走過浮華大地
炫富，其實都有技巧嘅。
TVB旅遊節目嗰種，咪低手囉。
第 5次改編成電影嘅《大亨小傳》，根據 20年代小說改編而成。
有靚仔里安納度主演，又有無限靚衫靚景任睇。夠晒浮誇啦啩，不過背後原來諷刺上流社會嘅奢華，名媛望族為錢喪失道德嘅墮落，夠晒深度，啱晒剝削工人福利嘅富豪同內地貪官睇。未講電影先講原著小說。
《大亨小傳》乃作家史考特費茲傑羅（ F. Scott Fitzgerald） 1925年作品。一推出，好評如潮但銷路一般。有指當時大眾擔憂大蕭條來臨，因小說中嘅浮華元素唔多啱口味而影響銷情。
直至作家死埋，到 50年代初，大家先驚覺走寶。最終小說廣為流傳，因其內容反映當時上流社會嘅虛偽，被譽為 20世紀最佳英語小說第二位。
齋睇劇照都感覺浮誇。 Tiffany贊助鑽飾；女裝由 Prada掌舵人 Miuccia Prada設計；男裝則由 Brooks Brothers提供。唔好睇小 Brooks Brothers呢個美國百年老牌，原來小說作家史考特費茲傑羅不下一次喺著作中提及，自己亦係牌子粉絲。今次電影可謂跟足原著。
《大亨小傳》原著以金融才俊為第一身，敍述暴發戶 Jay Gatsby嘅故事。今次電影以同樣方式處理，搵嚟里安納度老死、蜘蛛俠杜比麥奎爾飾演。
里安戀上人妻，人妻嘅老公（右）亦喺出面偷食，搭上車房東主（左）嘅老婆。姦情其後禍及里安，最終悲劇收場。
車房東主老婆由《潮拜購物狂》嘅艾娜菲莎（紅衫）主演。佢背夫偷食之餘，仲帶壞杜比麥奎爾，招埋班姊妹大玩淫賤派對。
浮華溝女
其實小說嘅浮華元素，一啲都唔浮誇，仲好反映現實㖭。故事背景時值 1922年，經過第一次世界大戰後，美國經濟起飛，個個紙醉金迷，暴發戶 Jay Gatsby更晚晚開 P，成為城中熱話。
不過夜夜笙歌背後，原來有段古。暴發戶嘅目的就係為咗吸引嫁入豪門嘅初戀女友到場，期望可以重拾舊歡。真係又俾佢得米喎。不過偷嗒人妻，又點會有好下場？
性感女神史嘉莉祖漢遜、影后妮妲莉寶雯、貓女郎安妮夏菲維曾爭奪人妻一角，但最後由英國小花 Carey Mulligan勝出。 Carey 2010年憑《少女失樂園》角逐奧斯卡影后，之後曾參演《華爾街》續集、《色辱》，算係近年多產嘅女演員。
男嘅放女嘅蕩，一撻即着。
靠晒里安
既然講得浮誇，場面自然華麗奪目。今次《大亨小傳》（香港 5月 16日上映），演員所用嘅服裝、首飾全部由名牌贊助。至於導演由巴茲魯曼（ Baz Luhrmann）負責，佢前作《澳大利亞》口碑一般，好彩暴發戶男主角有里安納度（ Leonardo DiCaprio）。里安向來好戲識揀劇本，好少失手，尤其佢一早講過會暫時停止拍戲，各位粉絲，有得睇好睇囉。
撰文：娛樂組
没有评论:
发表评论