蔡卓妍及關智斌到冰天雪地國家旅行，雖然凍到癲，但佢哋玩得好high呢﹗（微博圖片）
前晚蔡卓妍（阿Sa）先喺灣仔出席完公司春茗，點知話咁快原來佢已經同埋關智斌（Kenny），仲有其他朋友一齊去咗一個冰天雪地嘅地方旅行喇。
去得咁正嘅地方玩，就梗係要「些牙」比大家睇有幾開心啦，雖然現場應該凍到癲，不過有雪玩係零舍興奮嘅，阿Sa就留言話：「人生在世就是要不停努力地實踐夢想和探索、感受這個世界！又一個夢想實現了！去了一個極北的國度⋯感受這個大自然令人嘆為觀止的景象！p.s我的兒子帥不帥？哈哈」兒子？係咪同行嘅Kenny呀？
Kenny就post咗喺冰屋內部嘅相，又話：「現代冰屋，愛斯基摩人生活」。佢哋去呢個地方而家仲係一片白茫茫嘅雪地，相入面仲見到阿Sa及Kenny，分別拖住裝滿雪橇嘅行李車添。
雖然得幾張相，而佢哋入住冰屋外形酒店，似乎就喺芬蘭喇，呢個地方叫Kakslauttanen，除咗有得玩雪之外，夜晚睇星星同睇北極光都一流，因為間房有個球形天幕㗎！
靚就確係幾靚，不過住宿就唔平喇，單人房要成343歐羅一晚，雙人房就每人194歐羅。大家都想去？自己上酒店官網睇睇啦： http://www.kakslauttanen.fi/
阿Sa同Kenny以及女友人齊齊合照。（微博圖片）
（微博圖片）
個雪人係咪佢哋砌㗎？（微博圖片）
兩個大細路玩到癲（微博圖片）
好正喎（微博圖片）
哇﹗好靚﹗（微博圖片）
没有评论:
发表评论