蘋果日報- 不停電非佳兆 - 左丁山

昨日本欄講「出口死火」，交稿之後就睇到報紙報導溫家寶親到廣東視察，傳出口諭：「千方百計保外需」，可見廣東廠商（港企及民企）面對極嚴峻外需疲弱嘅局面，內需就話可以透過中央政策（例如家電下鄉）嚟刺激啫，外需由歐美日東南亞市場作主導，中國如何可以主動保持得到？除非放手推低人民幣，要人民幣貶值，但如此一來，就等同與美歐日打一場貿易戰，適值美國總統大選之年，奧巴馬與羅姆尼一定會向中國抽水，呢個時候絕非talk down（唱低）人民幣滙值嘅時機。唯一會做嘅，就係唔俾人民幣升值，人民幣易跌難升，日日兌換二萬元人民幣者，可暫時休息。

東莞工廠廠長S回港與朋友飲茶、打麻將，輕鬆番一個周末，佢話橫掂工廠開工不足，呢排佢收唔到政府指示「開三停四」、「開四停三」之類嘅通知，大暑期間，往年電廠一定供電不足，要輪流分區停電，但今年居然收唔到停電指示，是否東莞發電突然間追上香港中電港燈之優越水平，全年不停電？廠長S話：「非也，只因工廠經常自動休息，用電需求比去年大降而已。」顧問T在大連，廠長S在東莞，同樣話訂單不足，部份生產綫停擺，唔怪得溫總要僕僕風塵全國周圍撲，哈爾濱大橋號稱奇蹟，百年大橋，啟用三百日就倒塌，你估溫總知道後，氣唔氣咳？十八大前夕全國經濟步入多事之秋，都係政治要緊，管理香港咁小事，咪留番俾梁振英先生呢位能者囉，千祈唔好煩親北京領導人呀。不少資深評論人、資深記者、新人記者在特首競選時因唐唐僭建，曾大罵唐唐無能、無誠信，連佢嘅公關團隊人員都俾記者私底下鬧埋一份：「你地做乜要幫唐唐做嘢？」哦，梁先生在大部份傳媒吹捧下，成為一個做得嘢，比較老實，有工作能力嘅人，得咗嘞。點知上任兩個月，同一批人好似突然間發覺咗發現咗，梁先生有偽術無藝術咁，大驚小怪之餘，痛罵之，可謂淺薄之至。反而競選時左丁山批梁挺唐，依家反而覺得冇乜大壞，早已在三月二十五日前預料得到，既然佢已經上咗台，又知佢無大號召力咯，大家既然同坐香港一條船，唔想香港衰多五年，遺禍下一代嘅經濟福利，可以鬧佢少啲，睇埋下年度財政預算案先啦。