凌晨時分，深水埗特別冷清，走到荔枝角道，窄窄道路有一列鐵皮排檔，其中一檔，叫愛文生，其開放式廚房爐火熊熊，煙霧四起。隨着火水爐起哄之聲，食物爆炒香氣撲面而來，吆喝聲此起彼落，是另一番熱鬧景象。
愛文生是深水埗老字號，開業於1956年，原名叫龍喜，由林氏一家主理，店名是由林媽媽、大哥及弟弟的名字合併而成，昔日對出是碼頭，船客、船伕都愛在此吃飯消夜，以賣燒味飯為主。將近60年，由一間鐵皮檔做到現時擁有四間相連舖，但仍保留路邊的鐵皮廚檔，用磚和水泥砌成的兩個爐頭，日子有功都被熏得烏卒卒，師傅當街兜炒，爆起的一陣陣火舌是愛文生的生招牌。「大牌檔梗係賣鑊氣，𠵱家好多舖都已經改用煤氣爐，但炒出嚟嘅效果始終唔同，火水爐火力夠猛，炒到起晒煙，噴晒火先過癮嘛！」老表說。他是老闆女婿，約20年前已在舖頭幫手，林氏一家有不同崗位，有收銀的、樓面的，而他則負責主管廚房出品，有時也會幫手劏魚。
椒鹽九肚魚 $78
■九肚魚刻意不開邊，大大條有口感，炸粉不厚，椒鹽炒得很惹味。
這裏沒有考究的裝潢，吃到的，也並非很考工夫的精緻菜式，也沒有甚麼創新菜，賣的都是家常小炒，像桂林生腸、椒鹽九肚魚、椒鹽鮮魷等等。誠如老表說，這裏賣的是鑊氣，師傅一炒好，夥計便九秒九送上枱，上桌時碟碟菜仍熱氣騰騰。「鑊氣除了個火要夠猛外，仲要起餸起得快，一放得耐邊好食？酒樓又要搵蓋冚又要等人傳菜，真係嘥鬼氣。」空氣傳來椒鹽的味道，椒鹽一點點鋪滿九肚魚，魚刻意沒開邊，肥美得很，難得地沒有厚厚的一層炸粉。「我哋真材實料，使乜用咁厚炸粉，我仲有個秘技㖭呀，炸嗰陣落啲咖喱粉同薯粉，咬落去特別香脆惹味。」
李振昂（老表）
■愛文生是少數仍保留鐵皮廚檔的大排檔，開放式廚房經常看到火光熊熊。
桂林炒生腸 $78
■豬生腸事前要洗淨及啤水去味，之後加洋葱、青紅椒、桂林辣椒醬用猛火炒，每條生腸都爽脆香口，嗜辣者必吃。
炸大腸 $88
■較平常吃到的厚身，表面酥脆，肥腸口感軟綿富彈性。
愛文生
地址：深水埗荔枝角道215號
没有评论:
发表评论