吃「紅樓夢」
2011年04月17日
在沙田馬會吃紅樓夢菜譜，同席嘅有幾位文化食家，例如韋大哥、才子曹、台灣薛、藝術劉、平民食家梁及社長麥等等，藝術劉與食家梁帶備 SLR相機，菜式上枱時，影完大特寫照片之後先至起筷，藝術劉父子更一邊食，一邊爭取時間問大廚尹一啲炮製方法，順便做埋 R&D，不同左丁山只識低頭猛擦。
呢位尹達剛師傅來頭巴閉，只是左丁山有眼不識泰山，少睇電視飲食節目，竟然要到呢晚先至知道佢咁厲害。尹師傅在香港、加拿大、日本有入廚五十年經驗，香港「尹師讌」主持人，在日本時係 NHK烹飪節目客席主持，早稻田大學中國料理客席講師，日本學習院大學（皇族人士多入讀）中國飲食文化客席講師，亦係柔道五段高手，唔怪得佢一企出嚟就成個泰山崩於前而色不變咁嘅款，介紹紅樓夢飲食之時，唔駛用咪，全場聽得好清楚。尹師傅順帶展出有半打咁多嘅紅樓夢專書，全部係懷舊版本，係佢鑽研多年嘅。呢晚佢烹調八道菜式，全有出處，講明係紅樓夢第幾回史太君、鳳姐、劉姥姥、林黛玉、寶玉、寶釵等人吃過嘅小品、主菜、甜品等等，例如桂花糖藕、香糟鴨信、塞外磨京葱、燒羊肉排、鹽香軟骨等等，果然不同凡響。可惜尹師傅與凱旋廳合作之紅樓非夢宴只做四晚，星期日晚係臨別秋波夜（四月十四至十七日），相信訂唔到枱嘅會員，大有人在，左丁山冇乜文化嘅啫，聽到台灣薛、藝術劉、食家梁等大讚特讚，梗係一齊話好好好啦。
食家梁平時以平民形象見人，出版「跟我搵食」之庶民美食指南，廣受歡迎，呢晚佢吃過榮國府之春笋雲腿煨刺參、大蝦白鴿蛋、胭脂鵝脯、鹹肉一口糉之後，送左丁山一本「庶民搵食指南九龍中西區篇」，內裏食品，與榮國府之精美精緻，差好遠噃，不過廿一世紀不比康熙年間，當今時興平民化，便宜化，只要入味可口價錢不貴就係正嘢，書內介紹一間土瓜灣崇潔街嘅「檳城小屋」之肉骨茶、咖央多，睇見啲圖片就流口水。肥仔 K到吉隆坡參加婚禮，帶回上級咖央，搽多士無以尚之，此物在香港逐漸淡出，翠華已唔供應，正宗咖央多士唔係咁易搵得到。
（左丁山）
没有评论:
发表评论