蘋果日報- 倫敦名廚獻藝 - 左丁山

倫敦名廚獻藝 - 左丁山

馬圈女強人Ｓ搵左丁山食午飯，約在82，呢間米芝蓮三星意大利餐廳勝在仍可以訂到位，唔駛在門口排長龍，你知啦香港啲餐廳一經米芝蓮品題，聲價十倍，豈止本地人幫襯，老外食家都聞風而至㗎嗎。好似前星期《金融時報》周末隨報付送一本極高檔雜誌How to Spend It，就有三頁紙食經，英國食評專家按米芝蓮最新「星級」情報，到旺角「添好運」（排隊四小時），銅鑼灣何洪記，還有其他兩間試菜，讚不絕口，文章可作為「食經學英文」嘅示範本。排長龍輪候入餐廳，一定冇左丁山份，還好女強人Ｓ係82熟客仔，訂枱有面子，在此吃飯係一種享受。


潮流興意大利餐廳，太古廣場間Domani雖然未有星，其實食物相當撚手。據悉一位倫敦星級廚師Jacob Kenedy（倫敦蘇豪區Gelupo餐廳之老闆及大廚），會帶埋二廚來港獻技，十月十五、十六、十八、十九、二十、二十一共六日在Domani主理廚政。消閒雜誌及旅遊聖經Time Out曾大讚呢位廚師，指出2012年在倫敦之第一項必做事件（所謂things to do）就係到Gelupo食一餐，不過呢個禮拜啦喎，Kenedy人在香港Domani，各位去倫敦就可以搵過其他星級餐廳咯。佢來頭咁猛，搞到左丁山心郁郁想訂位一試，睇吓猛龍過江夠唔夠地頭蟲82咁食力先。


左丁山掛住食，女強人Ｓ就猛咁講馬，驚住左丁山唔識，其實識識地嘅，不過自己係老馬迷，對一啲新科技，新作風追唔上潮流就真。女強人Ｓ話跑馬地馬場今季有專為80後馬迷而設嘅酒吧Adrenaline，公眾人士可以訂位，內設全世界最先進最新潮嘅多點觸式IBU，透過指尖，就可以全面瀏覽所有賽事資料，現場有爵士樂隊演奏，極適合年輕馬迷嘅需求，邊傾偈邊飲（未必一定飲酒）邊小注怡情，氣氛絕對輕鬆，應該係好掂嘅。不過左丁山鍾意坐低刨馬經，呢啲場合都係叫肥仔Ｋ與佢班同學去嘞。現時快活谷馬場逢星期三夜馬都人山人海，公眾棚有大量外國男女入場，氣氛熱烈到極，乜唔係唧，飲啤酒十蚊一杯，平過蘭桂坊多多聲，已成為外國男女必到之地，本地青年男女都唔執輸啫！