同你吟一吟
王菲愈唱愈貴
2012年06月14日由 2010年尾開始復出個唱，王菲 嘅巡迴演唱會唱到而家都未唱完，最貴門票定價更不斷上升，由當初廣州叫價二千五百人仔，大家聽到已經 O晒嘴，之後長沙站加到三千人仔，成都站再加，好意頭三千九百九十九。
上個禮拜四（七日），王菲專登返香港，再同經理人陳家瑛飛鄭州開騷，開騷日期係六月八號同九號，天后唔單止肯提早兩日出發彩排，一到 埗，更同當地粉絲埋身大合照。
Cool爆王菲難得親民，唔知係咪同佢再創演唱會貴飛紀錄有關，因為鄭州站超級 VIP票價高見四千六百八十人仔，相等於五千七百幾蚊港紙。當日香港歌迷可以九百八十蚊睇到王菲，真係抵到爛！
王菲經香港出發去鄭州，坐接駁巴士出跑道上機，王菲 cool到爆，但到埗一見到鄭州 fans，即時開心晒！
你冇眼花，鄭州站最貴飛要賣四千六百八十人仔，王菲一落機就去彩排，特別認真。
撰文：八珍
没有评论:
发表评论