沽軍作戰 一鼓作氣破萬七
2011年10月04日
市跌瘋了 股民輸到麻木了【本報訊】港股跌瘋了，恒指失守萬七關，全城淆底！恒指第 4季首個交易日埋單大跌 770點（ 4.38%），收報 16822點，主板成交 763億元。投資者爭相掟貨，面對大跌市，豈只散戶損手閉翳，基金一樣輸到眼坦坦。
股民寧過大海 唔肯撈底
大市昨日屍骸遍野，投資者要錢唔要貨鬥快掟貨套現，逾 1700隻股份中，逾 1100隻股份下跌， 568隻股份創 1年新低， 223隻股份跌幅一成以上，當中不乏散戶基金愛股，當中以濠賭、零售等板塊最傷。博反彈的散戶一再陪葬，昨日共有 53隻牛證被強制收回。港股市值跌至 15.4萬億元，為 09年 9月以來兩年多新低。
藍籌中，除煤氣（ 003）、電能（ 006）、太古（ 019）及思捷（ 330）力保不失，大部份均遭重創， 19隻藍籌挫逾半成，其中平保（ 2318）、華潤置地（ 1109）及中國海外（ 688）瀉逾一成，是表現最差 3藍籌。
港股未止瀉，經紀鄭先生坦言，「歐洲問題實搞唔掂，雖然德國勤力，但希臘、意大利大食懶，傾唔埋實會爆煲，一爆煲就會拖累美國，跟住全世界都無得走。個市實仲有得跌，只係睇唔到會跌幾多，所以而家無人敢買，得個睇字，好多人等撈貨，咪可能等 40幾蚊時執和黃。」
一位紅衫女士亦在街頭哭股喪，「而家聽到投資已怕怕，早前曾經大額損手，蝕咗成幾千萬，都唔知係咪俾人呃。好似嗰時話買賣黃金，呢頭入咗錢買，過幾日就話蝕晒，總之我唔識呢啲嘢，而家咩都唔會再買。」基金重傷 沽得就沽
基金一樣輸到怕怕，一本地對冲基金經理坦言，近兩個月損傷慘重，跟不少行家一樣已經沽得就沽，現在手上只有約兩成股票持倉，並不是味兒說：「家個市閒閒地跌六七百點，跌一成股份通街都係，跌半成股票已算跑贏大市！」大行亦睇淡後市，瑞銀財富管理研究部亞太區主管浦永灝稱，外圍形勢未明朗，後市估計仍有 10%至 20%下跌空間。德銀策略員同意，全球金融市場面臨最大風險將是歐洲，若歐洲不推出穩定措施，市場將繼續潛行。
波動市況下，證監會亦提醒投資者，在參與槓桿或孖展交易時，中介人無責任發出追繳保證金通知，投資者可能被強行平倉。
最壞情況仍未出現
海通國際中國業務部副總裁郭家耀表示，外圍存在多項不明朗變數，現在市場更開始憂慮中國經濟硬着陸，大市反彈動力欠奉，機構投資者寧持現金，料洗倉潮持續，恒指若下試 16000關口不感意外。富昌證券研究部總監連敬涵估計，恒指周內隨時見 16000點，該水平會有較明顯支持，惟內地信貸問題剛浮面，最壞的情況仍未出現，港股難言見底。
歐美股市昨晚早段偏軟，主要藍籌在美國預託證券（ ADR）反覆。《散戶心情》
嫌錢腥先會入市
經紀張先生
「 23000點時已經睇淡，家基本上走晒貨。個世界咁多炸彈，始終會爆一個半個，嫌錢腥先會入市。家係等佢爆咗之後，個市又掟到阿媽都唔認得時，先再玩過都唔遲，暫時惟有等小反彈就沽期指，因為實有錢賺。」蝕晒海嘯後賺幅
市民黃先生
「工作關係唔方便買港股，本身有投資基金，但股市係咁跌，已經蝕咗好多，都唔知應該點做，惟有睇定啲先……蝕嘅程度係講緊海嘯至今 2至 3年累積嘅賺幅，喺一個多月內化為烏有之餘，仲要倒蝕，過去 3個月已經冇買貨。暫時睇到 11月，唔得嘅就全部撤退。」《基金意見》
萬六水平分注買
英業環球資產管理董事總經理陳炳強
「基本因素衰梗㗎啦……落到呢個水平，比較多傾向 take profit，睇好嘅投資者唔多，空倉補完無真正買盤嘅話，反彈比較細。萬六如果守得住，反彈上去係萬九又頂住㗎啦……有現金嘅，萬六水平可以買，但買一部份啦，分開入。」估唔到個底喺邊
豐盛金融資產管理董事黃國英
「正路策略應該等好轉先買都唔遲嘅，因為你估極都唔知個底喺邊嘅，譬如今日（周一）的濠賭股。」至於目前是否值得中線買入持有股份？「家已經好瓜得啦嘛。睇估值無乜意思嘅，因為有好多 revision（調整預測）嘅機會嘛， revision可以好低……。」
蘋果日報 - 20111004 - 沽軍作戰 一鼓作氣破萬七市跌瘋了 股民輸到麻木了
人心虛怯
75%散戶擔心未見底
2011年10月04日 港股跌不休，適逢傳統十月股災月，大市甫失守萬八，昨再失守萬七支持，本報以電話，成功向 194位市民進行問卷調查，結果發現普遍市民對後市極為悲觀。
超過 75%受訪者認為大市尚未見底，起碼跌至萬五點樓下，更有接近兩成估計要跌至一萬點，只有四分之一受訪者認為股市已經見底。
24%以後唔掂股票
至於後市如何部署，六成訪者現階段會按兵不動， 24%受訪者更輸到怕，揚言以後「唔掂股票」，只有 16%死士無懼股災，會撈底博反彈。
豐盛金融資產管理董事黃國英昨日充當死士撈底，「濠賭我就博咗，臨收市先買入澳博（ 880）。」他補充，「要博但要適可而止，買一個你唔會肉痛，或者你守得到嘅水位，如果你守唔到嘅話，恐慌性買入咪盞痛死，因為聽日（今日）可以仲恐慌，變咗你加入恐慌行列，所以 make sure你唔好加入恐慌行列。」
股災令打工仔強積金戶口大縮水，不過市民卻懶理，超過七成受訪者未有改變投資組合，只有兩成選擇轉為保守基金打穩陣波。
俗稱港股恐慌指數的恒指波幅指數拾級向上，連升第三日報 44水平，是 8月 9日以來最高，反映恐慌情緒持續升溫。
告別強勢
賭股 1日輸晒 1季收入
2011年10月04日 濠賭股玩完！去年至今一直強勢的濠賭股，終於遭到基金「毒手」慘遭洗倉，六隻濠賭股最低消費跌一成（見表），當中最慘烈的是澳博控股（ 880），跌幅高達 25%，收報 10.50元。
6股份單日蒸發 700億
澳博連同其餘五隻濠賭股，昨日市值共蒸發 700億元，相當於一季澳門所有賭場收入總和。
一個月前，濠賭股價仍有近倍升幅，可惜截至昨日，六隻賭股只有銀河娛樂（ 027）尚有 7%升幅，表現最差為今年上市的美高梅（ 2282），昨暴瀉逾兩成報 8.21元，較上市價 15.34元，潛水 46%。由高位計，所有賭股已五折出售，銀娛 8月曾見 22元，昨日失守 10元關口，報 9.42元，跌 19%；金沙中國（ 1928）及永利澳門（ 1128）分別跌 14%及 11%，算是整個版塊中跌得最少。
上月博彩收入料跌 10%
今年以來澳門博彩收益屢創新高， 8月份博彩收益創紀錄升至 247.69億澳門元（約 240.48億港元），按年升 57%。惟市況逆轉，加上內地信貸緊張恐影響客源，盛傳 9月份博彩收益差強人意，收入只有約 220億元左右，按月倒退逾一成，消息拖累濠賭股下挫，更連澳門政府慣常於月初首個工作天下午公佈的官方數字，亦遲遲未於網站上發表。
官方數字遲遲未出，更令澳門博彩收益倒退的傳聞不脛而走。然而，大行仍憧憬十．一黃金周利好濠賭股。
摩根大通指，該行調查顯示客量未因償付及流動性問題而放緩，十月黃金周是強勁流量增長的開端，認為濠賭股急跌提供入市時機，首選金沙
没有评论:
发表评论