我叫她周夫人，她嫌太客氣，「叫我Brenda」。
Brenda以前活躍於社交名人版，跟丈夫有影皆雙、去Ball、煮翅；今日她的名字出現在財經地產版，「其實我唔識上網。」那如何緊貼大市？「經紀打嚟，同我講個價點點點，咪傾吓。」
Ball她都不去了，「推晒，一個人冇乜興趣。」平日在家看電視過日晨，「唞吓都好。」浮華盡成過去。
記者：劉嘉蕙 攝影：劉永發
上世紀Brenda生活不是這樣的。周啓邦還在的時候，他們差不多個個星期有Party去。她每天起身，不是設計衫、就是改衫、試衫、打理衫。
「Ball都唔係個個去，我哋鍾意有主題、有Dress Code，有得襯吓，先去。個個都咁靚，我哋咪盡力有咁靚扮咁靚囉！」鍾意乜嘢牌子？「我好少買衫，名牌未必啱我着。平時屋企會請定一個裁縫，決定去一個Ball，就個幾月前開始準備衫。」連去旅行也愛揀郵輪，貪有Ball去，把晚裝高踭鞋搬上船，晚晚衣香鬢影，「好多人叫我哋影相，問我哋係咪Film Stars，我話我哋係Lawyers，個個好出奇。」
靚，有輕於鴻毛，有重於泰山。「記得有次化妝舞會，船長頒大獎畀我哋，話我哋係中國人嘅光榮。全船有好多中國人，個個都好開心。我哋就係要畀大家知，原來中國人都識扮靚。」
生平沒幾趟機會去Ball的平凡人，對Ball場總有很多幻想：名太講是非、批踭鬥靚比行頭。「冇，去Ball都冇乜好傾，因為啲音樂好嘈。通常人哋同我講嘢，我就盡能力去答。不過要傾手袋買幾錢，我就好驚，我唔講呢啲話題，要Show Off啲嘢幾錢，我唔覺得好Taste。」Brenda認為，「去Ball係Enjoy朋友圍埋一齊，望吓賓客着得有幾靚，已經好開心。」後尾啲人着得越嚟越簡單，冇咁好玩，你覺唔覺？「哎吔，我點知呀？」
■Brenda貪靚但不姿整，不講究護膚，也不習慣補妝，「老公唔畀我補，話補完好厚粉，所以我唔補妝㗎。」
■為報紙拍的性感照，美艷不輸明星，「個個同事見到都說似狄娜。」
奶奶哦完又着過
Brenda說，貪靚冇得解。出身貴族家庭的周氏夫婦，在英國讀書時已去Ball看時裝。回港後二人返律師樓，日頭被迫着得黑沉沉，去Ball是打發靚衫的唯一途徑。六、七十年代，女士着恤衫扣鈕扣到上喉嚨，Brenda就穿大低胸短裙，還當選英文報Sexy Lady，「英文虎報搞咗個Sexy Lady選舉，個記者打畀我，求我參加，我見咁熟，咪話好囉。」翻看舊照，尺度比今日紅地氈女星有過之而無不及。衣着大膽，真相是衰心軟，但不知者總以為Brenda愛出風頭。「係成日有人話㗎，我奶奶都會話，『唔好着到咁，尤其你做狀師』，我哋就『哦哦哦』，哦完又着過。」
「我哋返香港六個月就搬出嚟，日日扮鬼扮馬佢都唔知，最多睇到報紙先話兩句。其實奶奶都算好，半知半唔知就算數。」昔日揭開報紙，只見Brenda跟老公糖黐豆，甚少與其他姊妹淘拎手袋仔出入，原來也跟貪靚有關，「我係少同啲阿太行街食 Tea。點解？啲阿太唔鍾意同我一齊呀，因為我唔打牌，一次都未打過，唔識打。仲有我着咁多呢啲衫，佢哋唔着得，成日要老老實實。佢哋覺得我嗜好唔啱佢哋。」說來不覺遺憾，好在有老公這個忠實擁躉。
我唔Mind靜落嚟
Brenda的Ball場生活，隨老伴離世告一段落。五光十色的生活，懷念嗎？「有伴就開心，一個人，唔想去。」
以往一年總有一次，周氏金屋大排筵席，Brenda煮鮑魚海參宴客；因為一手好廚藝，她甚至拿過法國美食會頒的大獎，「𠵱家有心情先煮，仔仔（周國豐）未必鍾意食我啲嘢。佢驚肥。開Party我都冇興趣，淨係打電話都有排你打，好玩但好辛苦，唔制囉。」
她不愛打點舊照，平時一堆塞入櫃桶，為訪問才掏出一叠給記者看，說說這套衫那個心口針，「我鍾意去Ball ，Add more splendors to your life，好好玩。不過我唔Mind𠵱家靜落嚟。唞吓都好。」
Brenda私相簿
■周夫人經典造型，粉色皮草粉紅Rolls Royce。
■七十年代出席時裝活動，扮成法國瑪麗皇后。
■往年過年過節，周氏伉儷都為雜誌示範超豪年夜飯。
■親自設計首飾，另外訂製晚裝配襯。
■愛美的Brenda六、七十年代就飛歐洲睇時裝騷，帶回最潮服飾。
後記
都說Brenda近年深閨，這次訪問約得成，連我自己都不敢置信。「你係好好彩，平時我推晒。那天你打來，我剛好In a good mood。」坦白得可愛。是我小人之心，訪問前不惜再三致電確認，怕她突然醒覺我有多唐突，「我一Say Yes就係Yes。」鏡頭以外，Brenda備足茶點招呼眾人，還溫馨的帶我們賞花看魚。訪問中她說得最多是「多謝」。對於Brenda的體貼和信任，我真心感激。假如香港真有過Good Old Days，那也許該歸功於這些人、以及他們所堅持的Good Old Values。
搭上華麗尾班車
說本地Ball場歷史及禮儀，天機公關行政總裁Francis（鄭紹康）如數家珍，「Leonardo DiCaprio部《大亨小傳》就快上，講美國二十年代上流社交文化，想知一定要睇。」
「以前去Ball，一定要男女男女隔着坐，梅花間竹，才正宗，是禮儀，𠵱家冇人知。」Francis不是Blue Blood出身，但天機公關創辦人包括何超瓊及榮文蔚，因此，城中最璀璨的盛事，都有他幫忙打點。九十年代入行的他，剛好搭上華麗尾班車。
「簡單講一個例子，99至二千年千禧Ball，會請到Whitney Houston做嘉賓。搞個埃及妖后Ball，又會有Kate Moss出現。𠵱家有幾何請到國際巨星？係人哋未必吼你。」以前去Ball是大事，「揀晚裝要時間，Set頭修甲化妝三四個小時，還要去銀行拎珠寶呢。名太去一個Ball，可以用一個星期準備，先叫『去Ball』。」今天的人流行講「認真就輸了」，「現在很多事業型女性，冇時間Set頭化妝，放工買條裙就出現，自然冇咁靚。平靚正的Topshop晚裝，舊時真的不會見到。」
Francis說近年很多心力花在禮儀教育，甚麼叫Business Suit，甚麼是Cocktail Attire，從頭說起，「現在慈善Ball買枱的人很多來自北方，講國語，Dress Code寫Black Tie，就以為打條黑呔就得。作為搞手只能盡量教，教唔識惟有隻眼開隻眼閉。」
■天機公關行政總裁鄭紹康
■廿年人事幾番新，昔日Ball場的中流砥柱所餘無幾。左為榮文蔚。
■01年與周潤發於香港癌症基金會慈善Ball合照。
北風吹走黃金年代
作為公關，他想事事周到，不希望來賓當食飯使錢就算，不過賓客明顯沒有他想得多。「像剛剛搞個Ball有拍賣環節，通常大家買甚麼、誰舉手，都傾好晒，但好些新貴就解釋極都唔明。」人家的錢，就少操心吧，「咁我都想佢用得其所。」呻完又不忘打圓場，「其實佢哋進步緊嘅，不過需要時間。」所以上一代名媛絕迹Ball場，不無原因。「少咗朋友去，配套唔同晒，自然覺得冇咁好玩。」
作為搞手，他只能嘆句無可奈何，「無可否認香港有過一個黃金年代，但也消失了，冇辦法，冇得返轉頭。」
瑰麗Ball場
着靚衫影靚相
展舞姿
Show珠寶
没有评论:
发表评论