壹週刊 - 1105 - 壹些事壹些情 江湖大佬搞話劇江湖大佬搞話劇
2011年05月12日
邱應寶曾是 14K的白紙扇，負責出謀諗計，高峰期有百多個門生跟他在九龍城稱雄。打劫、劏死牛、出老千、收陀地、傷人、食白粉、販毒，壞事做盡，全港監獄都曾是他的家。 87年《監獄風雲》開戲，都要找他做顧問。
「幾大奸大惡的人，都希望做好人。」
今日，他不再做社團大佬，改當劇團大佬，還自編自導自演，上演一幕幕勵志小品。
「以前做得壞事多，希望臨死前做好事，影響下一代。」患了末期肝癌的他說。
放大圖片
邱應寶從沒受過戲劇的正統訓練，但他的人生如戲，那天他幫其他劇團執戲，即使義務，也肉緊非常。
邱應寶的創作劇《叮叮糖與白糖糕》十一月才演出，演期還有半年，他已召集演員圍讀。
「我好嚴格，讀劇本讀到有嗰種意境，才可以企台位排戲。」他讀劇本也七情上面，每讀到激動處，臉紅耳赤。
他創辦的劇社《八福棧》，經費由熱心人士及教會捐助，沒多少錢，寫劇本演戲做道具化妝都由他包辦。
「我在亞視做過道具。王祖藍和高皓正那齣《唯獨[!9DEA]是王》都是由我做布景，他倆也跟過我學整道具。以前坐監好得閒，睇好多書，戲劇都是自修回來。」
為向記者解釋什麼叫演技，他在街上即場扮小兒痲痺症患者，頭側在一旁，右手裝痙攣，一拐一拐地走，樣子極神似。
十多個劇員都是二十歲出頭，有些在教會認識，有些慕名而來。「有個還是演藝學生。」
今日雖已洗心革面，但江湖味不減。採訪當日他義務為另一劇團執戲，立即大佬上身。
「演完喇？四個字：不知所謂。」「呢個布景原來是酒吧？我仲以為去了殯儀館！」
記者也不能逃過一張寸嘴。他懂特技化妝，問他化靚妝會否被難倒？「睇吓化邊個。化你技巧咪要高啲囉。」
「寶哥（邱的暱稱）鍾意話事，一定要我們跟足他的方式去演，我試過演不好，被他鬧到喊。」演員珠珠說。
在《叮》劇中當男配角的阿溢，跟寶哥學戲三年。「有時他會幫其他劇團，但無論負責幕前定幕後，也會幫人執戲，但未必個個導演識欣賞。業餘劇團好少咁認真，跟他做戲可以知道什麼叫演技。」
人在江湖
出入邱應寶住的大廈，只要跟保安說找寶哥，便立即中門大開，彷彿個個都知他的「英雄」史。而他最「輝煌」的事蹟，就是用英國軍艦運毒。
十六歲入黑社會，十七歲打劫金行，十八歲打傷差人。「那次我走甩，趁未被通緝，阿媽送我去英國，那裡有個家姐可照應。」
那是六十年代尾。在英國無所事事，跑去考皇家海軍，他是「獨角獸」號唯一華人。
「媽媽是新加坡人，我在新加坡出生，拿新加坡護照。新加坡、馬來西亞屬英聯邦，所以有資格當兵。」
三年後因打上司被捕。「他歧視華人，有次跟他吵起來，火遮眼一個玻璃樽插頸。」
被憲兵拘捕，搜儲物櫃時，竟發現了幾磚海洛英。
「那時經常停泊在泰國、菲律賓，識了毒販，軍艦運毒好安全，咪運埋毒賺外快。」
放大圖片
當年斬人是等閒事，他身上還有刀、槍傷痕。
放大圖片
醫生說肺片顯示肺部已纖維化，採訪期間他偶爾也不夠氣說話，露出疲態。
家醜不可外傳，英國低調判刑，他坐了兩年軍監。「將我鎖在船頭最尖的位置，叫 monkey house，好似狗咁。」
坐完軍監後他回港，重投社團懷抱，負責出謀諗計，練得一手好字，採訪日還作了對聯送給記者：淑麗幽雅清秀外，賢德良善慈慧中。「呢兩句是違心之作，你邊忽似秀外慧中？」
他在九龍城一帶收陀地。「鄧強、孖刀坤、慈雲山十三太保都是跟我同期，車神盲亨已經是我後輩。」
他帶記者巡遊衙前圍道、城南道、福佬村道，大部分受過他「恩惠」的商店都已轉手，除了竹園海鮮酒家，他還跟老闆達哥打招呼。
「他被其他黑社會搞，我幫他擺平，當然收埋佢陀地。」他試過收陀地被告三百多條罪。
何來三百條咁多？「你估我收一間？收成條街呀！」他兇巴巴地說。
他也試過改邪歸正，經朋友介紹入亞視做外景睇場，後來轉做幕後製作，卻死性不改，因穿了幾十萬櫃桶底再次入獄。「那次我發誓不再做好人，做好人都係要坐監！」
穿櫃桶底都叫好人？「梗係啦！入電視台撈正行已叫好人，穿櫃桶底算什麼壞事？」他大聲地說。
記者多次說話衝撞他。「如果仍是黑社會，早就斬了你幾刀。」
做「好人」不被認同，自此他因吸毒、打劫、收陀地、傷人等不同罪名入獄。芝麻灣、壁屋、大欖涌、赤柱、塘福等監獄通通坐過。
「我對家人唯一貢獻，就是帶他們遊歷咁多個監房。」
爸爸是珠寶商人，有三個太太，他是二媽生，有十八個兄弟姊妹。
「以前屋企環境唔錯，阿爸好錫我，生日買幾呎長火車給我做禮物，是我自己走歪路。他無放棄我，山長水遠來探監。後來他患了肺癌，臨終前還叫我不用擔心他。」他忍不住哭。
他也對不起青梅竹馬的太太和兩個兒子。「佢好乖，唔知貪我咩好，對我死心塌地。」多年來靠太太做製衣養起成個家。
放大圖片
雖身患惡疾，一排戲他便精神，唯獨氣喘不受控，採訪當日一邊喝咳藥水一邊執戲。
放大圖片
相中是太太（右一）、孫女兒（右二）、大兒子（右三）、他本人（右四）、細仔（右五）在美國合照。太太和仔現在美國，他說不方便接受訪問。
真心悔改
放大圖片
竹園酒家老闆達哥是舊相識。「達哥，《壹週刊》做訪問，來來來影張相！」問達哥邱應寶當年是否無惡不作？達哥尷尬地說：「都過去了！」
他每次犯事皆因毒癮起，有次打劫被捕，法官判他入喜靈洲戒毒所。
「夜闌人靜時，都想做番好人。」三個月後出獄，被安排在中途宿舍居住，中心內其他兄弟（過來人）經常勉勵他改過。每日，那班兄弟都去浪茄幫手擴建戒毒村。「我心諗：你班契弟有咁好死？慌唔係借意出去玩咩。」有次負責人叫埋他去擔泥。「那些麻包袋很嚡，抬上膊有一條條血痕。」
辛勞一整天，那夜，他哭了。「人哋都可以改過，點解我唔得？」
在互愛中心一年，戒煙戒酒戒粗口，中心還安排他在貿易公司做 boy。沒見家人多年，他回家找母親，卻原來已移民美國。兩個兒子已升讀中學，十分憎恨他。「我以前衰到帶埋個仔去買白粉，然後塞落佢個袋。他們唔肯叫我做老豆。」
幸好老闆重用他，讓他負責入口部工作。在貿易公司二十年，當了老闆的左右手。「太子爺初入公司都是跟我學嘢。」
兒子想出國讀書，他死慳死抵供養。看到父親改變，兒子亦慢慢接受他。
十年前，有朋友搞劇社，他工餘幫手做演員，後來索性自己成立劇社，專創作勵志故事，去年還在香港大會堂上演話劇《我們不再傷愛》。以為有好日子過，誰料一次寫字無力，一照，竟是肝癌末期。
「醫生話得半年命。我埋怨個天，點解做好人都要生 cancer？後來想通，生死都是上帝安排。」
《叮叮糖與白糖糕》在學校巡迴公演，故事講述兩父女代溝，一個愛吃叮叮糖，一個愛食白糖糕，後來父親患癌死了，女兒才後悔，他做阿爸一角。「我比主角好彩，起碼兩個仔已原諒我。」
兒子已成家立室，在美國生活。他最擔心太太，在德福花園買了一層樓給她養老。「但佢唔識煮飯。我怕有日報紙頭條是：德福有條女屍是餓死。」
他食中藥調理，捱過半年又半年。去年身體日差，辭了貿易公司工作，最近醫生說癌細胞可能已擴散至肺部。
但他的《叮叮糖與白糖糕》，十一月才在將軍澳田家炳小學上演。
「我有信心做得切。」
撰文：阮淑賢
攝影：鄒潔珊
2011年5月12日星期四
壹週刊 - 1105 - 壹些事壹些情 江湖大佬搞話劇
壹週刊 - 1105 - 八卦陣 李家誠生仔 一億再買大遊艇
壹週刊 - 1105 - 八卦陣 李家誠生仔 一億再買大遊艇李家誠生仔 一億再買大遊艇
2011年05月12日
黃金海岸上週六舉行遊艇展，百通都有去湊熱鬧，仲乘機去參觀全場最貴、價值六千五百萬的英國品牌 Sunseeker遊艇，走到入去，以為自己去咗間豪宅，四房兩廳，仲有兩間船員房，簡直睇到嘩嘩聲。
呢隻海上豪宅係 Sunseeker最新型號 Predator 92，老友爆料話原本係恒基二公子李家誠訂咗，舊年年尾剛剛收貨運到香港，遊艇入面的裝修仲係由二公子搵專人設計，單係裝修費都用咗接近二百萬，不過，唔知係咪因為徐子淇剛剛响年尾證實懷咗第三胎，所以二公子竟然嫌呢隻艇細咗啲，決定訂過另外一艘多兩個睡房、廳大房大、價值一億零五百萬的 Predator 115，不過，呢隻新艇起碼要到年底先到香港。
咁呢隻「細咗啲」 嘅究竟點算？原來已經有買家表示有興趣，廣東邦家租賃有限公司董事徐坤啱啱响週六已經一口氣用咗三億買咗五隻唔同大細、唔同型號的遊艇，佢見到呢隻裝修得咁靚，竟然心郁郁想買埋佢。買咁多做乜？徐總話，內地唔少有錢商家想體驗富豪生活，呢類頂級奢侈品在內地需求甚殷，租賃富豪遊艇生意大有可為噃。
放大圖片
「細 咗 啲」 嘅遊艇內部裝修係由李家誠搵專人設計，上層係客廳，下層就有四個房，每個房都有獨立洗手間，最低層就有兩個船員房同廚房，猶如一間海上豪宅。（鄒潔珊攝）
放大圖片
$5,000抹走艾未未
放大圖片
全城力撐艾未未，塗鴉遍地開花，原來最大得益者係外判清潔公司，清洗一次，索價五千。
香港聲援艾未未的塗鴉遍地開花，唔單只中環、尖沙咀見到塗鴉大作，連荃灣、石硤尾都見到「 FREE AWW（釋放艾未未）」。
通街都係塗鴉，究竟邊個負責清洗？官場老友同百通講，呢樣嘢要視乎塗鴉位置响邊度；如果响公園範圍，咁就由康文署負責，如果喺行人隧道就由路政署負責，如果塗鴉响燈柱、電燈箱呢類公眾地方，咁就由食環署負責。
有外判清潔工向百通爆料，話原來呢類清洗塗鴉係屬於額外工作，所以外判清潔公司都要額外收費。收費幾多？爆料者話，因為政府部門次次都係半夜三更急 call，特事特辦，趕住抹走艾未未，有清潔公司一劑收費五千蚊。究竟今次為咗艾未未塗鴉用多幾多公帑，路政署、康文署同食環署都話未有數。但百通可以肯定，呢班外判清潔公司應該賺咗唔少。
孫公腎病收楊桃 朋友靠害
自從教育局局長孫明揚患病嘅消息爆出之後，好多朋友同市民都好有佢心，送禮慰問佢，祝佢早日康復。
話說好多朋友都送生果俾孫公，諗住夠健康，但係有醫生話，其實腎病病人係唔食得生果，因為好多生果含鉀量高，鉀排唔到出體外會造成腎衰竭；生果之中竟然仲有人送楊桃，楊桃含鉀勁高，食得多絕對係腎病病人嘅大敵，好彩孫公警覺性高，攞晒啲生果益同事，如果唔係就大件事！
講開孫公，百通上週三見到孫太陪佢去瑪麗醫院覆診，不過呢頭睇住孫公離開醫院，點知轉頭就見到前律政司司長梁愛詩 喺藥房拎住一大包藥。詩姑九八年因為腸癌入院接受腫瘤切除手術，究竟今次佢因乜事去醫院呢？
放大圖片
百通上週三响瑪麗醫院撞見孫太陪孫公覆診。近排孫公收到唔少慰問同果籃，不過，生果係腎病病人大忌，楊桃更甚，大家唔好再送喇！（郭永強攝）
放大圖片
短評通一通 國民失憶才是教育
放大圖片
唔講唔知，大埔原來有間「國民教育中心」，名符其實「洗腦中心」。（江永健攝）
教育局話想將「德育及國民教育科」列為中小學必修科，擺明係硬銷國情。
教育局辯稱「課程自決，理性討論」，但百通睇番由教育局資助嘅國民教育中心，呢個中心二○○四年成立，每日更新嘅中國新聞都好一面倒，劉曉波、艾未未、趙連海一干人等梗係連影都無啦，民生消息亦都係報喜不報憂。百通又喺呢個國民教育中心，搵到《建國六十年》嘅歷史教材，大部分都係記載我國嘅「豐功偉績」，反而廿二年前嘅六四事件，就只係以「五、六月期間，在錯綜複雜的國際、國內的形勢下，發生了『天安門事件』」一句概括咗，原因、過程、人物統統都無交代到。咁求其都得，呢份國情教育「快餐」真係不敢恭維。
本週最騎呢
放大圖片
六合彩騙子怕你有牙
大陸真係乜 嘢騙子都有，六合彩騙子呃人仲認真到請埋臨記扮政府官員開記者會。
「港版三中三」呢個大陸網，聲稱有香港六合彩必中貼士嘅計算方法，拍條騎呢短片扮開記者會呃人錢。
呢個騙局 嘅負責人叫羅利章，百通上星期打過電話搵佢，點知佢居然話自己喺香港，仲叫百通去中環文華酒店坐低慢慢解釋佢個概念。百通去到文華再打俾佢，點知佢當時又問記者著乜衫、有無戴眼鏡，話叫個秘書落 嚟接百通。
羅利章講到似層層，點知一等又係四十五分鐘，唔見秘書出現，於是再打俾羅利章，佢就話秘書在大堂搵唔到百通，又話自己已經去 咗「紫荊廣場」，要一個鐘先返到，仲講自己住 喺總統套房，約百通一個鐘後見。
結果係點？當然佢無現身啦，仲要熄埋電話，百通查過酒店根本無呢個住客。呢位羅生怕你有牙，噏得就噏，果然係專業騙子！
壹週刊 - 1105 - 封面故事 政府無能 劉皇發威脅作反 丁屋惡霸瘋狂僭建
壹週刊 - 1105 - 封面故事 政府無能 劉皇發威脅作反 丁屋惡霸瘋狂僭建政府無能 劉皇發威脅作反 丁屋惡霸瘋狂僭建
2011年05月12日
申訴專員公署發炮，狂轟政府規管村屋僭建不力，新界原居民大怒，鄉議局內鷹派勢力，威脅謂「入嚟拆樓，幫你拆骨！」揚言動員包圍政府總部洩憤，又向中聯辦告御狀，狂插申訴專員黎年是「引發社會動盪的罪魁禍首」，連新界王劉皇發都明言：「唔講得笑」、「真係會（作）反」。
違例丁屋失控，政府束手，全因新界地頭蟲夠惡。本刊發現全港僭建情況最嚴重的六個鄉郊地區，不單發現凌空僭建天橋，有丁屋為避耳目，在室內搞「蠱惑僭建」，地底加建七百呎大地牢，令原本只限建三層的丁屋，在上加高三層，在下挖多一層，隨時變身「七層大廈」！一遇風吹雨打，難保不會成為一枚枚鄉郊炸彈！
記者過去兩週查察新界各區丁屋僭建情況，發現問題遠比申訴專員的調查報告嚴重。重災區是元朗屏山鄉、廈村鄉、錦田鄉、八鄉、新田及十八鄉等村落，甚少丁屋依照法例限制只建三層，反而四層甚至六層超高丁屋比比皆是。
丁屋僭建五花八門，有些天台建全層玻璃屋，有些更凌空搭建天橋，一條行人通道橫跨兩屋，上面還起多一層，千奇百怪。大棠原居民金伯一家十七口、三代同住一幢四層高丁屋，共二千八百呎面積還要再起，他說：「我有三個仔，佢哋娶晒老婆，九個孫仔孫女愈嚟愈大，點可以無自己間房呢？三層丁屋，加建多一層，天台嗰間原本我住，後來年紀大，行唔到樓梯，咪喺隔籬起多間鐵皮屋，我哋有丁地，無起之嘛！」
放大圖片
鄉議局內鷹派勢力全面向政府宣戰，新界王劉皇發（右）急召頭馬張學明(左）商量對策。
放大圖片
抗議政府針對丁屋僭建的行動組召集人梁福元，揚言新界人個個揸鋤頭出身，激過長毛，威脅謂政府強行拆樓，肯定社會動盪。
新界僭建重災區
放大圖片
地牢屋
向上發展之餘，亦有丁屋向地底發展。記者假扮買家，跟羅姓地產經紀到離元朗朗屏西鐵站十五分鐘車程的屏山鄉盛屋村，這裡一帶村屋同樣建在平整了的地基上。
記者一入屋，發現有樓梯通向地牢。「無人會申請建地牢，申請等到幾時先？好多都係原居民自己掘嚟自住，呢間肯定係筍盤，七百八十萬全幢，人哋三層二千一呎，呢度四層二千八百呎，一樣價錢，偷多七百呎地牢俾你，去邊度搵？」羅經紀說：「呢度幾間村屋，全部都僭咗地牢，用嚟做酒窖放紅酒或者整間卡拉 OK房，一樣咁爽！你唔夠住，喺天台起多層都無問題，多幾個人都肯定夠住！我之前喺大埔黃宜坳同沙田，先賣咗兩間呢啲地牢屋。」
根據土地註冊處的資料，地牢屋落成僅兩年多，前業主吳耀於○七年十一月，取得由地政署發出的滿意紙。地底多建一層，為何地政總署竟批准？羅經紀解釋：「地產咁興旺，地政邊得閒逐間睇。地政署搵人嚟睇，發滿意紙，你遮住道門就得，佢唔通會敲牆，睇吓係咪中空咩？」
放大圖片
地牢屋透視圖
放大圖片
位於屏山鄉的盛屋村，發展商
秘密在地底加建七百呎大地牢，
避過地政署耳目。
僭建「有理」
丁屋僭建氾濫，抗議政府針對丁屋僭建的行動組召集人、大棠村村長梁福元還說僭建有理：「未計七二年前落成嘅祖屋，依家全港有四萬幢丁屋，保守估計一半以上，都有僭建問題，影響廿幾萬人，但呢啲係歷史問題。政府咁多年唔管，家吓派黎年（申訴專員公署署長）出嚟，話要拆晒佢。我係行動召集人，負責吹 BB，你毀我家園，後果自負，我同我啲村民都咁話：『你入親嚟拆屋，我幫你拆骨！』」
接 着，身兼十八鄉鄉事委員會主席梁福元又話僭建問題是政府逼成，「我哋十八鄉，就好似毛澤東咁講，係鄉村包圍城市嘅格局，最近元朗市中心同西鐵，政府收晒村民啲地，去俾發展商起高樓，搞到原來嘅丁地，愈來愈細，村民開枝散葉，先被迫向上發展！」梁福元有恃無恐，連唯新界鄉民馬首是瞻的行會成員、鄉議局主席劉皇發也覺政府離譜，揚言此事「唔講得笑，真係會（作）反！」有鄉議局中人更乘勢向中聯辦告御狀，實行全面反擊。
放大圖片
梁福元是鄉議局內出名的鷹派，力撐村民以抗爭手段「保 衞家園」。
放大圖片
一家十七口、三代同住大棠村丁屋，金伯承認僭建，但強調只因原有的三層單位「唔夠住」。
僭建風險高
放大圖片
金伯的丁屋除僭建了一層，毗鄰還加建了一間鐵皮屋。
鄉郊高樓湧現，甚至有不法承建商違規僭建地牢，香港工程師學會前會長黃澤恩指風險好高，「僭建一定存在風險，因為無監管，你唔知用咩物料、地基穩唔穩固。建屋有所謂安全系數，加建一層，重量多三分一，應該還在安全系數之內，無問題，若加高兩層，就會較原建築重七成，風險自然較高。唔好忘記，所有僭建樓宇，一旦發生意外，就算唔係塌樓，吹倒天台屋玻璃傷到人，保險一定唔賠，隨時得不償失。」黃說。
發展商 盲公竹
現年五十三歲的梁福元，是大棠村原居民，祖先梁偉大是大棠大地主。他中三輟學，自小跟母上山務農，認識當時的理民府專員鍾逸傑。八十年代農業式微，因梁家種荔枝、龍眼等果樹，他靈機一觸，將家族三十萬呎農地改種二萬棵荔枝樹，九四年辦大棠荔枝山莊，成為新界名勝，生意額千萬元。
梁見荔枝園和露天倉收入有限，近年積極拓展地產，除了大棠山莊一期屬家族地皮，他還成立源發建築有限公司，承建樓盤如三十座丁屋的元朗龍騰閣，實行地產、建築一條龍，一幢屋的利潤動輒二、三百多萬。早於九七年，梁福元已將近大欖郊野公園山腳三百萬呎農地轉做康樂地，地積比率二點五倍，可建低密度別墅及度假屋。
位於大欖郊野公園旁的荔枝山莊，坐擁約一千萬呎的荒廢農地，成為不少發展商覬覦的目標。根據土地註冊處資料，長實於○六年初，以一百三十多萬向梁福元購入約二萬呎的土地。而新地及新世界也曾接觸梁福元，透過他跟大部分原居民洽商買地事宜，搖身成為地產發展商投石問路的盲公竹。
鄉紳透露，梁由人稱「元朗教父」的戴權扶持上位，二人既屬同鄉，又屬師徒關係，但隨戴於九九年捲入十八鄉賄選案，之後他的均來集團又有爛尾樓風波，梁欲在政圈再上層樓，於是離開師傅，轉投新界王劉皇發陣營，。
早於兩年前，劉皇發有意把位於新元朗中心毗鄰的大橋村，搬入大棠山道，以發展他的六十億地產項目，貴為大棠村村長的梁福元，積極協助發叔完成搬村大計，以贏取發叔支持他出選鄉村選舉，重奪十八鄉鄉頭公職。
毗鄰元朗 YOHO Town的十八鄉，是發展豪宅的上佳地皮；誰當上村代表，甚至更高的話事人「鄉主席」，誰就能成為地區發言人，左右土地發展利益，近年積極進軍地產發展的梁福元，自然不會錯過機會。
在鄉議局內屬「鷹派」的梁福元，年初重奪十八鄉鄉議會主席，上月底又當選元朗區議會副主席，雄心勃勃。一名鄉議局中人說：「新界北六個鄉頭，四個換班，新官上任，梗想打響頭炮，張學明（鄉議局副主席）係局內鴿派，成日話同政府傾，鄉議局入面啲鷹派，一早好唔耐煩，家吓鷹派勢力抬頭，加上丁屋僭建咁貼身，最易攞票，唔乘機發難等幾時呀？」
放大圖片
梁福元是荔枝山莊的創辦人，近年積極拓展地產生意，對政府企硬，對發展商懷柔，
左右逢源，是發展商開發鄉郊用地的盲公竹。圖為山莊內的士多啤梨園。
放大圖片
梁福元早年由有元朗教父之稱的戴權扶持上位，二人既是同鄉，又屬師徒關係。
放大圖片
梁福元（左二）的先祖是大棠大地主，他自小跟母上山務農，認識當時的理民府專員鍾逸傑（左一）。（梁福元提供圖片）
放大圖片
戴權根據地鈞樂新村是僭建重災區，一度是政府重點「滅僭」的試點。
丁屋與祖屋
丁屋屬於新界小型屋宇的一種，是一九七二年港英政府給予新界原居民有權興建的建築物，男性原居民可將自己的農地，或從政府批出的指定官地，申請俗稱「丁牌」的建屋牌照建丁屋。丁屋的規格有嚴格規定，樓高不得超過三層及在二十七呎內，每層不得超過七百平方呎，其後任何改動，都需要再申請。丁屋有限制買賣轉讓條款，若在五年內轉讓需要補地價。
另一類俗稱「舊屋地」，亦叫「祖屋」，是在一九○五年清朝時港英政府批出的集體政府租契內，某些註用為屋地的地段，無限制買賣轉讓條款。測量師陳旭明指出，鄉議局一直認為，舊屋地沒有發展限制，故可建超過三層，但地政署的觀點卻不同意，認為以前是一至兩層，重建後亦只能是一至兩層，雙方至今仍在爭論，未有共識。
知法犯法 張學明
張學明這邊跟政府談判僭建問題，另一邊廂父子兩人瘋狂僭建，認真諷刺。現年五十八歲的張學明，○四年獲選為鄉議局副主席，同年亦首度進身立法會議員，近年更有傳他是劉皇發的接班人。但這個新界第二把交椅的話事人，不僅在大埔林業村丁屋住所上，違例建天台屋，其子張以嵐兩年前申請在隔鄰建丁屋，更加「巧妙」。
原來張以嵐在三層高丁屋落成後，向地政署申請批完工紙，同步申請屋前約一千五百呎政府用地作短期租約，結果○九年十二月底批出完工紙後，不出三日，他立即大肆僭建，加建圍牆、造魚池、屋後加建二百呎小屋、造豪華玄關、甚至霸了行人路官地作花圃。
「僭建已經衰，仲要做對花架撐埋出行人路，咁都仲批出租約。」有街坊向本刊說，他們向地政總署舉報，得來回覆卻是：「個花槽建喺路出面，係屬於公眾得益，人人都享受到，所以唔算僭建……」
據熟知村屋運作的承建商透露，丁屋的完工紙就等如是一般樓宇的入伙紙，必須獲發完工紙才能入住及買賣。「好多原居民就係先做一間規規矩矩嘅村屋出 嚟，等地政總署嘅人查完認為無問題喇，攞到張完工紙後就大改個結構，一般政府部門睇完之後就好少再嚟巡查，咁佢哋點改都得啦！」本刊就此質詢張學明，他承認父子倆的丁屋均有僭建，並透露兒子的物業已被「釘契」。
放大圖片
張以嵐在大埔坪朗村新建的超豪丁屋（白色屋），不但建築物前後都有違例建築，甚至霸佔部分行人路。旁邊橙色屋為父親張學明的丁屋，天台亦有僭建玻璃屋。
放大圖片
由大埔區崛起的張學明（左），是新界王劉皇發（紅帽）的左右手，亦是發叔繼任人大熱。圖為張於○八年選立法會議時，劉為他拉票。
無力執法
官員縱容，村民才瘋狂僭建。「我哋嘅村長好多都係委任區議員，如果 啲官因為僭建問題阻撓我哋，咁村長第日咪喺區議會上唔撐政府囉。咁多年來，我哋見過不少地政專員 喺土地政策上得到方便，第日容易升級，所以早已有不成文嘅規矩，唔會點理我哋啲僭建問題。」一名粉嶺原居民透露。
高官怕鄉紳，前線人員就怕惡霸。地政署督察人員協會主席劉耀華表示，遇僭建投訴，要入村執法，不時會遇上阻撓，由於被拒入村及上樓，往往因無法舉證，難以提出檢控。
有不願透露姓名的地政署人員則承認，前線人員執法困難重重，「我哋依家行孖咇，但一樣好驚，試過有村民攞住枝棍喺後面追，我哋好多時揸 AM車，未入村，已經有天文台出嚟阻攔，試過話私家路唔俾入，要兜上山入村，又試過有人見我哋貼違例通告，推石落嚟同放狗追我哋，好恐怖。」
更想不到是執法的地政總署及屋宇署，竟想出新方法互相卸膊。申訴專員上月公布調查報告，發現現時完工後的僭建物由地政署管，興建中的屬屋宇署負責。由於以「完工與否」作為由那個部門負責的分水嶺，結果兩個部門你推我讓。另外，對落成少於一年的僭建，屋宇署竟給予豁免，理由是「積壓太多個案」！
申訴專員公署指，近四年政府接獲丁屋僭建投訴大幅增加五成至近三千宗，但執行清拆令則急跌一半至只有三十五宗。其中一個例子，有市民曾於○八年十一月向地政總署投訴，有人在村屋內違規建泳池，署方接獲投訴後七個月內，四度嘗試進入建築物，但被住戶拒絕，事件竟不了了之。○九年四月，投訴人再次投訴，署方將個案轉介屋宇署，屋宇署在五月介入時，泳池已完工，屋宇署便以個案已完工為由，不再採取執法行動。
放大圖片
申訴專員黎年上月底發表報告，狠批屋宇署及地政署懶理新界村屋違規建築，拉開戰幔。（《蘋果日報》圖片）
放大圖片
九八年，粉嶺一間丁屋因無落鋼筋，發生露台倒塌意外，政府一度建議丁屋在建屋前要入則，但遭居民強烈反對。（《蘋果日報》圖片）
熟悉村屋政策的前測量師學會會長陳旭明直言政府無能：「仲唔係執法不力？好明顯唔係資源問題，以前市區舊樓好多花籠、露台，屋宇署話要做，咪一樣做到！村屋周圍都有僭建，只係政府無決心去做 啫。」他認為，屋宇署和地政署即使人手不足，亦可以利用外判形式執法。
曾任中央政策組顧問、對丁屋問題有研究的元朗區議員黃偉賢，直言現在局面是政府「欺善怕惡」下的惡果，「政府其實一直見到個問題，但就唔敢郁，回歸前梁寶榮任規劃地政局嘅年代，政府已謂要普查，分階段清拆丁屋僭建物；又試過搵咗十八鄉嘅鈞樂花園做試點，話要集中清拆僭建物，嗰時鈞樂仲係戴權根據地，唔使講全部不了了之！」
九八年，粉嶺一間丁屋因無落鋼筋，發生露台倒塌意外，政府一度建議丁屋須加強監管，建屋前要入則，但遭居民反對，同樣功敗垂成。○五年，政府終同新界鄉紳談判丁屋僭建問題。可是本刊得知，政府竟跪低，願意容許丁屋天台僭建一層，但必須符合結構安全，業主亦要就多建的位置補地價，並繳付差餉。
怎料鄉議局依然未收貨，有鄉紳說：「好似十八鄉梁福元，佢就覺得同政府有乜好傾，傾 咗咁多年都係得個桔，總之團結班鄉下佬，政府就奈我哋唔何，莫講話四層，就算起到六層政府都唔應該取締。」
「依家丁屋的僭建問題，根本係計時炸彈，涉及公眾安全問題，唔通等到有丁屋倒塌，有人死傷先做嘢咩，呢個問題一定要正視，明明唔啱，無理由一遇反對就縮，但呢個弱勢政府，你都唔敢對佢有期望啦。」黃偉賢無奈地說。
放大圖片
政府懶理村屋僭建
放大圖片
屋宇署署長區載佳（右三），在申訴署發表報告後，特別到元朗區議會解釋署方執法政策，梁福元（右二）率一眾鄉頭乘勢發難，向署長請願要求暫緩執法。
撰文：呂麗嬋、簡淑明、蔡傳威
攝影：李英林、郭永強、王偉洪、黃柏狄
資料：資料組
插圖：劉志誠、詹震寰