大封面
栢芝兩度攬仔求死 霆鋒決絕簽字離婚
2011年06月03日昔日，張栢芝癡戀謝霆鋒，搞到情緒失控兼暴瘦，兩人排除萬難結婚生仔，可惜四年多的婚姻卻以離婚收場。栢芝亦帶埋兩個兒子 Lucas及 Quintus搬出舂坎角愛巢，以十多萬月租陽明山莊，兩人正式分居。
有指栢芝幾年來不斷蠶食老公 6億身家及物業，操控財政大權，更一哭二鬧三上吊來逼霆鋒就範。其實，栢芝的終極撒手鐧是攬住兩個仔以死要脅。
不過，據知今次霆鋒去意已決，更密謀於日內返港簽紙離婚，栢芝今次想掹，睇怕唔係咁易。互動片段
張栢芝與陳冠希機艙合照事件，令謝家上下震怒，鋒芝關係進入冰河時期，身在大馬拍攝《逆戰》的霆鋒，連日來一直保持緘默，不過霆鋒開工前被拍到在泳池曬太陽，似乎心情不俗。
霆鋒奪影帝後兩天，有 fans拍到他與栢芝拍拖到赤柱買雪糕，當時的確睇唔出兩人已醞釀婚變。
6月 1日十三保鑣護駕
爆出鋒芝婚姻告急，現身處大馬拍攝新戲《逆戰》的霆鋒，周三（ 1日）離開下榻酒店時，有多達十三個保鑣跟身。面對大批傳媒，戴着黑超一直抿着嘴的霆鋒，只向記者說了句「小心」便匆忙上車到拍攝場地。
當日霆鋒拍攝一場飛車戲，其間他多次到車上試位。未埋位時，則與劇組人員對劇本。連日心事重重的他，難得展現一絲笑容。
正與霆鋒鬧離婚的栢芝，近日心情壞透，這一幕要佢鬧對手的場面，珼場所見，栢芝表現得歇斯底里，將心中不快一併爆出。
周二（ 31日），栢芝與權相佑在沙灘拍攝一場觀禮戲，栢芝雖然心情唔好，但同權相佑演擁抱戲，她努力裝出一副甜蜜模樣。
拍完場戲，栢芝頭耷耷行埋一邊沉思。有內地報章指她除下婚戒及拍完戲後一度嚎哭。
日內返港簽字
據知，連日來對婚變隻字不提的霆鋒，已搵好律師搞掂文件，待栢芝 6月 6日拍完電影後，返港簽字離婚。而霆鋒在大馬拍戲期間，亦曾與經理人公司商討，怎樣公布離婚消息。
即將失婚的栢芝，心情跌落谷底。身為女主角的她，早前甩底電影《愛人影子》發布會，飛到台灣找好友大 S（徐熙媛）度生日散心，最終辣㷫監製關錦鵬。周一（ 5月 30日），栢芝被逼趕返劇組開工，心情極差的她，在台灣機場躁狂鬧記者後，連日來在深圳開工，顯得無厘神氣，生人勿近。
兩個月前，栢芝以個人名義，豪擲 1.28億元，購入世紀大廈頂層連天台單位。
栢芝 5月 22日就帶埋 Lucas過台灣旅行，與一班好友食飯慶祝 31歲生日兼散心。
片場失控嚎哭
周三（ 6月 1日），栢芝與男主角權相佑在沙灘拍攝一場談情戲，埋位時栢芝冧爆與對方談情，但戲外情緒卻起伏不定。有工作人員爆料話，婚變影響令栢芝無心工作︰「導演潘源良都體諒佢嘅心情，好多唔見樣及唔使唸台詞嘅戲，都已經安排咗替身拍攝。不過因為栢芝之前多次請假，已經拖冧晒成個進度，主角權相佑月尾又要拍另一部戲，依家好趕，栢芝壓力好大，試過拍完一場嗌交戲之後，突然坐埋一邊係咁喊，要等佢情緒再平伏番至可以繼續拍下一場。」
借半億炒樓
4月 22日金像獎頒獎禮當晚，霆鋒摘下金像影帝，栢芝熱情送吻，影帝影后交足戲。
冰凍三尺，非一日之寒！鋒芝鬧離婚前，其實吵大鑊已經是家常便飯。不過，據知霆鋒今次去意已決是因為對老婆心死。四年多以來，栢芝每次激嬲霆鋒，都會搶先發難，務求先發制人。如果霆鋒企硬唔屈服，佢就要生要死，藉此令老公心軟。
其實霆鋒一向對老婆好疏爽，結婚初期所有資產俾老婆管，但栢芝娘家個個都靠她接濟。家人一時開酒吧，一時又開火鍋店，真係多多錢都唔夠，霆鋒當然唔想血汗錢俾人哋亂 fing，他想為兩個仔儲多啲基金，又想送物業給他們。
據知，年初霆鋒都與栢芝商量過，想買一層過千萬的樓俾 Lucas，栢芝就極力反對，話個仔仲細，豈料一個屈尾十就攞啲錢去炒豪宅。佢問霆鋒攞成 5千萬俾訂金，霆鋒當然沒有立刻應承，栢芝咪軟硬兼施，冧唔掂就發爛渣。「霆鋒已經忍咗好耐，佢都有同人呻，啲錢俾栢芝逐啲逐啲陰乾，依家都分唔清，究竟老婆鍾意佢定鍾意錢多啲。霆鋒好心淡，打算搞離婚囉，自己仲搬咗去四季酒店住。」知情人士說。
近日，有傳栢芝因為炒 1.2億豪宅世紀大廈借財務半億，適逢霆鋒又向栢芝閂水喉，她大吵大鬧卻不得要領，竟 send SMS俾霆鋒，揚言「我會同兩個仔消失，你一定會後悔」。
知情者說︰「霆鋒收到 SMS嗰晚，成班 friend咁啱都喺度，我哋見到霆鋒睇完個 SMS之後，好㷫咁將個電話掟落梳化度。初時大家都好驚，唔敢開口問，見佢臨走冇攞電話至幫佢執番，見到 SMS個內容，有人話今次唔係第一次。」抱仔出露台
其實，以往栢芝要生要死對霆鋒是萬試萬靈。當年淫照事件發生後，霆鋒與栢芝冷戰， 08年 4月霆鋒要去泰國拍《風雲 II》，栢芝竟然帶埋囝囝 Lucas去泰國箍煲。知情者話︰「栢芝到嗰日，霆鋒出咗去拍外景，夜晚成 9點幾至返到酒店。霆鋒本來約咗幾個工作人員返房玩啤牌，佢一入到房見到老婆嚟咗好錯愕，栢芝二話不說抱住 Lucas跪喺霆鋒面前喊晒話，如果霆鋒唔原諒佢，就寧願死，仲抱埋個仔走出露台度，嚇到霆鋒即刻攬實佢。」
栢芝近年每次大吵大鬧後，都要霆鋒將物業轉名給她，栢芝更吼實霆鋒近年最賺錢的電視後期製作公司。
栢芝之所以要一鋪清霆鋒袋，並非全因為錢。據知近年與霆鋒關係時好時壞的栢芝，得母親教路，着她要留住老公的心，先要操控老公財政，這樣就不怕霆鋒起飛腳。可惜的是栢芝箍得太緊，令霆鋒透不過氣。「栢芝盯得霆鋒好實，霆鋒惟有打機發洩，試過一打打足廿四小時，栢芝又唔高興，嫌霆鋒掛住打 online game唔理老婆同個仔。」
霆鋒攞影帝時，在台上明寸老竇，之後在灣仔海都搞慶功宴，更未有邀請四哥，不過四哥咁啱在灣仔食飯，識做嘅栢芝即刻 call埋老爺一齊慶祝，難怪甚得老爺歡心！
拉姑緊張撫養權
霆鋒多次強調唔想兒子入娛樂圈，但栢芝卻樂此不疲帶 Lucas出席公開活動。去年 6月，栢芝帶埋 Lucas到上海出席國際電影節會星爺。
婚變消息傳出後，栢芝曾放風話自己有了第三胎，連日來又不斷打電話給四哥謝賢訴苦，四哥亦因為企硬撐新抱，令他與拉姑起爭執。
知情者說︰「四哥聽到栢芝哭訴，即刻打電話俾拉姑，怪佢暗中同外人透露家事，小事化大。四哥無非都係為咗兩個孫，唔想霆鋒步佢後塵。至於喺拉姑眼中，栢芝呢個新抱已經可有可無，佢最緊張兩粒孫仔，想個仔攞番撫養權。」咁又係，鋒芝離婚，即使霆鋒之前答應栢芝，將兒子的撫養權讓出，但若要打官司，福利官都會按照合適程度，去判決撫養權屬哪一方。拉姑今次做這場大龍鳳，認真用心良苦。拉姑四哥各有各撐
謝霆鋒與張栢芝鬧婚變，愈鬧愈熱烘烘，有指栢芝吸乾霆鋒 6億身家，事件引爆後，兩位當事人還未就此事作回應，相反二人的死黨則各自為好友撐腰，形成挺芝派和挺鋒派兩個派系。不過，亦有圈中好友希望他們能雨過天青，和好如初。
08年初發生淫照事件後，霆鋒曾與栢芝分房瞓兩星期。 4月霆鋒飛往泰國拍《風雲Ⅱ》時，栢芝竟帶埋 Lucas到當地箍煲。
陳冠希在台灣出席商場活動時，直認與栢芝空中會面，手機藏有兩人合照，更抵死地話：「再見栢芝很開心。」如今鋒芝搞到立立亂，周二陳竟然在微博寫句「 World is trouble」贈興，認真多得佢唔少。
挺芝派
謝賢栢芝係謝家之光
四哥所住的物業，查小欣大爆霆鋒已轉到栢芝名下。自事件發生後，四哥仍力挺栢芝，更說︰「栢芝呢個新抱好好，係我哋謝家之光！」
謝賢經常大讚栢芝係好新抱，今次兩人鬧離婚，四哥仍企栢芝嗰邊。
大 S唔覺栢芝困擾
「沒覺得栢芝受到困擾，那天一起過生日時，她很開心！」
小 S封嘴
「不方便就此事發表任何言論，只能說栢芝的確是到台灣和我們慶祝生日，你們放過我吧！不要讓朋友覺得我是大嘴巴。」
黑人陳建州讓他們解決
「愈扯愈遠，讓他們好好解決吧！兩人或許還有很好的未來，其他人還是不要多做評論。」
葉佩雯不要傷害她
「請大家不要再胡扯！不要傷害她！」以示支持。挺鋒派
拉姑嬲爆拒回應
06年，霆鋒先斬後奏娶栢芝做老婆，拉姑對栢芝已有心結，兩人婆媳關係一向麻麻。上月 8日發生陳冠希機艙合照事件後，被記者問及此事時，她黑面說唔回應。
日前，記者在中環撞見拉姑時，她十問九唔應，鬍鬚 Kong更喝令記者：「唔好影呀！」
查小欣一鋪清霆鋒袋
睇住霆鋒大的查小欣，本周一（ 30日）在節目中，寸爆栢芝昔日如何愛霆鋒，如今變得很陌生，更狠下判語，指栢芝不斷吞食霆鋒的資產︰「好似栢芝要一鋪清霆鋒嘅袋。」
謝婷婷爆 Lucas逃學
「我真係唔係好清楚 Lucas有冇逃學，我成日晏晝喺媽咪屋企見到佢，返學好重要……如果困到五、六歲至去學同人相處，咁就好遲！」中立派
古天樂俾空間佢哋
「身為外人、同行，我覺得唔好俾太多意見，都係俾多啲時間同自由佢哋啦！唔好俾佢哋太大壓力。」
徐濠縈夫妻總會吵架
「依家同佢哋好少聯絡，希望佢哋冇事啦！希望雨過天青，因為每對夫妻總會吵架，摩擦過後最緊要之後冇事，如果大家都認定咗對方嘅話。」
梁漢文最緊要認低威
「影張相就分開咁兒戲，希望唔係真，希望佢哋開開心心。夫妻間少少爭拗一定有，最緊要係有一方認低威，萬事有商量，希望佢哋冇事啦！」
楊千嬅希望和好如初
「外人好難對感情事作出評論，尤其係兩人都係藝人，各方面都好受注目。如果件事係真，就希望佢哋和好如初，唔好鬧情緒。」
網友撐霆鋒離婚
栢芝和霆鋒婚姻告急，消息傳遍整個娛樂圈，連帶亦成多個網上討論區的熱門新聞。絕大部分網友認為，任性栢芝竟然主動在機艙與陳冠希合照，激怒霆鋒絕對咎由自取，唔少人更支持霆鋒今次要振夫綱與栢芝離婚。不過亦有網友話一家唔知一家事，寧教人打仔莫教人分妻。
蛀米外家散二千萬
栢芝出名顧家，外家隻隻大食懶等住養，和霆鋒結婚以來，多次傳她瞞着老公瞓身貼外家，五年來大大話話貼了二千萬，此亦是間接促成霆鋒和栢芝家嘈屋閉的導火線。
栢芝媽吸八百萬
去年在西環開酒樓的栢芝媽，據知是栢芝擲二百萬給她投資。另外栢芝會定期給母親五十萬做家用，多年來已吸去孝順女八百萬私己。
老竇鬍鬚勇舔五百萬
自嫁霆鋒後，栢芝表面上疏遠外家，尤其老竇鬍鬚勇更鮮有蒲頭，不過栢芝為令老竇東山再起，私底下出資五百萬打本給老竇在國內開設娛樂公司。
細佬豪龍食三百萬
一向傍實家姐左右的豪龍， 08年開設滑水學校及俱樂部，加埋購自外國的十多萬滑水器材，足足使咗家姐接近三百萬。
細佬栢文 fing四百萬
早前和女友 Fiona到歐洲影結婚相的栢文，豪使豪買花掉家姐數十萬。栢文得寵時，栢芝更買了一架價值三百萬的白色法拉利送給他。不過有指栢芝早前託栢文以二百萬買入一架二手 Bentley時，得悉有人從中食差價幾十萬，其後栢文揸這架跑車時，發生意外報銷，激到栢芝紥紥跳，更將細佬打入「冷宮」。
没有评论:
发表评论