CLOSE-UP
未來健康軟硬體
今年，可說是科技健康年，年頭的 CES有大量穿戴式健康監測產品現身，之後 Samsung、 LG亦推出內置健康監察功能的手機，似乎 Android系統已全面準備好。
至於 iOS，兩個星期前 Apple在美國舉行的 WWDC上，亦在將會推出的 iOS 8內加入健康監察功能，有理由相信，未來大部分手機加入健康概念，絕對是大趨勢。2019年．夏．香港
2014年的今日，用家眼中的手機監察健康都不外乎是加條手帶就算，不過發展空間之大，過多幾年，可能已可以完全融入生活之中。到時會點？
五年後的 Sam，配合現今開發中的健康監察科技，預測未來手機健康功能扮演的角色，變成日常生活一部分。___時間＞＞＞ 06： 00
______狀態＞＞＞剛起床每朝， Sam都會 6時起床，而叫醒他的並非鬧鐘或者電話，而是具有震動功能的電子手帶：因為可以減少被嘈醒而產生的不安情緒。之後，入廁所拎起智能牙刷，由於內置感應器，可測量使用者的使用時間、方向，只要在手機開啟專用 app，就可以顯示每次刷牙的完成度，幫助改善刷牙習慣。
___時間＞＞＞ 06： 20
______狀態＞＞＞去茶餐廳食早餐
毋須逐樣成分輸入，即用相片配對數據庫識別出不同食材，再計算卡路里，比現時的卡路里 app方便得多。
Sam每日都會到球場附近的茶餐廳食早餐，今日食雞蛋三文治加杯熱奶茶。為求好好控制每日卡路里攝取量， Sam會開啟「即時影像計算卡路里」手機 app，影張食物相，手機 app就可以自動分析成分及卡路里數值，毋須餐餐左計右計。
___時間＞＞＞ 06： 45
______狀態＞＞＞球場跑步
最少都要戴住條手帶先計到心跳率及血壓，不過美國已經有公司研究智能耳塞，應該好快有得用。
去球場跑步是每日指定動作，而 Sam亦必定帶埋智能耳塞。可以用藍牙連接手機播歌之餘，亦設有多組感應器，可即時計算使用者心跳率及血壓等資料，仲可以計埋步數及步速，然後將所有資料全部傳送到手機上。亦可以以圖表顯示過往數據，如果有不尋常的變化，一睇就知。
___時間＞＞＞ 10： 20
______狀態＞＞＞公司工作從事物流工作的 Sam，大部分時間都需要坐在辦公室工作，而公司特別為員工安裝智能系統幫手增加效率，首先為每位員工都提供智能椅，椅內不同位置設有感應器及震動器，當坐下超過 1小時，就會作出震動提示。而電腦亦設有眼球識別功能，當發現使用者眼睛閉上超過 3分鐘，就會致電提醒，以免工作時睡着。
其實感應器、震動器，甚至眼球識別功能都不算新技術，但未來同健康整合之後，對日後生活有好大改變。
___時間＞＞＞ 13： 30
______狀態＞＞＞午飯後
智能藥樽的數據除了可直接傳到使用者手機，亦可以連接醫院或家庭醫生，有助監察病者的用藥情況。
每日午飯過後， Sam都會進食維他命補充劑。為有效管理自己的食藥時間，會用智能藥樽放置維他命丸。智能藥樽最大好處是設有動態測量晶片及流動數據傳輸功能，只要拎起藥樽倒出藥丸，就可以將食藥時間記錄低，並即時傳送到手機。
___時間＞＞＞ 18： 00
______狀態＞＞＞放工經過一日工作，加上戶外溫度達到 35℃，回家後的 Sam滿身大汗。不過， Sam毋須自己去開冷氣，因為智能家居的身體監測器自動識別屋內每個人的身體狀態，慢慢將室溫降低。另外，亦會將浴室熱水器調節至合適溫度，即刻洗澡亦不怕有感冒。
___時間＞＞＞ 19： 00
______狀態＞＞＞準備晚飯
韓國 Samsung及 LG都大力推動智能家電，其中智能雪櫃配合 RFID（無線射頻識別技術），可即時知道雪櫃內的食物種類及最佳食用期資料，是重點發展項目之一。
晚飯時間，由於 Sam使用智能雪櫃，只須打開連接雪櫃的手機 app，就可根據雪櫃內不同食物的食物標籤，知道儲存的食材種類以及食用期限。同時，只要預先設定飲食喜好，手機亦會因應不同食材的到期時間，自動找出合適的食譜， Sam只要跟住食譜烹調即可。
回到 2014
睇完未來手機健康科技，太虛幻？其實現時智能手機都開始植入健康 apps，幫手監察身體狀況，最值得留意當然是剛發布的 iOS 8，入面新加入的「 Health」功能，隨時改變你用手機的習慣。
一站式
雖然現時 iOS 8仍未正式推出，只有開發者先可以率先安裝到 iOS 8 beta，不過在早前公布 iOS 8的同時，最多人留意到的是新推出的「 Health」功能。以前想用手機監察健康，除了要配合其他生產商推出的手錶、手帶等工具之外，亦要安裝專用 apps，如果有幾個不同牌子的監察工具，手機就要裝齊幾個專用 apps，逐個設定都幾煩。而今次新推出的「 Health」功能，就是整合所有由其他廠方提供的健康數據，方便用家監察之餘，亦方便提供俾醫護人員作分析之用。
手錶配合
既然要配合不同健康、醫療產品使用，支援的功能當然不能少，除了心跳率、消耗卡路里、計步等資料外，亦可記錄血糖、膽固醇等數據，就算日後要在家測量，都毋須自己慢慢填。另外，仲可以記錄埋睡眠質素、深層睡眠長度等數據，亦可提醒你幾時要食藥，全部都用一個 app做到。聽落功能夠多，但全部都要配合其他產品先用到。其實加得「 Health」功能，相信未來推出的 iPhone 6在規格上都會作出配合，而且加埋傳聞已久的 iWatch，隨時用到「 Health」一半功能，加上 beta已經提供埋「 HealthKit」俾開發人員，相信 iOS 8正式一出，支援的健康監察產品多到數不清。
iOS編
今次 iOS 8新加入的「 Health」功能，血壓、磅數、卡路里全部都可以記錄低，開拓空間夠大。
記錄低日間卡路里消耗量，好多健康 app都做到，但可以睇埋夜晚睡眠質素，功能明顯多好多。
發布 iOS 8之前，網上已經傳聞 Apple會大搞健康功能，仲一早有埋畫面流出兼預計有 iWatch現身，不過最後當然一場空。
除了健康方面，「 Health」功能亦都照顧埋醫療，幫手記低食藥時間、儲存電子化驗報告，方便俾醫生睇。
Android編
iPhone後知後覺內置健康 app， Android陣營年初已經玩緊， Samsung、 Sony及 LG新款旗艦機均支援自家健康 app，不過 Samsung GALAXY S5有得測埋心跳，小勝一個馬鼻。
測心跳 Samsung GALAXY S5
售價：$5,998
上一代 GALAXY S4已有 S Health程式，今次加強版更首次加入心跳監測儀，將手指輕放在機背鏡頭下方 LED補光燈旁，就可以量度用戶的心跳率，加上毋須佩戴任何手帶，單靠 app就可以計步、計算運動時間及以 GPS量度距離，仲可以輸入每餐食物估算熱量，以及量度睡眠時間，計功能，贏晒！
網址： http://www.samsung.com
輸入每餐食物， S Health識得計熱量，仲可以影張食物相做記錄。
手指輕按 LED燈稍等幾秒就可測出心跳，運動時就知心跳有幾快。
介面靚，但逼人買手帶先用到所有功能，一貫 Sony作風。
靠手帶 Sony Xperia Z2
售價：$5,998
講介面， Sony的 Lifelog設計最靚，而且除了健康記錄，仲會有生活記錄，例如去過邊度、聽過邊首歌同埋影了幾多張相等，可惜一定要配埋 Sony條 SmartBand（售$798），先可以做到計步及記錄運動時間等健康記錄，無買 SmartBand單靠個 app只做到生活記錄，扣晒分！
網址： http://www.sonymobile.com
功能略嫌簡單，未夠 Samsung齊全。
輸功能 LG G3
售價：待定
本星期先出行貨的 LG G3，亦有內置健康程式 LG HEALTH，同 Samsung一樣，勝在毋須加手帶，就可以計步、計算運動時間及以 GPS量度距離，不過就無記錄飲食及睡覺的功能，未夠全面。
網址： http://www.lg.com
今年三月開記者會， HTC公布與 Fitbit合作。
蝕底 HTC One M8
售價：$5,998
見其他手機品牌都有健康監測功能， HTC One M8亦想照跟，不過趕不及寫自家 app，唯有夥拍健康手帶公司 Fitbit合作，雖然 HTC有花功夫將 app改良，令 app可於手機中暢順運行，不過大部分功能仍要靠手帶檢測，意義不大。
網址： http://www.htc.com手帶戰
就算手機已內置健康 app，但要監控健康，始終要靠手帶先夠全面。
測眠 Jawbone UP24
售價：$1,499
有齊計步及記錄運動時間等功能，最特別是睡眠偵測功能，不單記低總共睡了多久，還會根據身體動作，來判斷當中有幾多時間是深層睡眠，然後到設定時間慢慢震動手帶叫醒你，保證不會嘈醒枕邊人。
網址： http://jawbone.com
新手帶採用防敏感物料，日戴夜戴亦不會令皮膚不適。
加入 UP Coffee手機 app，記錄每日咖啡因攝取量，再與睡眠數據結合分析，睇吓飲得咖啡多對睡眠的影響。
游水 Fitbit Flex
售價：$898
其他手帶雖然都有防水功能，不過最多防流汗同埋落雨， Flex就有多達 10m防水功能，戴住游水都可以做記錄，而且每盒有一大一細兩條手帶，毋須擔心買回來不合戴，夠窩心！
網址： http://www.fitbit.com
一盒有齊大小兩條手帶，情侶一人一條剛剛好。
設定目標要減幾多磅，手機 app就會提你距離目標仲有幾遠。
分析 Phyode W/ME
售價：$1,588
有別於只記錄不分析的手帶， W/ME可以利用手帶內置的感應器，測量心電圖，並進行心率變異分析（ HRV），然後列出心理狀態、活力指數及自主神經系統（ ANS）健康情況，不過似噱頭多過實際用途，叫做多樣功能玩。
網址： http://www.phyode.com
設計成波浪形，有別於一般橢圓形手帶。
手機 app插圖夠可愛，似針對女性用家。
輕巧 Mykronoz ZeFit
售價：$599
功能無特別，來來去去都是記錄步行數據、步行距離、卡路里消耗，勝在售價夠平，而且只重 25g，戴上手不會累贅。
網址： http://www.mykronoz.com
用 OLED顯示屏，夠慳電，充電三小時就可用上一星期。
除了有手機 app， ZeFit仲會將運動數據放上雲端，開網頁就睇得一清二楚。
潮戴 Nike+ FuelBand SE
售價：$1,799
內置 3軸加速度計，可以輕易追蹤不同類型運動的數據，配合 iPhone 5s，更可準確計算出熱量消耗及運動狀態，而且追加了紅、橙、黃及玫瑰金等新色選擇，夠潮！
網址： http://www.nike.com
顏色夠多，又有大批潮人追捧，一直是運動手帶界最紅的一員。
食世界盃熱潮，推出巴西黑金特別版 FuelBand SE，內有巴西國家隊 logo，發售日期未定。
健體 app
不想花錢買手帶或內置健康 app的手機，亦有不少免費 app供下載，一樣可以做到類似健康監控功能。
掃描食物
講到監控飲食，大部分 app要自行輸入數據， Calorie Counter and Food Diary就好方便，嘟一嘟食物包裝的 barcode，就會從數據庫搵番食物的營養資料，好方便，當然食碟頭飯時，依然要人手輸入啦！
Calorie Counter and Food Diary
支援機種： iOS、 Android（註）
睇心跳
麻省理工研究發現，心跳時血液會泵上面部，令面部反射出來的光線有輕微變化， Cardiio就可利用 iPhone前置相機睇「面色」，再從變化次數計算心跳率，極方便！
Cardiio
支援機種： iOS
聽力測試
想知是否弱聽，不妨安裝 uHear，由專業聽力學家編製，會在測試中播放不同頻率，回答是否聽到後，就能計算出是否有弱聽問題，以及問題有多嚴重，方便及早發現問題求醫。
uHear
支援機種： iOS
私人教練
請來健身教練及運動明星如舒拉寶娃教學，示範過百種減肥瘦身及體能鍛鍊的運動，仲可依照個人狀況選擇訓練強度，跟住做，實 keep到靚身形。
Nike Training Club
支援機種： iOS、 Android
（註） Calorie Counter and Food Diary只有 iOS版免費， Android版需收費$30.94。
没有评论:
发表评论