蘋果日報-嘆世界地方 - 左丁山 Toulouse

最近有機會到法國西南部大城市圖盧茲（Toulouse）一行，覺得當地和平寧靜，生活優遊，雖則市容平平，畢竟歷史長遠，如有時間，不失為渡假好地方，但對愛好追尋熱鬧興奮之香港遊客，不太適合。想唔到返嚟之後，當地就發生懷疑有神經病之男子漢在銀行打劫，脅持人質事件，神經漢仲自稱係蓋爾達分子，幾嚇人，咁表面和平之地方，本與世無爭，都發生如此暴力行動，天下之大，搵塊真正樂土怕都幾難。
到圖盧茲，原來最有歷史，最吸引遊客之熱點，就係位於市外一小時車程之Carcassonne附近之古堡，歷史上曾有過一場大戰，來到古堡之前，我地乘坐之旅遊巴士去到一間古式古香之酒店吃午餐，酒店叫做Le Domaine d'Auriac，內有24間客房，兩間餐廳，一個十八洞高爾夫球場，還有游泳池、網球場，佔地廣闊，係一個適合闔家渡假嘅好地方，特別係對高爾夫球發燒友而言。左丁山唔打高爾夫，唔打網球，但見花園內鳥語花香，古樹參天，在有三百年歷史嘅花園坐在木椅上飲杯雞尾酒，成個人鬆弛晒，郁都唔想郁，諗下我地香港邊度有呢啲好地方吖。
尤其美妙者，就係餐廳就在花園之前，環境寧靜到極，陽台上有三枱法國白人吃飯，舉杯言歡，我地在餐廳內晉餐，成個月可能就係我地班人第一次為此地帶來活力歡笑聲（雖然各人談話盡量壓低聲音，但已經嘈過人）！上菜甚慢噃，睇吓錶，個幾鐘頭都未食完，有人問導遊：「幾時去古堡？」導遊話：「食餐起碼兩小時，慢慢都未遲！」
只怪我地香港人太講效率，做事心急，來到如此美境，竟然都想趕住走，以免浪費時間，罪過，罪過，他日真正有空，應該來此Relais & Chateaux酒店住番一個星期，先至有味道。圖盧茲雖然係歐洲航天工業中心，Airbus總部所在地，但呢啲地方並非搵銀城市，最好就係在香港搵到銀，來此嘆世界。