CLOSE-UP
玩盡智能錶
近兩年，最多人關心的隨身 gadget，首選 smart watch。各品牌都積極出新錶，單單是 Samsung已出了三款自家製智能手錶，不過由於應用 app較少，所以始終炒不成熱潮。
今年六月經 Google一谷，情況即時有變，事關 Google特別為穿戴 gadget推出專用系統 Android Wear*，不單運作得更快更暢順，程式員更可針對性為 smart watch打造專用 app，大大提升手錶的實用性。想知 Android Wear有幾好用？
今次就搵首隻來港款式── LG G Watch，示範有幾好用同玩。
*Android Wear是 Google專為穿戴科技產品與手機互通資訊而設的作業系統，可應用於手錶及其他隨身電子產品之上。達人試玩
震動提示好弱，行街完全 feel不到， Lawrence話要將隻錶戴到最貼手，先會感覺到微震。
要一試 Android Wear的實用程度， Lawrence是不二之選，去年 Kickstarter集資手錶 Pebble在美國推出， Lawrence已搶先買返來試，仲自己寫埋 app擴充功能，對 smart watch十分狂熱。每次有新錶推出，即刻去電器店試用，或者問朋友借來試，不過礙於之前 Sony、 Samsung等出 smart watch，都無得寫 app加功能，終究燃不起買錶衝動。
聽到有 LG G Watch，第一時間幫手試玩，不過試完就話比想像中難用，「最初戴上手感覺良好，又快又順，同埋見到有好多 apps選擇，功能好似幾多。玩完一輪，就發現介面做得不夠仔細，例如平時用 Pebble，就是想不拿電話出來，直接在錶面睇到所有 notification；但而家用 LG隻錶，要㩒兩下入選單先睇到，仲慢過拎手機出來睇！」最弊是 Lawrence平日返工揸電單車， G Watch的屏幕在陽光下幾乎看不到，「不要說 notification，連時間都睇不清楚，即使校到最光都無幫助。另外，官網話搖一搖手可以叫醒隻錶，但試過幾次大力搖，都無反應，結果還是要用手指掂芒開錶。」
電量方面亦是一大敗筆，「即使不是經常使用，但隻錶未夠半日已流失四成電力，勉勉強強只捱到一日；但 Pebble就算開齊所有功能，全日狂用，都捱到兩日，不解決這個問題，隻錶做得再好都無用。」聲控易用
雖然 Lawrence狂數缺點，但他補充說 G Watch並非一無是處，「最欣賞是加入聲控功能，辨認準確度雖然差過 iOS的 Siri少少，但都可以接受，至少 Pebble就做不到。」不過，訪問完結前 Lawrence不忘叮囑記者，如果有 Moto 360，一定要找他試用，「其實只是 LG做得未夠細心， Android Wear仲有好多發揮空間，希望其他品牌會做到隻好錶。」
兩大功能
LG G Watch（售價：$1,898）是首隻由 Google開發、 LG代工的 Android Wear智能手錶，勝在有 Google做後盾，單計 apps已多過其他自家製智能手錶。
雖然未算盡善盡美，但聽完都好想試。買返來要點搞？其實只要用手機下載及安裝 Android Wear專用 app，再用藍牙接駁好手錶，就可在錶芒顯示聊天 app新訊息、 facebook新通知、來電號碼、計步器等功能。當中更有兩大功能，一定要識點玩。
即時導航
用手錶做導航，當然不及睇手機的大屏幕清楚，不過都有文字提醒你點行，反應都算快。
手錶都可以導航？無錯，配對好手機及手錶後，只要打開手機內的 Google Maps（須最新版本），設定好路線，手錶芒就會自動進入導航模式帶路。導航反應同手機差不多，如果行街搵路，只要望手錶就知點行，都算方便；不過，想有埋語音導航就一定要靠手機，對駕車人士幫助不大。
廣東話輸入
由於 Android Wear並無預設鍵盤輸入，想輸入文字，一定要用語音。除了支援英語，廣東話都一樣辨認到。只要對住手錶講「 OK Google」，再說出想做的動作及關鍵字即可，例如想搵地圖，只要講出地區名如灣仔、銅鑼灣、將軍澳等，都好易辨認到；但講到街名就成日出錯，例如「港灣道」就經常辨認成「香港灣道」。
語音記事方面，同音字都成日認錯，例如會將「約」譯成「虐」、「飯」譯成「犯」等，不過總體辨認能力都算不錯，就算句子較長都有七成準確。由於 Google Now智能助理功能在香港的用途非常有限，無法用廣東話或英語指示發短訊，亦不能回覆電郵，對住手錶講指示，通常只會得到搜尋回應，令語音輸入的實用性大減。
Android Wear內另一個預設功能是計步器，可簡單記錄每日運動量。
錶身幾乎無掣可㩒，唯一一個就在錶背充電位上方（黃圈），主要用來 reset「死」錶。
廣東話輸入的辨認能力幾好，就算講急口令，雖然錯字比較多，但至少聽到發音。
智能手錶發展史
講到智能手錶，其實已非近兩三年產品，前人一早勇於嘗試，不過由於功能過於單調，先至流行不起來。
1980s
Seiko於上世紀八十年代初曾推出不少多功能手錶，例如可儲存 24位數字的 NL C01，可與電腦連接的 RC-1000，但主要功能只是記錄資料，可說是智能手錶的雛形。
2000年
IBM WatchPad
IBM同 Citizen合作推出 WatchPad，運行 Linux系統，配備 74MHz處理器、 320× 240像素屏幕，並已內置藍牙。
2002年
Fossil FX2001
行 Linux反應麻麻， Fossil就嘗試引入當時得令的 Palm OS，手錶可以經紅外線將 Palm PDA資料同步。後來甚至有內置完整 Palm OS的 FX2008，毋須再接駁 PDA。
2004年
Microsoft SPOT
微軟試水溫之作，主要可在錶上顯示 MSN新聞及天氣等資訊，參與的品牌有 Tissot及 Suunto，最終反應太弱，無助微軟挽回頹風。
2012年
Sony SmartWatch& Casio G-Shock GB6900
智能手錶市場開始成熟，不少手機品牌陸續推出相關產品，例如 Sony的 SmartWatch，以及其後的 Samsung GALAXY Gear等，但全都只支援 Android。只得 Casio推出配合支援 iOS的 G-Shock，但僅可顯示來電及訊息提示。
2013年
Pebble
經 Kickstarter集資逾千萬美元研發的智能手錶，採用電子紙屏幕，可藍牙連接 iOS及 Android裝置，由於系統開放，所以有不少用家參與擴充功能。今年更推出鋼錶版本 Pebble Steel，香港人好快買到。必裝功能
講到底， Android Wear的原生功能有限，想有更多功能，就一定要自己裝 apps。其實自從 Android Wear專用 app推出後，已好容易搵到擴充功能；裝埋以下的 apps，先可發揮 smart watch用途。
遙控影相
Wear Camera Remote
只要開啟手錶內這個 app，就可以即時啟動手機的影相功能，不單只可用作取景，連擊錶芒兩下就可影相。帶埋手機腳架出街，就可輕易玩到遙控自拍。一站式介面
Wear Mini Launcher
為手錶裝完 apps，其實都幾難搵番出來，因為全部都收藏在功能表最下方的「 start」內。想更易搵到安裝好的 app，一定要裝 Wear Mini Launcher，裝完只要在手錶主介面左上角向右一掃，就可拉出已安裝 apps的介面。搵電話
Wear Buddy
大頭蝦最適用，當不知道手機放在何處，就可用手錶 app內的「 Find my phone」功能，遙控手機發聲，但大前提是必須已連接好手機，同埋在藍牙接收範圍內。方便計數
Wear Calc
以前都出過不少附有計算功能的電子錶， Wear Calc就可以為 smart watch追加計算機功能。由於按鍵面積不算細，用落都算不錯。雖然只支援加減乘除四項基本算式，但已經好實用。鍵盤輸入
始終覺得用鍵盤輸入更實在？並非無辦法，最近鍵盤 app開發商 Minuum已經着手推出第一款可在 Android Wear上使用的虛擬鍵盤 app，將英文鍵盤壓縮至佔手錶屏幕下方約三分一位置，然後再靠 AI聯想字功能，提升輸入文字的速度及準確度，甚至有埋標點符號選擇。唯一問題是只支援英文輸入，可密切留意幾時開始在 Google Play下載。
網址： http://www.minuum.com/watch
儲錢入貨
今年六月， Google在 I/O大會上公布專為佩戴式裝置推出的 Android系統，操作上更簡單方便，首批參與的品牌包括 LG、 Samsung及 Motorola。雖然今年內推出的 smart watch應該還有其他品牌，但 Apple的 iWatch傳聞因零件問題未必趕得及今年內推出， HTC暫時又只得一張洩密相，有把握可買到的，依然只得以下這兩款 Android Wear。
矚目破格
Moto 360
可說是今年最受注目的 Android手錶，圓殼加錶冠設計只此一家，比四方、長方形錶殼更似傳統手錶。硬件規格資料欠奉，暫時只知道將會在今年夏季推出。不過，有傳定價將超過港幣三千，如屬實的話都幾貴。
網址： http://www.moto360.motorola.com
Moto 360曾於 I/O大會上 demo過，完成度極高。
真正開放
Samsung Gear Live
雖然是 Samsung第三隻支援 Android的智能手錶，但由於前兩代只對應自家品牌手機，所以普及性一般。 Gear Live則開放對應其他 Android手機，配備 320× 320高解像 1.63吋屏幕，內置 1.2GHz處理器及 4GB內存，錶背設有心跳監察器，暫時睇規格高 LG G Watch一級，但售價反而最平，約售$1,560。手錶已在外地開售，但截稿時行貨仲未知幾時先到。
網址： http://www.samsung.com/hk改系統先夠用
作為第一隻用 Android Wear系統的 G Watch，雖然搶佔先機，但正如 Lawrence所講，使用時間及備用時間不夠長，震動提示亦不夠力。
想改善問題的話，可安裝由外國網友修改的作業系統，優化手錶通知的提示方式及備用時間。
試裝後，操作介面同選項都同原裝無分別，但操作反應明顯更快更暢順，震動力度亦比之前大，有來電或信息通知，都好易 feel到。最抵讚是耗電量都有明顯改善，就算用藍牙連接手機一日，都只用了約七成電量，非常實用。
不過，修改系統始終有一定風險，如果在過程中不慎與電腦斷開連接，手錶就有機會無法再啟動（俗稱「變磚」），拎番 LG維修，亦會因修改系統而失去保養，須支付維修費。
網址： http://www.rootzwiki.com/topic/207402-rom-gohma-10-772014-android-wear
下載自家製作業系統壓縮檔，內附的說明檔講解都算詳細，配合埋一般 DOS電腦知識，其實都不算難搞。
修改過的作業系統，在操作上雖然同原生系統無分別，但改善了震動強度同密度，就算無勒緊隻手錶，都一定感覺到。
没有评论:
发表评论