只是过客: 忽然1周 - 865 - 媽咪姐手帳人生總要豪一次

大家睇我點發威。（設計對白）
25歲嘅林書豪一仗功成，由年薪 76萬美金暴跳至 592萬美金，更入住豪宅，身價聲價幾級跳。

媽咪姐手帳

人生總要豪一次
2012年02月24日
揭開近日報紙，媽咪姐對香港政府愈來愈有「信心」。眼見唐太「我要挖好呢個窿」，打造媲美秦始皇地下皇陵嘅魄力，何其值得欽佩。再望望唐唐，跟緋聞情人魚雁往返，字字情意綿綿。大佬呀，一份咁真摯嘅感情放喺面前，唔通等到失去先後悔莫及？感情缺失咪感情缺失囉，為女死為女亡為女俾人插到傻呢種情操，簡直比淨係識得喺旺角中心呼喚愛嘅港男港女，更真切動人。

姚明上年 7月宣布退役，不過早於 2010年，姚明與林書豪早有一面之緣。兩大球星歷史性握手，象徵新舊交替。

其實無腰骨無膊頭又如何？人為理想，真係乜都做得出。好似近排為華人爭光嘅林書豪咁，自細夢想投身籃球界，就算俾阿媽阻止，被投閒置散都好，佢都冇放棄過。
區區一個美籍華人，喺充滿黑人嘅 NBA闖出一片天地，等同喺香港搵一撻冇強國人嘅地方一樣咁難。自從林書豪帶領紐約人 7連勝之後，被捧到上天嘅同時亦慘被抨擊，一時被個別傳媒以歧視字眼報道，一時被其他黑人運動員踩台。姑勿論日後林書豪成就如何，人生在世，總要學佢追尋理想豪一次，就算車毀人亡都係咁話。
林書豪挖深啲

嫲嫲湊大
1989年，年僅 1歲嘅林書豪被爸爸林繼明抱在懷中，同大哥（左一）、嫲嫲（右一）合照。當年林書豪出世，嫲嫲專程由台灣飛去美國湊孫，兩嫲孫感情非常好。

嶄露頭角
2006年， 16歲的林於校際籃球比賽贏得獎牌，為日後進入 NBA而鋪路。

闔家齊撐
媽媽吳信信曾阻止林書豪打籃球，認為打波冇前途。好彩囝囝為理想冇放棄，仲光宗耀祖成為 NBA首位台灣裔球星。

文武兼備
林書豪自小夢想成為籃球員，喺哈佛修讀經濟時亦有參加校隊。為咗合乎體能標準，佢更日日做 gym。

屢敗屢試
林書豪職業生涯中，多次被投閒置散，兩年多來都係打後備。不過近日狀態大勇，帶領紐約人連勝 7場，成為隊中王牌。相傳球隊主力安東尼誓要收復失地，不讓林書豪尊美。

豪放晒肌

身為運動員，林書豪嘅身形梗係嗒得杯落。佢喺自家嘅短片當中，不吝嗇分享做 gym秘技，更大晒靚肌。

家庭至上

林書豪係虔誠基督徒，平日唸聖經、打波之外，最鍾意陪屋企人，佢仲陪姪女填顏色（圖），相當乖乖仔。