彭順和小三李悅彤（Liddy）遭網友狂轟，同是𡃁模的馮鎵瀠（Naomi）前晚在facebook力撐Liddy，兩女在電影《喜愛夜蒲2》合作，曾相約夜蒲。Naomi前晚留言：「從新聞影片，我看到的是一臉甜蜜的臉，幸福的感覺，快樂的愛情。並不是甚麼『偷吃』、『小三』，一段健康的關係是容不下第三者的。」
Naomi昨在電話繼續力撐Liddy：「感情事係當事人知，唔需要俾人網上公審，網友粗言穢語太離譜。」她又指Liddy不是姣精：「佢好男仔頭，同佢相處好舒服。」更認為彭順應出來向傳媒解畫，她說：「男人應有承擔，要維護番兩個女仔，佢要出嚟交代。」Naomi不擔心言論惹網友圍插：「我想將Liddy傷害減到最低，我同情佢，網友根本唔知來龍去脈，我最多畀人鬧幾句，唔及佢傷。」
採訪：劉敏
■Naomi（右）不值網友圍插Liddy（中），昨日出言力撐。微博圖片
全城熱話：o靚模鬧爆
黃榕
彭順背妻媾𡃁模Liddy，受千夫所指，同為模界的AD2成員Amy、黃榕和王璐瑤便齊聲鬧爆Liddy與彭順。
黃榕：如果對方已婚就唔應該拆散人哋，如果相愛就應該搞好晒手續先，破壞人哋家庭唔係咁好。
王璐瑤：如果同有婦之夫，咁對方一定係講大話。
Amy寸二人太高調：成也𡃁模，敗也𡃁模，其實婚外情可以隱蔽啲。
許志安認為彭順即飛回大馬認錯做法正確：佢即刻返大馬係啱，盡快返去解釋吓，感情未必要同出面人解釋，但呢件事要第一時間同老婆解釋。
許志安
【網友兩極】彭順出軌，有網友紛起圍插賤男彭順及小三李悅彤，並發貼支持李心潔；但也有網友力撐彭順，認為偷食不一定是男人的錯。
查利阿當夏娃：你自己諗吓結咗婚幾年，有條女lum你，你唔會勁痕？咪玩我啦……佢只係做緊一個男人應該做嘅嘢……係呀係呀，不如你試吓每日都要忍一個鬧你話你管你嘅女人啦，當一個女仔出現，又識得逗你開心，你就知點解要去偷食喇……我想講，偷食，唔一定係男人嘅錯…
亞妮：做女人冇本事留唔住自己男人應好好檢討吓啦憑乜怪老公呢
棋棋媽：做人小三，同緊人哋老公偷情，拎人哋老婆封面雜誌畀人哋老公睇，真係好賤格！
亞旺媽：將心比己，佢都係女人，都唔諗吓，佢自己他朝君體也相同~以為自己係天仙托世呀？第日咪又一樣俾人飛~有心做到咁衰，就唔該有啲大志搵條大水喉啦~反正都係做小三，搵條咁嘅霉導演，手停口停，又樣衰，佢盲嘅~
出軌套餐：處處現偷食玄機
長腿小三李悅彤（Liddy）花盡心思俘虜彭順，二人當日約會時，發生的各項事件，都與婚變等元素不謀而合，未知是否全是Liddy的心計。
睇偷情片《香港仔》電影是李心潔好友梁詠琪的作品，當中更有講述曾志偉背妻楊千嬅偷食嫩口護士蔡潔的情節，唯一不同是志偉在事件穿煲前已浪子回頭，相反彭順卻被本報揭發。
【睇偷情片《香港仔》】
揀Coldplay離婚碟曾當歌手的Liddy，於HMV特別拿起Coldplay的新碟《Ghost Stories》參詳。該碟是樂隊主音Chris Martin和姬妮芙柏露感情觸礁後創作，歌曲盡是抒發婚變的感悟。
便利店刨正印雜誌在便利店駐足喪刨李心潔做封面的雜誌，死盯着沒有文字的一頁不放，擺明車馬要迫彭順直視妻子，挑釁味道濃烈。
Liddy撇仔黐彭順
𡃁模李悅彤（Liddy）是《耳分高下》中Sing之天使「檸檬」，現實生活原來狂向異性派檸檬，昨日有讀者報料，除附上她的四眼舊愛照片，同時又指Liddy半年前仍與男友在深井豪景花園同居，不過跟彭順劈腿後，Liddy火速撇仔黐實人夫彭順，更與彭順在將軍澳日出康城另築愛巢。即使朋友勸她不要破壞別人家庭，抽身離場，她都聽不入耳，仍向友人得戚說要「坐正」。
Liddy工心計要踢走正印李心潔，難怪跟彭順秘戀時，即使同時有有米太子爺熱烈追求，Liddy都不為所動，有米太子爺追求失敗，一度被身邊友人揶揄他食檸檬。Liddy為入宮堅決死黐彭順。
採訪：楊定
没有评论:
发表评论