�果日�- 世界��� - 左丁山

世界盃決戰 - 左丁山

與賓架M通電話，佢話好彩世界盃就快踢完，佢老公可以返回睡房瞓。為何如此？哦，賓架M嘅先生係標準球迷，有波打就在客廳睇電視直播，直至天光，頂唔順就會在梳化睡着了。賓架M問左丁山如何睇波？大家習慣唔同，左丁山早早睡覺，到晨早四點開波之時，已經起身開着電腦睇彭博、CNN、BBC嘅財經新聞咯，既睇電腦，也睇世界盃，冇失拖。


今屆世界盃進入八強階段後，戰情沉悶，原因係強隊怕輸，最緊要贏波進級，是否踢出漂亮足球，完全唔重要，總之成王敗寇，能捧盃的就是英雄。左丁山早前在此寫足球曾講過1950年代，全世界球隊打進攻足球，用WM戰術，兩後衛（左右閘），三中場，五個前鋒，以今天術語講就係二三五陣式，到咗2014年，足球時尚四二三一陣式，即四個後衛，兩個防中，三個進攻中場，一個前鋒，睇陣式就知道係先求固守，後求突擊，德國隊就係典型，而且前鋒仲係一位34歲老將高路斯㖭。50年代崇尚進攻，後來有聰明人諗到，Offence wins you match, defence wins you championships（進攻贏得球賽，防守贏得錦標），於是穩守突擊成為常態，正宗前鋒日趨寥落。今屆巴西整隊攻不銳，守不穩，德國隊自2004年歐洲國家盃慘敗後重新出發，以堅固防守穩定大後方，快速反守為攻，似第二次世界大戰之Blitzkrieg閃電戰，置巴西於死地，大勝七個一皮，釀成巴西國恥。


明早三點，德國大戰阿根廷，爭世界盃，以熱門姿態出征，是否贏梗？阿根廷吸收巴西大敗嘅教訓，對荷蘭一場準決賽，一於大打悶蛋足球，先求不失，美斯踢足120分鐘，竟然未試過在荷蘭禁區內踢到個波，一次都冇，除咗因為荷蘭派兩人跟住佢之外，阿根廷不敢輕易上前，亦係原因，阿根廷與荷蘭互守悶死觀眾之後，憑十二碼分出勝負，但美斯踢到加時已疲態畢露，阿根廷又比德國少休息一日，體力差少少，故此德國佔上風，理所當然。但不可不知，德國全憑中場發動攻勢，阿根廷用對付荷蘭招數，死守中場嘅話，德國冇咁易快速攻破阿根廷大門，呢場波好可能又係打足120分鐘，憑射十二碼分勝負。