政改諮詢 - 左丁山
相信最鍾意聽到泰國民主黨要求政改、要求民選政府下台，改由人民議會執政嘅香港人，就係梁振英、林鄭月娥、袁國強、譚志源等人及西環中聯辦。佢地在幕後操控香港2017年特首普選及2016年立法會選舉方法，又恐怕香港人搞佔中，苦思對策之際，得悉曼谷市民（死硬派據報不足三萬人）佔領市區釀成暴力騷動以及呢啲市民要求成立「人民議會」（本質係功能組別或政治協商會議）喎，好消息到極啦，有樣辦俾香港人睇呀嘛。
又有咁啱嘅，特區政府就在呢個時候，於十二月四日發佈「2017年行政長官及2016年立法會產生辦法」諮詢文件，政府聲言：「我們必須強調，特區政府對於2017年行政長官及2016年立法會兩層產生辦法未有立場。」（第7頁1、2段）純粹係聽意見箒喎。
如果淨係聽取意見，假設有一萬份意見書，政制及內地事務局局長譚志源既然堅持睇意見書不會「另眼相看」一啲人大政協、專業名人嘅意見，橫頭磡順嫂與山頂CEO嘅意見會得到同樣平等看待，呢個講法，唔知你信唔信呢？如果收回好多意見書，點都要分種類，排優次，先至可以整理出另一份諮詢報告㗎，如果唔係，是否以量取勝，八千人講同一樣嘢，政府就會聽？譚局長話一定唔係計數目多寡，而係審閱意見，咁又有一個問題，如一位泰國女士對「INYT」所言，中環精英嘅意見係唔係多啲「重量」？譚志源又話唔係。咁就大家都不知審視、歸納之客觀條件為何，只能相信梁林袁三人之judgement（判斷），好牙烟啫。
香港政改諮詢文件有九成係吹牛吹水嘅，真正內容係第五章：「徵詢意見」，政府出題目，叫市民作答，但所有題目都在既定範圍內，不能踰越，例如行政長官產生辦法只有一個「提名委員會」的人數和組成，市民只能在既定範圍內作答案，天馬行空式嘅答案一定會無政府人員理會，假如答公民提名，顯然在考題範圍以外啦。如此諮詢，叫市民俾答案，十分易做，同時亦係一個小陷阱，希望拖住市民鼻子走向既定目的地！
