CLOSE-UP
旗艦鬥
LG、 Sony、 Samsung及 HTC四個手機品牌的旗艦機，終於抵港，單睇硬件同功能，好似部部差不多，好難抉擇買邊部。
不想買錯機，就一定要留意六個重點：影相、功能、屏幕、自拍、電量及效能。
今次集齊四部旗艦機比併，睇睇邊部手機攞到最高評價，買機時自然易揀好多。4K配套
除 HTC One（ M8）之外，其餘三部手機都支援 4K（解像度： 4096× 2160）拍片。不過，拍完之後想翻睇，除了要有部 4K電視機，亦需要特別器材；用家可以去腦場買一個支援 4K的 HDMI接駁器（約$150），將手機直駁電視，輸出畫面比用普通接駁線更穩定。不過，部分 HDMI接駁器只支援 USB 3.0插頭（例如 Samsung GALAXY S5），買之前記得睇清楚。另外，如果要在電腦收睇，硬件規格亦有特定要求，例如屏幕要支援 4K解像度、處理器要配備 i5以上，以及至少要有 4GB RAM，播 4K片時先不會窒格。
第一關 鬥影相
大部分人都習慣用手機影相，影完直接放上網 share，所以手機拍攝質素絕對是重中之重。首個比併項目，就是測試四部手機在自然光下，以全自動模式拍攝，睇吓邊部測光夠準、色彩自然而又夠細緻。
HTC One（ M8）（ WIN！）
屏幕： 5吋 1920× 1080解像度 LCD
處理器： Qualcomm MSM 8974AC四核（ 2.5GHz）
相機：前． 500萬像素、後． 410萬像素
儲存媒體： 2GB RAM、內置 16GB ROM、 microSD（最高支援 128GB）
其他功能： Wi-Fi、藍牙、 GPS、 NFC、 DLNA、紅外線
體積/重量： 146.36/ 70.6/ 9.35mm/ 160g
售價：$5,998
網址： http://www.htc.com
評語：皮膚同衣衫的顏色都好自然，對比度高，白平衡亦準確。測光方面有少少偏差，影像顯得稍暗。不過，影出來的觀感就最自然，睇得最舒服。最大缺點是機背相機只得 410萬像素，在電腦睇或沖曬成 4R相還可以，如果要曬大相，就會出現狗牙。
Samsung GALAXY S5
屏幕： 5.1吋 1920× 1080解像度 LCD
處理器： Qualcomm MSM 8974AC四核（ 2.5GHz）
相機：前． 200萬像素、後． 1600萬像素
儲存媒體： 2GB RAM、內置 16GB ROM、 microSD（最高支援 128GB）
其他功能：防水防塵、 Wi-Fi、藍牙、 GPS、 NFC、紅外線
體積/重量： 142/ 72.5/ 8.1mm/ 145g
售價：$5,998
網址： http://www.samsung.com
評語：放大張相睇，影像最 sharp。顏色有少少偏藍，亦有輕微過度曝光，觀感稍為不太自然，但整體質素仍可接受。
Sony Xperia Z2
屏幕： 5.2吋 1920× 1080解像度 LCD
處理器： Qualcomm MSM 8974AB四核（ 2.3GHz）
相機：前． 200萬像素、後． 2070萬像素
儲存媒體： 3GB RAM、內置 16GB ROM、 microSD（最高支援 128GB）
其他功能：防水防塵、 Wi-Fi、藍牙、 GPS、 NFC
體積/重量： 146.9/ 73.3/ 8.2mm/ 158g
售價：$6,980
網址： http://www.3siu.com
評語：對比度出色，顏色自然。有輕微過度曝光情況，但仍可接受。另外，由於 Z2是四機中擁有最大感光元件的機款，同時亦有 F2.0大光圈，所以可以令背景出現輕微散景效果，立體感較強。
LG G Pro 2
屏幕： 5.9吋 1920× 1080解像度 LCD
處理器： Qualcomm MSM 8974四核（ 2.3GHz）
相機：前． 210萬像素、後． 1300萬像素
儲存媒體： 3GB RAM、內置 16GB ROM、 microSD（最高支援 128GB）
其他功能： Wi-Fi、藍牙、 GPS、 NFC、紅外線
體積/重量： 142/ 72.5/ 8.1mm/ 145g
售價：$5,998
網址： http://www.lg.com
評語：整張相感覺偏黃，而且測光失準，過度曝光，完敗。
第二關 鬥自拍
女性用家未必會理手機功能是否全面，自拍時影得夠不夠靚，反而是重點。
今次測試就搵模特兒手持自拍，睇吓邊部機測光夠準，以及還原膚色夠自然。HTC One（ M8）（ WIN！）
評語：前相機像素高達 500萬，比起其他手機拍攝的影像細緻度更高。另外，皮膚顏色自然紅潤，測光準確，取景角度又夠 wide，自拍最強。
Samsung GALAXY S5
評語：膚色夠自然，而且自拍時手機會自動開啟柔膚效果，影出來個樣夠白滑，只是輸 HTC One（ M8）半個馬鼻。
Sony Xperia Z2
評語：測光失準，人面明顯變暗；而且柔膚效果太過火，面上 detail盡失，好假。
LG G Pro 2
評語：測光失準，過度曝光，以至模特兒變得面無血色，衣衫上的 detail亦消失不見，效果最差。
第三關 鬥屏幕
影相之外，手機最常用來睇動新聞、電影或煲劇，日對夜對，屏幕質素自然好重要，今次用來試睇戲及睇相，測試邊部手機最順眼。
HTC One（ M8）
評語：顏色最自然，睇得舒服，只是略嫌屏幕得 5吋，而且細緻及銳利度未算好高。
Samsung GALAXY S5（ WIN！）
評語：一改以往「味精」芒感覺，色彩自然而不誇張。對比度雖然高，但邊位又不至過度銳利而「眼」，整體表現最出色。
Sony Xperia Z2
評語：色彩過於鮮艷濃烈，而且有點輕微偏青；細緻度出眾，連蝴蝶上的細紋都睇得清楚。
LG G Pro 2
評語：對比度不足，影像好似有層薄霧。唯一優點是擁有 5.9吋大屏幕，睇戲煲劇時觀感最好。
今次幾部機都有先影相後對焦功能，但並非部部實用，想知詳情請開壹週 Plus app睇效果。
簡單過戶
想換新機，最頭痛是如何將舊機資料搬過新機。
其實 HTC、 Sony、 Samsung及 LG各有簡單方法將舊機資料搬新機。
至於 iOS轉 Android，手續繁複，而且基本上只過到聯絡人、行事歷資料，難搞。HTC
用舊手機去 Play Store安裝及開啟「 HTC傳輸工具」 app，然後在新手機的「設定」選擇「從另一支手機取得內容」，就可以將舊機所有資料包括聯絡人、短訊、 email，甚至介面主題及 apps擺位，完全搬到新機，乾手淨腳。如果舊手機並非 HTC，都可以用此 app搬去 HTC One（ M8）。
Samsung
於舊機的「設定」登入「三星帳戶」，選擇「同步資料」以及「裝置備份」，就可以將手機的「通話記錄」、「短訊」、「 MMS」及「屏幕牆紙」資料，備份到 Samsung雲端儲存空間。然後在 Samsung GALAXY S5以相同「三星帳戶」登入，再揀「還原」就可以回復之前備份的資料。不過 Samsung舊資料過新機只限同廠手機，而且可過資料的選擇有限，比 HTC、 Sony以及 LG限制更多。
Sony
新舊手機各自於 Play Store安裝「 Xperia Transfer Mobile」，然後舊機設定為「傳送裝置」，而 Xperia Z2上則設定為「接收裝置」，將兩部手機處於同一 Wi-Fi網絡下，然後新機輸入舊機提供的密碼，兩機就會以 Wi-Fi過料。基本上大部分資料都可以過戶，包括 SMS、聯絡人、行事曆、書籤、相片、音樂及影片，都算全面。
LG
舊機先安裝「 LG Q移動」 app，然後跟足指示就可以將舊機內的 SMS、聯絡人、行事曆、書籤、相片、音樂及影片打包 backup，備份檔案會儲存在手機或 SD卡內。之後將備份檔案搬過去 LG G Pro 2，並於新機的「 LG Q移動」 app，選擇「恢復」舊資料，就可以成功過戶。
只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。
第四關 鬥功能
每款機各自有賣點，睇睇邊一部功能最全面、最實用。
HTC One（ M8） 加強音效（ WIN！）
外形改動不大，屏幕微升至 5吋及轉用虛擬功能鍵。新機支援外置記憶卡，亦加入雙擊喚醒屏幕功能，以及強化其他手勢操作，例如熄芒待機下，用手指在屏幕上拉去不同方向，就可啟動指定功能。
機背相機上設有偵測焦距及景深感應器（紅圈），不過位置尷尬，好易俾手指遮到。
機面上下方各設有喇叭，加強低音表現，效果明顯。
Check Point！
保留上一代的機面雙聲道喇叭之餘，再增強低音效果，試聽電影《紅 Van》主題曲，音場明顯廣闊，低音亦比其他手機實淨，音質拍得住流動藍牙喇叭。
Sony Xperia Z2 驚喜欠奉
賣相毫無驚喜，只是更新了硬件規格，及追加雙擊喚醒屏幕及其他手勢操作，例如將手機放近耳邊即可通話等。較特別有手套模式，冬天戴住手套亦可正常操作。官方已公布行貨延到六月先有，唯有捱貴價水貨。
支援多種音效格式，以手機計的確照顧周到。
未必所有用家都習慣手勢及體感操作，所以可自行開啟。
Check Point！
免提耳機配備 ClearAudio+音效，可提升清晰度。支援 USB輸出音訊，方便接駁耳擴等裝置，對音質有要求，可以考慮。
Samsung GALAXY S5 監測健康（ WIN！）
新機主打監測健康，除計步器外，機背配備心跳感應器，利用紅色 LED燈照射手指內血管跳動，從而讀取心跳次數（以心跳錶同時測試，結果亦相當接近，信得過）。
機背的心率偵測器，擺位方便，拎住機都可以 check到心跳。
為符合防水特性，充電插頭首次加入掩蓋。
Check Point！
支援 IP67級防水，可於一米水深運作半個鐘；外國傳媒甚至將 S5放入洗衣機攪水一個鐘，拎番出來依然用得。
LG G Pro 2 主攻大芒
屏幕由 5.5吋增至 5.9吋，不過採用窄邊框設計，機身先無發水，起碼仲可以擺入褲袋。硬件亦屬高規格，例如四核處理器及 3GB RAM記憶體，對大屏幕情有獨鍾，新機來講是現時唯一選擇。
大芒機一向難單手操控， G Pro 2的機背掣就幫到手。
將另一個 app拖往屏幕下方，就可開啟多視窗操作，兩個視窗的大小更可自由設定。
Check Point！
G Pro 2的多視窗功能容易使用，在 app內按住返回掣，就可以再選擇開第二個 app，運作亦算暢順，方便。
第五關 鬥電量
手機硬件規格強，但最怕燒電燒得更快，電力隨時半日就用乾，下下要插住「尿袋」，認真麻煩。
測試方式：先將四部手機充滿電，並將屏幕調至最光；關上流動數據及 Wi-Fi功能，以免手機系統背後有數據傳輸作業，影響測試結果。然後利用「 MX Player」播放 720p解像度的《魔雪奇緣》電影（約 1小時 45分鐘），播完一次之後記錄用了幾多電量，並連續播放直至手機自動關機。
評語：播放一次之後，畫面顯示 M8竟然用了 35%電量，而 S5則只用了 20%；不過之後就會發現 G Pro 2耗電速度加快，不夠五個鐘就斷電熄機，表現最弱。 S5則成為最長氣手機，可連續播放五次、近八小時的《魔雪奇緣》先斷電，一定夠用家平日出街煲劇用。四部機中，電量顯示最「失實」的是 HTC One（ M8），去到最後 1%時，竟然可捱多廿分鐘先熄機，比起其他手機頂盡只可用多分零鐘，有更多時間俾用家作「最後通牒」。
（ WIN！） Samsung GALAXY S5竟然可以連續播片近八個鐘，絕對是「長氣王」。
第六關 鬥效能
雖然四部手機都是四核心處理器，但各機用上自家系統，而且出廠時亦已安裝不同的插件，手機操作感覺都會有好大分別。
同步播放 720p影片及玩賽車 game，當中 HTC、 Samsung及 LG都成功過關，唯獨 Sony Z2使用 15分鐘後因機身過熱而強制關機，明顯超出運作負荷。再用「 GPlayer」單獨播放 1080p全高清影片，今次只得 HTC One（ M8）出事，因手機未能進行硬體解碼，所以畫面出現明顯殘影。
計埋「安兔兔評測」的硬件評測， LG G Pro 2的得分落後太多，所以四部機中，以 Samsung GALAXY S5的表現最好。
Sony Xperia Z2是唯一一部在系統操作流暢度測試過程中，因機身過熱而強制重新開機的手機。
總結 Samsung GALAXY S5（ WIN！）
經過六關不同測試後， Samsung GALAXY S5大熱勝出，無論功能、效能及電量等都比對手出色。不過，如果想要一部影相及自拍靚的手機，就要揀 HTC One（ M8），皆因前、後兩組相機的拍攝質素都相當出色，影完毋須大執就可直接放上網呃 Like。
没有评论:
发表评论