蘋果日報 - 20120117 - 去年每箱賣$16.7萬 今年$10萬有找經濟不景 紅酒炒家收手 天價 Lafite爆煲

 

去年每箱賣$16.7萬　今年$10萬有找
經濟不景　紅酒炒家收手　天價 Lafite爆煲

2012年01月17日

【本報訊】懂得紅酒的人，應該知道法國五大酒莊屬全球最貴紅酒之一，當中尤以 Lafite名氣最響。但這位法國波爾多王者（ Chateau Lafite Rothschild）跌落凡間，當中 08年的 Lafite一年間價格暴瀉超過四成，買咗分分鐘慘過炒港股，受累環球經濟不景氣，全球紅酒價格一樣跌，跌幅逾兩成。
記者：陳皓怡、黃玉麗

Lafite大冧價　龍豬大鑊鳥

近年內地同胞熱捧的 82年 Lafite，其王位岌岌可危。去年中本港一個紅酒拍賣會上，一箱 12支 Lafite紅酒賣 70萬元，每支平均近 6萬元，現時毋須 50萬元一箱就有交易，跌幅約 33%。不過若計跌勢最急的，可算是 08年 Lafite。權威葡萄酒雜誌《 Decanter》新近一篇文章指， 08年 Lafite由去年 1月每箱 16.7萬元，跌至本月的每箱 9.65萬元，跌幅 42%，成為大輸家。

去年港拍賣會現流拍

 

紅酒與港股、樓市沒有分別， Lafite強大購買力有賴同胞。資料顯示，內地過去 10年 Lafite價格走勢每年竟有三成漲幅，跑贏同儕，而 08年 Lafite更出現嚴重泡沫，「呢支酒酒莊擺咗個中國八字喺樽面度，其後由 120歐元升至 1,400幾歐元，升近 12倍，支酒質素非常好，但就炒得過熱，故升得越快跌得更快」。香港最大葡萄酒入口商之一的大亞洋酒，其創辦人龐建貽解釋，該款 Lafite每支都印有一個紅色浮雕的中國數目字「八」，由於「八」和「發」有諧音，令 08年 Lafite酒價暴漲。
至於一般紅酒均呈跌勢，在紅酒市場最具指標性的 Liv-ex Fine Wine 100指數，早於半年前已預示高級紅酒銷情的跌勢，指數於去年 6月升至 99年指數成立以來的歷史高位，高見 364.69，其後拾級而下， 12月底已跌至 286.33，創年半以來新低，由高位挫兩成。
而紅酒拍賣亦於去年底響起警號，去年 10月本港一個大型的紅酒拍賣會中，出現流拍， 821個拍賣品之中有 59個流拍。
Vinum Fine Wines助理銷售經理吳丹表示，整體紅酒銷售及價格下跌了兩成，當中 Lafite跌價兩至三成，「三個月有四個拍賣會，所以客人會少了」。另外，國內同胞亦轉戰其他酒類，餐廳 Bo Innovation品酒師吳達銘稱，「國內人鍾意試新嘢，又重口味，現時的人都好鍾意飲威士忌 XO，以軒尼詩 XO為例，自去年 10月，市面上 1,300至 1,400港元一支，現時短短三個月已升至 2,000至 2,400元，翻了個 Double」。

中央收緊銀根即跌價

 

近年投資紅酒利潤高，今次紅酒冧價無疑令好多酒花投資者損手，受到內地上半年銀根放鬆影響，資金充裕下令紅酒價格升得急，但中央下半年閂水喉，令高級紅酒跌勢加快。「投資紅酒都好受外圍的經濟影響，同股市樓市都一樣，上年頭三季都有增長，最後一季需求回軟加速跌勢，大家都有心理準備升得咁快都會回落」。紅酒回歸基本都是視乎供求的問題，故紅酒價格能否重現升浪，視乎環球經濟能否改善。
至於波爾多五大酒莊是否明日黃花？龐建貽指現時還言之尚早，「 Lafite以外，其他四大酒莊都有一定嘅捧場客，之前冇炒賣得咁嚴重，對於買家嚟講，酒佢哋都會繼續去飲」。

特稿
「跌吓先值得入貨」

2012年01月17日

紅酒冧價，專攻名酒的投資者最痛，但對消費者來說，絕對是好消息，尤其是要大批入貨的食肆。阿一海景飯店老闆兼名廚楊貫一深深感受到紅酒跌勢，「紅酒點止跌咗四成，跌咗一半都有，之前炒得太高，好似炒樓咁炒高晒，炒到十幾萬一支靚紅酒都有，仲搞到大陸出好多假酒，上海有六、七成紅酒都係假嘅」。

空樽都賣三千元

據了解，去年最熱炒時，一支 82年 Lafite的空樽一度賣至 3,000元人民幣，專門製作假 Lafite瓶塞的商人去年亦賣出 70多萬個瓶塞，隨着今年 Lafite價格越跌越有，現時該名商人一個定單也沒有。
楊貫一指早前紅酒價格升，批發商坐地起價，令紅酒升幅更急，現時有不少食客眼見紅酒升幅厲害，轉飲白蘭地。
紅酒用家亦對紅酒跌價一致讚好，名模琦琦指紅酒價跌是一件好事：「同股市一樣，跌吓先值得入貨，紅酒價錢之前炒得太貴，唔跌吓價，中產永遠冇機會欣賞靚酒。」
藝人溫碧霞指紅酒本身是奢侈品，現時經濟差，跌價亦相當合理，「鍾意飲紅酒嘅人就開心啲囉，便宜好多，朋友送畀我嘅紅酒都未飲晒，況且我唔係飲好多」。
《蘋果》記者