試食王
Food Court放題 以麵取勝
香港人鍾意放題，貪佢抵食之餘，仲有不同菜式任試。最近尖沙咀寶勒巷開咗間新店大廚薈，格局十足十 food court，分為八個美食區，午市好似一般 food court各自售賣 lunch set，晚市時段卻以放題形式經營，一個價錢食晒咁多個美食區嘅菜，好似好抵，即刻 call個最大食嘅朋友去試吓真假。
一行入去，名副其實係一個 food court，但竟然有侍應帶位上菜，新開張，尚算企理。$198一位，收得平嘛，無計啦，都係食物質素重要啲。大廚薈有八間店進駐，好似跑馬地蓮園及小江南，喺放題食到都算幾特別。同友人先行一轉視察環境，返埋位枱上已經每人有兩隻蟹腳，原來係一人只限一客，可惜雪味甚濃，不禁令人覺得「死喇，中咗伏」。我哋一行三人，各有喜好，每樣叫少少，以免又中伏，好彩之後嘅食物都有番啲水準。首推刺身，新鮮無雪味，以放題嚟講，質素合格。其次麵類幾出色，小江南的擔擔麵、檳城媽媽的喇沙、泰越一風的遊船河都值得推介，不過食放題，話咁快俾一碗麵打爆 quota，似乎不合經濟原則。大食朋友意猶未盡，想繼續叫，但係我哋望住六張點菜紙，都係叫唔出第三輪，結論係小食類太少，而菜式大部分好 heavy。唯有轉戰甜品， sorry，得 5款，最令人期待的蓮園西米布甸，用微波爐翻熱變成軟軟爛爛，令人失望。平心而論，以呢個價錢食放題，質素唔係特別好，真係一分錢一分貨囉，值得讚係侍應服務態度殷勤，見我哋成枱食物無位擺，特別搬張細枱過嚟，非常細心，希望服務水準可以 keep住！
北海道雪場蟹腳（蟹味館）
一人送一客，好大陣雪味，蟹肉仲有少少霉，食少少已停手。海南雞飯（檳城媽媽）
冰鮮雞，實在不能抱太大期望，幸好雞油飯夠香，喺放題食咁多澱粉質都算第一次。刺身（ Okado JA）
大路的三文魚、吞拿魚、甜蝦等等都有，共 9款，比一般放題餐廳新鮮，食多幾轉回本。蝦餃（跑馬地蓮園）
點心即叫即蒸，蝦餃皮薄餡靚，可惜上菜時移咗位，影響賣相。甜品
有蓮蓉西米布甸、芒果布甸、桂花糕、馬豆糕、芝麻卷，個人最欣賞芝麻卷，其他唔係太甜就太淡。如果非常着重餐廳環境的朋友，應該唔係好接受到，食物係落 order，但飲品要自己去水吧拎。
評分
食物：★★★
服務：★★★
環境：★★
抵食：★★★大廚薈美食藝廊
The Open Food Gallery
地址：尖沙咀寶勒巷 26-36號華寶商場地庫全層
電話： 2739 1000
營業時間：星期一至日 10am-10:30pm
晚市收費：原價$298/位，新張優惠價$223/位， 8pm前結賬$198/位，身高一米以下小童八折（另加一服務費）撰文、攝影：試食王
hotpot@nextmedia.com
没有评论:
发表评论