100V總共有 3種 3D玩法，包括影普通 3D相、 3D全景相，同埋喺佢個 2D芒度模擬立體效果嘅 Sweep Multi Angle模式。玩完真機見到佢其實只得 1個鏡頭，所以次次影 3D相都要影兩次，好在佢係全自動操作，而且唔使左右郁部機，過程又好似連拍咁快，影嗰陣先唔覺影咗兩次。至於另外兩種玩法，就要靠橫或直掃 DC達成。
放大圖片
電視 3D相
按一次快門， TX100V就識自己連拍兩張相，之後約等 1至 2秒就會合成完畢。喺機背芒只會睇到 2D相，要用 HDMI線駁 3D TV先睇到立體效果，不過家陣拍攝出嚟大家只會見到鬼影。
放大圖片
2D扮 3D
好似影全景相咁向 4方掃部機，但合成後張相維持喺正常比例，睇相時快手反覆左右傾斜部機，就會有 3D感覺。但要好似相中影三眼仔立體咁凸出嘅物件，立體感先至強。
放大圖片
3D全景相
喺機背芒已睇到合成後嘅全景相，幾有氣勢，駁口亦唔算明顯。駁 3D電視睇，仲見到畫面有兩個層次，個人企嘅位置係凸出過後面排窗。
DC鋪老闆坤哥：「多樣嘢玩係好事！」
放大圖片
「 DC仔， Sony本身都係最多人揀嘅牌子嚟 o架喇！雖然我諗影 3D相未必好實用，但反正係咪都揀 Sony，多樣嘢畀人玩吓總係好事，我亦信遲吓會有更多廠嘅 DC仔會影到 3D相。」
裸眼 Bloggie 3D 4月推出
TX100V影到 3D相，但拍唔到 3D片。如果你決定全身投入 3D世界，不妨等等，因為早排美國 Sony發布嘅 DC、 DV混合體 Bloggie 3D，已定於 4月喺香港推出！
Bloggie 3D內置兩個鏡頭，影 3D相唔使影兩次，拍 3D片更係 1,080p。佢仲有埋裸眼 3D芒，可即時喺機上 2.4吋芒睇番立體效果，不過售價暫時待定，未知貴過 TX100V幾多。
放大圖片
Bloggie 3D兩個鏡頭都有 500萬像素，內置 4GB或 8GB記憶體，冇得插咭，售價待定。
放大圖片
單反強化拍片 Canon EOS 600D
家愈嚟愈多潮人用單反拍片，所以入門單反除咗影相功能追近專業單反外，近年亦加強拍片功能。 600D嘅上代 550D，喺市面熱賣咗幾個月，唔只龍友追捧，就連小龍女都棄 M4/3而買佢。今次 600D唔只繼續拍到 1,080p全高清片，仲增設 10倍數碼變焦、手動曝光、錄音大細聲調校等新功能，等大家拍得專業啲。
之不過，我覺得最好玩係佢個 Video Snapshot，事前揀定每段拍 2、 4或 8秒，夠鐘就自動停，睇片時所有片段會一氣呵成咁播，睇落好似電影咁分晒鏡。用埋隨機送嘅軟件，仲可以好簡單咁調換片段次序、加音樂同過場特效，唔使剪片剪到傻，幾啱剪啲鏡頭零碎嘅 MV。
放大圖片
放大圖片
拍完所有片段後，走入 Video Snapshot個相簿度播片，就會連續咁播，中間唔會停。只要有大量風馬牛不相及嘅短 shot，播放時會似足一個 MV。
放大圖片
放大圖片
Spec.
感光元件： 22.3x14.9mm CMOS
像素： 1,800萬
感光度： ISO 100-12800
影片： 1,080p
屏幕： 3" TFT
記憶： SDXC
體積： 133.1x99.5x79.7mm
重量： 515g
顏色：黑
售價：$6,480（淨 body）/$7,280（連 18-55mm鏡頭）/$8,980（連 18-135mm鏡頭）
查詢： Canon（ 3191 2333）
放大圖片
Canon G系嘅扭芒，今次玩到去單反身上，高炒低炒方便好多。
放大圖片
玩 Video Snapshot（短片隨拍）前，先要揀定每個 shot拍幾多秒，拍 MV嘅話， 2秒就夠。
放大圖片
試相
唔使校好多嘢，只用 A mode影都好有水準，放大睇都唔見有 noise，顏色又勁靚，睇見粒士多啤梨都想食！
撰文：陳兆奇
攝影：傅新發
）出親鏡都要搞新花臣，上月中亮相電視訪問，成塊面起角，大人細路統統被嚇親，仲以為癲到做手術植入異物，原來只是特技化妝，撈娛樂圈認真不易。
