蘋果日報- 蘋機會：Win8爆熱 筆電轉型

蘋機會：Win8爆熱　筆電轉型

玩轉Win8　筆電識變形

都話Win8呢期爆Hit，新機真係一浪接一浪，個個牌子都搶住出。Win8嘅Tablet加傳統桌面的雙重介面設計，除了方便用家使用，更激發起一眾廠家嘅創意，平時點變都變唔出花臣嘅筆電，一下子部部都玩「大轉型」，好似Dell呢部XPS 12就玩轉芒，外表明明係部Ultrabook，一轉即變Tablet，破格兼有型！

記者：韓繼聰　攝影：劉永發

模特兒：Cherry@Unique Model

一體雙機 轉芒變身

Win8嘅變形筆電，唔少都係玩合體分體，或者係滑蓋式變形，但好似Dell呢部「旋轉式」轉芒變身，真係算獨特異類。Dell XPS 12的屏幕設計特別，可於面蓋邊框內自由轉動，正常向內轉係Ultrabook，反轉蓋上即變Tablet。實際試變，過程非常簡單快捷，就算企喺度一手攞機一手變，都無乜難度，外表睇落有啲「化學」嘅設計，玩起來感覺亦相當紮實。不過，話就話可以變身Tablet，但話晒佢實際上都係部Ultrabook，無論點樣輕量化，重量都同一般Tablet有距離。XPS 12重1.52kg、厚15mm，以Tablet做標準當然屬重量級，變身後攞上手玩一陣係過癮嘅，但想好似iPad咁長時間放在手上篤篤篤，都真係幾累㗎！

■轉得嘅芒，睇落「化學」，但其實相當實淨，變身亦又快又方便。

■變身Tablet，其實有啲大亦有啲重，但用落都算方便。

■話晒都係Ultrabook，變成筆電形態始終最啱Feel。

■重1.52kg，厚15mm，輕定重，厚定薄，要睇你當佢係Tablet定筆電喇！

■屏幕設Windows Home鍵，方便變Tablet時使用。

碳纖加防刮玻璃

以Tablet來作準，XPS 12係重，但公平啲來睇，用番筆電做標準，佢其實算係相當輕。XPS 12外殼以機械加工鋁材及輕量化必備嘅碳纖打造，有型之餘亦耐磨耐熱。為配合Tablet功能，12.5吋輕觸屏幕特別以耐刮的康寧Gorilla玻璃打造，俾你篤得更放心。硬件方面，做得Ultrabook自然有一定標準，XPS 12高階版配備Intel Core i7、8GB RAM及256GB SSD硬碟，再加埋Intel HD4000顯示卡，雖然在場無得試，但相信無論係打機、睇戲、工作都難唔到佢，即使是標準版的i5、4GB RAM、128GB SSD都好夠用。另外，機身亦設有USB3.0及Mini Display插口，但就無記憶卡插位，有啲唔方便，不過要輕量就無計喇！

■屏幕以康寧Gorilla玻璃打造，堅固耐刮，1,920×1,080顯示亦清晰亮麗。

■機身以鋁金屬及碳纖打造，兼有類膚材質塗層，手感不俗。

■機側設USB3.0及Mini Display插口，但就無SD卡位。

■設有屏幕轉向Lock掣，方便Tablet形態使用。

■內置6 Cell電池，可連續使用六小時。

Dell XPS 12

售價：$11,999（i5、4GB RAM、128GB SSD）

$14,999（i7、8GB RAM、256GB SSD）

查詢：Dell（2969 3113）

其他變形新成員

Acer ICONIA W700　合體變

W700係以「合體」式變形，基本形態同一般Tablet無乜分別，11.6吋屏幕，只重950g，但內裏卻完全係一部電腦，Intel Core i5、4GB RAM、128GB SSD硬碟，行嘅亦係真正Win8唔係RT；不過香港行貨暫時只配備L形底座，12月先有連鍵盤嘅合體配件，所以未能「完全變形」，要變成筆電，暫時只能用藍芽或者USB鍵盤。

$7,388（i3、4GB RAM、64GB SSD）

$8,888（i5、4GB RAM、128GB SSD）

查詢：Acer（2520 2000）

東芝Satellite U920t　滑蓋變

與XPS 12一樣以連鍵盤Ultrabook設計，不過變形方式屬滑蓋式，變起來都算相當簡易，12.5吋屏幕，可作筆電、平板及180度平面顯示。重量只有1.45g，配備獨家Resolution+技術提升畫質；不過內涵同XPS 12標準版差不多，但就貴二千蚊！

■只要將屏幕平開，再水平滑動收納，即可變身Tablet。

$13,999（i5、4GB RAM、256GB SSD）

查詢：其士（2953 3555）

上一則: 遊搜好行：煙雨見楓情

下一則: 私駕路：驍勇白武士