只是过客: 蘋果日報- nVIDIA Shield實測　WiFi睇4k片　爽

nVIDIA Shield實測　WiFi睇4k片　爽

實試nVIDIA Shield　串流睇4K《Iron Man 3》

日前正式開賣的nVIDIA Shield，除咗有笑爆Gamer嘅XBOX手掣造型，大家未必估到，佢最強原來係利用WiFi串流PC同大電視，既可喪煲腦界大作，更可直播4K電影，極盡惡搞PS「Remote Play」和Apple「AirPlay」兩大功能，齋當佢遊戲機，嘥咗！

記者：陳國輝

攝影：潘志恆

模特兒：Cherry@Unique

打PC Games唔窒
照計大家都聽過，早前PS Vita已經支援Remote Play串流，簡單講，即係將你手上部PS Vita，同步連線至屋企的PS3遊戲，去到邊就打到邊！聽落當然吸引，但係點解咁耐都Hit唔起呢？話說曾經有Gamer試過，原來畫面經壓縮處理後，再傳送至手提遊戲機，畫面就會起晒格，而且動作仲會有Delay，若果網絡傳輸速度再慢些少，基本畫質係無可能接受！

打機串流上電視 nVIDIA Shield $2,599

■包裝亦採用XB螢光綠，送埋充電器及USB傳輸線。

■照抄牛角設計都算，連質感都似，只係Shield稍重。

至於Shield的PC串流技術，其實只算抄一半，佢既可連接Windows電腦，直接開PC Games玩，同時，亦可保留遊戲畫質的細緻度。現場試玩第一身射擊遊戲《Borderlands 2》，經PC傳送到手提機的效果，除受制於Shield的720p畫質外，基本上過程相當流暢，聲畫亦唔覺得有Delay。惟一要彈，係佢採用WiFi連線，無線範圍只限於屋內，拎唔到出街玩。

■電腦要裝備Inno3D GeForce GTX 770 4GB GDDR5（$3,599）或以上顯示卡，先玩到無線串流。

■試打《Borderlands 2》30分鐘，出現過兩次斷線！

■暫支援PC串流約40款遊戲。

4K影片隔空播
除咗打機，咪以為Shield便一無是處！拎到返屋企，佢仲可以變身做電影播放器，欣賞的當然唔係5吋小芒，而係透過無線技術，直駁大電視睇高清影片。

提到有關功能，玩法最User Friendly，我覺得係Apple Airplay技術！按個掣，唔使幾秒直出大電視，而且畫面近乎無Delay，睇戲、一般操作都咁方便，也難怪Shield要向佢偷師。

聲畫同步睇4k ■值得一讚係手提機與電視能同步播放，近乎無Delay。

至於呢部手提機則內置一項Miracast功能，佢同PC串流剛好相反，玩法係以無線方式，將手提機畫面直接投射落大電視，長按開關掣便可即時點選，簡單快捷；仲試播《Iron Man 3》於爆炸客機救人一幕，講畫質，無得彈，事關Shield支援最高格式達4K，比起1080p清晰幾倍，但流暢度就唔多穩定，示範當日更發生過幾次窒格，幸好唔算嚴重，整體感覺尚算幾爽。