蘋果日報- 爽人物：鬼咁鍾意粵劇

爽人物：鬼咁鍾意粵劇

麥俊文（John Clifford），22歲，美籍愛爾蘭人，超級粵劇迷，精通各類胡琴，為讀懂戲寶勤學中文，寫得一手秀麗方塊字，留美期間，曾參與麻省理工華樂團演出。今年9月，他隻身離開波士頓，來港拜師學藝，成為演藝學院首名非華裔中國戲曲課程學生，並為粵劇《再世紅梅記》任樂師，負責竹提琴伴奏。且聽這名紅鬚綠眼、卻矢志弘揚中國傳統戲曲的正宗番書仔怎麼說。


「喺香港學粵劇一直係我心願。好多人問我，你咁鍾意粵劇，點解唔去內地學？好多人有所不知，香港係亞洲保留最傳統粵劇嘅地方。內地為咗取悅觀眾，粵曲早已交響樂化。最傳統嘅粵劇，應隨樂師同演員嘅情緒而變化，容許即興演出；二弦琴同竹提琴係最古老嘅胡琴，但好多人以為，呢個世界只有二胡。


中國戲曲特有嘅傳統正一點一滴消失。但好多華人都覺得唔重要！我喺美國波士頓成長，自小同中國人好有緣份，小學時代，我最好嘅朋友嚟自長沙，佢教我講國語。11歲嗰年中秋節，我哋去咗唐人街湊熱鬧。同歐美好多城市一樣，好多歌手喺街頭獻唱，不過唱嘅唔係流行曲、唔係古典音樂，而係粵曲！

隻身從波士頓來港學藝的John，矢志弘揚中國傳統戲曲。黃耀興攝

盼將來教戲曲
我好細個就學小提琴，但嗰次係我第一次見到中國胡琴。兩條弦，同小提琴嘅結構差不多，但聲音完全唔同。其他同行嘅朋友覺得好難聽，但我就好震撼，時哀怨時激昂，恍似發現另一世界。同年聖誕，我要求媽媽買個二胡畀我做禮物，又上YouTube自學拉二胡，仲向學咗多年嘅小提琴講咗聲拜拜。


自學唔夠，膽粗粗去唐人街樂社拜師，好多樂手唔識英文，我識少少國語，手口並用。中學時人哋副修西班牙文、意大利文，我就學中文，方便睇曲詞。師傅見到我唔係三分鐘熱度，手把手教授；有朋友喺MIT（麻省理工）讀書，又介紹我去華樂團，認識到香港有個紅線女、有個粵劇諧星叫盧啟光。


家逢周一至六，我喺學院上堂；周日就跟老師以單對單形式改善技術。希望將來可以一邊做樂手、一邊喺學院教戲曲。雖然好多人都話，一個外國人教中國戲曲係咪好古怪？粵曲都冇人聽啦，仲學嚟做咩？但我就話，呢啲都唔重要，你熱愛啲咩，就要堅持，係咪？」


記者：呂麗嬋

粵劇是John的最愛。

父親大力支持「特殊愛好」
對於粵劇，身為「老外」的John絕對癡迷。手執的，是沒有幾多個香港人見過的粵劇雜誌，隨身的ipod，曲目不是《白蛇傳》，就是《昭君出塞》。粵劇式微，他比好多香港人更心急。「我有三個細佬妹，係大哥，佢哋都學大提琴小提琴，只有我熱衷戲曲」。爸爸在Boston College教書，對於兒子的「特殊愛好」，John說爸爸不單從不反對，還大力支持。


「我哋成日傾偈，佢同我講，鍾意做咩，要勇往直前。好多人讀到大學，都仲未知想點，起碼我搵到自己嘅路向，知道自己想過乜?生活」。說得一口流利廣東話的John，對於美國各大院校的戲曲教席朗朗上口。這個小伙子，不簡單。

上一則: 小南國醉雞含沙門氏菌

下一則: 爽通識：中秋節與文化單一化

发自我的 iPad