換鏡 pink DC 鬥 one point sharp
2010年12月22日
時裝同化妝都有所謂「 one point sharp」嘅技巧，女生趨之若鶩！其實家專攻女性市場嘅迷你換鏡 DC，都一樣咁興 one point sharp，即係龍友叫嘅散景、淺景深。女仔影呢類前清後矇相，唔只唔鍾意叫專業名詞，影法亦要夠簡單先得。
最新出嘅 Panasonic GF2同最細部嘅 Sony NEX-3，都內置咗一㩒掣即有嘅散景功能，啱晒女仔用！佢哋嘅 pink pink機身，若再加多啲靚靚配件襯托嘅話，未開機影相，只係帶住出街，都已經係人群中嘅 one point sharp！
互動片段
觸控女朋友 Panasonic GF2
睇清機仔有幾細
放大圖片
放大圖片
硬件比併
修身再加 pink Panasonic GF2
女仔揀相機，始終係外形先決，所以睇兩機嘅 one point sharp功能之前，點都要睇咗個樣先。
上年 GF1就係憑住纖巧體形而大熱，更直接加快咗 M4/3 DC嘅興起。嚟到第 2代 GF2， Panasonic再幫佢修身 19%，令成部機更加 slim！至於顏色，白色 GF1喺上年賣到多番斷市，但 GF2除咗原有黑、白、銀、紅 4色外，再加多隻更冧女嘅粉紅色，今年賣斷貨嘅，好可能係呢部 pink版！
放大圖片
GF2無論長度同厚度都細過 NEX-3，惟獨高度高過 NEX-3 5.2mm。
放大圖片
內置閃燈係 GF2一大賣點，而且盞燈凸得幾高，光線離鏡頭遠少少，影人冇咁易爆光。
放大圖片
粉紅同銀色 GF2都只有 14mm f/2.5餅鏡套裝，想玩餅鏡同 14-42mm zoom鏡嘅雙鏡套裝，就要買黑、紅、白 3色，盛惠$6,990。
放大圖片
日本 Panasonic重金禮聘綾瀨遙拍 GF2廣告，重點 sell嘅就係指控散景功能。
放大圖片
GF2等 M4/3機嘅感光元件只有 17.3× 13mm，比 NEX-3嘅 23.4× 15.6mm單反 CCD細一截，營造散景會輸蝕少少。
最細換鏡 pink Sony NEX-3
GF2個廣告話自己係全球最細嘅內置閃燈換鏡 DC，點解要咁繑口？因為 NEX-3細過佢囉！只不過 NEX-3冇內置閃燈，要外插燈仔，所以 GF2先多個名目話佢係最細。 NEX-3機身真係細到成部 DC仔咁，不過佢係用單反格式嘅 CCD，尺寸反而比 M4/3機嗰塊感光元件大，對營造散景更加有利。
NEX-3雖已經出咗半年，但粉紅色新版只啱啱喺 12月頭開賣，仲要出咗冇耐就連 Sony Style官網嘅單鏡套裝都俾人搶購一空，家想買就多數要買$5,390嘅雙鏡套裝。
放大圖片
NEX-3大半機身都薄過 GF2，只係手柄厚過 GF2。
放大圖片
$5,390嘅雙鏡套裝，除咗 16mm f/2.8餅鏡，仲包多支 18-55mm zoom鏡，但當然用餅鏡型好多啦！
放大圖片
想用閃燈，就要加插隨機附送嘅呢支燈仔，燈頭可校前向 90度或斜向 45度。
放大圖片
NEX-3個芒冇得篤，但有得揭，可向上或下反出，方便高低炒。
餅鏡易影散景
放大圖片
相機鋪 Pro Sourse老闆民哥
「 GF2同 NEX-3支餅鏡分別有 f/2.5同 f/2.8大光圈，比變焦鏡最大嘅 f/3.5光圈，更易影到淺景深效果，所以想影散景相，最好都係買餅鏡套裝。不過兩支餅鏡都幾 wide，影人時要行埋啲影，近到影大頭嘅話，淺景深效果會更出！」
散景實例篇
GF2一篤即散
多數女仔用得咁細部機影相，都唔想再記咩光圈、快門，只想用最簡單方法影到 one point sharp嘅相。 GF2就新加入咗個周圍柔焦功能，易用到只需篤吓個芒就玩到散！
放大圖片
1/80秒快門、 f/4.5光圈、 ISO400
HYOMA藍色外套$999（ d）
放大圖片
冇周圍柔焦
幾清楚見到後面嘅大廈，聖誕飾物亦冇乜層次，只係最前面嗰啲 out focus， model主體唔夠突出。
放大圖片
首先要㩒着機頂個 iA智能拍模式掣， M mode等模式係用唔到呢個功能。
放大圖片
跟住篤一篤屏幕右邊個格仔人頭掣（箭嘴），然後就可以用手指掃下方條 bar去校背景模糊嘅程度，掃去左邊係最矇。
Ketchup評︰整體夠自然
GF2有觸控對焦功能，影嗰陣點選 model個頭去對焦，再將背景柔焦程度校到最勁，唔只背景嘅建築物矇晒，連人後面嘅聖誕飾物都矇埋，只係同 model同一水平嘅地方先至 sharp，有效果之餘唔誇張，幾自然。
NEX-3一碌即散
NEX-3嘅 one point sharp玩法叫背景離焦功能，性質同 GF2相同，只不過因佢個芒冇得篤，所以要靠屏幕側邊個轉盤碌住校散景，但同樣 3個 step就用到！
放大圖片
1/640秒快門、 f/2.8光圈、 ISO800
放大圖片
同樣只有智慧式自動模式先玩到 one point sharp，影之前要用轉盤選用呢個模式。
放大圖片
選用後會見到畫面右方有個背景離焦掣，按轉盤中間個確定掣即能使用。
放大圖片
之後畫面會出現一條弧形 bar，碌轉盤去離焦嗰邊，張相嘅背景就會最矇。
放大圖片
冇背景離焦
人同後面迴旋木馬嘅距離，其實比大相更遠，相同設定影嘅話，背景理應更矇，只因冇用背景離焦功能，所以背景清晰啲，睇落較為雜亂。
Ketchup評︰效果勁明顯
背景矇晒，效果比 GF2更明顯，即使呢張相只得 model同背景馬車兩個層次，但 model主體都好突出。不過放大張相睇，見到 model成個身嘅邊位已開始有少少矇，似乎係部機做過手腳捽矇個背景，加工味重咗啲。
超散王福倫達 f/0.95鏡頭 點影都散
雖然前面嘅測試發現 GF2嘅 one point sharp效果較低調，但因 M4/3機種已經大熱，所以好多鏡頭廠都會出勁鏡畀佢哋用，包括福倫達（ Voigtlander）呢支 Nokton 25mm f/0.95勁大光圈鏡頭。 GF2配咗佢之後，即使唔用內置嘅周圍柔焦功能，影出嚟都會前清後矇，效果仲更加勁添！不過支鏡係全手動嘅， GF2用佢時一定要揀 M mode先影到相，光圈、對焦都要自己郁手校，女仔要練一練先影得慣。
放大圖片
1/640秒快門、 f/0.95光圈、 ISO400
開盡 f/0.95光圈影 model，背景真係矇到七彩，唔講大家未必知係聖誕樹，成張相嘅焦點一定喺個人身上，就算有閒雜人入鏡都唔怕。
放大圖片
好多單反嘅 f/0.95鏡頭係成碌大炮嘅款，福倫達呢支已經算細，裝落 GF2身上唔太累贅。
放大圖片
影相全手動，轉前方個環校光圈，轉貼近機身個環係就對焦。
放大圖片
影相時篤 GF2個芒可以放大畫面睇吓對焦準唔準，呢點同支鏡幾夾！
Spec.
焦距： 25mm
光圈： f/0.95-f/16
售價：$7,930
查詢：麗確（ 2292 5111）
配件 mix& match 為換鏡 DC仔裝身
放大圖片
HYOMA黑白間連身裙$1,099（ d）
想自己拎住部相機時都係 one point sharp，除咗要有部又細又 pink嘅換鏡 DC之外，靚靚相機帶或相機袋都唔少得。但可惜現時專為 NEX-3出嘅配件唔算好多， GF2更加未有，所以揀配件時不妨打破門戶限制，考慮埋其他牌子為自家相機出嘅帶或袋。好似近排 Canon出嘅 3條特色相機帶，雖然原意係畀單反用，但同 GF2或 NEX-3嚟個 crossover又何妨？
白襯粉紅 Vlashor Camera Bag
本來係 design畀 Olympus E-PL1用嘅，但無論 size同白色袋色襯粉紅拉鏈嘅設計，都同 GF2及 NEX-3一樣夾！$250（ b）
放大圖片
玫瑰熱情 Canon Love Blossom
帶身縫滿玫瑰花瓣形嘅絨布，既有夏威夷風情，又有經典嘅 Undercover味道，鮮紅同粉紅色相機又合襯。$350（ a）
民族色彩 Canon Frappe Bliss
帶身繡花充滿民族色彩，風格較成熟，可同 pink pink相機嘅少女味撞出火花。$250（ a）
放大圖片
放大圖片
放大圖片
鮮紅波點 Hakuba SFT-MBS
M4/3 DC、 EVIL、 DV萬用袋，將相機連埋 Love Blossom帶一齊放落去都夠位，襯晒鮮紅帶同鮮紅袋全套。$230（ c）
查詢
（ a） Canon（ 3191 2333）
（ b） DC Power（ 2384 6698）
（ c） dcfever（ 2781 1780）
（ d） i.t（ 2506 0186）
撰文：陳兆奇
攝影：傅新發
模特兒： Ivy@Jacso
化妝及髮型： Christy
鳴謝： CAPTURE moment相機帶
没有评论:
发表评论