【先達收風】S7銷情放緩 見底價送配件
近排場中焦點手機，一定係Samsung S7系列，頭幾日的確有得炒吓，開初是以黑機最熱炒，放機者都有一百幾十執吓，其它顏色則相反要損手離場。不過近幾日國內收機者多了人要銀色，反而其它顏色變成輸錢，連黑機都冇情講！所以話炒機唔係一條好出路，為了一百幾十，何苦被人牽着鼻子走呢？
S7與S7 Edge的銷情開始放緩，樂見的是店舖現貨多了，連想揀顏色都可以。
S7系列經過頭幾日的大賣過後，現在的去機情況開始有些放緩下來，sales估計，心急的人已經入晒手，至於心大心細的就繼續抱持觀望態度，看看可否進一步搲盡着數。
不過現實是唔可以畀大家等的！大家都知道電器連鎖店個價好進取，官方定價再-$600開售，加上又多配件送，以及銀行免息分期，所以令人出機意慾非常大。不過近幾日大家再去連鎖店問價時會發現，所有配件贈品唔見晒！大家咪以為店員吊高嚟賣，其實背後是賣機分成問題；開初S7系列賣機的分成有成$70至$90一部，在這個水位下，好多店員都會用自己的分成，變成贈品送給客戶用以促銷，但近日大舖分成突然大幅下降，做到只有$10至$20一部，所以「遲買平幾嚿」這套理論，暫時不適用於S7系列之上。
講開S7八卦料，sales在報價單上發現一樣幾得意的情況，星期五最新的「店舖買入價」為S7 32GB/$4,500、S7 Edge 32GB/$5,350（亦即店舖入貨價，大家在店舖內買唔到的！），相較官方定價 S7 32GB/$5,198、S7 Edge 32GB/$5,998低，以近期手機店步入寒東期來說，真係幾好水位！當中可見S7的差價最大，有$698（S7 Edge差額為$648）！不過老老實實，S7與S7 Edge的差價只有幾百蚊，大家去到呢個價位買手機，都不會志在這幾百蚊吧。再者S7 Edge可是大芒、高配版，所以近來形成了S7銷情非常差，短時間內大家未必見到價格有好大變化，不過如果細芒版S7繼續銷情暗淡下去，機價會否進一步拉開，把S7機價稍稍下調刺激銷情，則未可知了。
再來是「翻兜」說說S6系列吧！好多人一心諗住新機出，舊機會大平賣吧？對不起！二手及全新的價格，由S7推出打後，都一直未見好大上落！據知現時的「店舖買入價」為S6 32GB/$3,900、S6 Edge 32GB/$5,050，sales都好老實講，價位同S7及S7 Edge真係非常貼近，要推機實在非常難，所以近期就算有客問價，都係叫佢哋自己睇，都懶得答了！何解機價價位企得咁硬？如果大家並非健忘，都應該記得去年12月《競爭條例》實施時，S6及S6 Edge可是首當其衝的鬥價之機，話說好多大舖及大拆家都在這役中損手，所以現在S6及S6 Edge所反映的，還是這些店舖的「坐貨價」，喜歡追上代機王的「高性價比玩家」，今次可能要有排等了！
記者、攝影：朱崇德
上一則: 【科技籽】實測空氣清新機 風力越強越除塵
I
