CLOSE-UP
跑住試 運動耳機
馬拉松大熱，近幾年人人話跑步，食住熱潮，成堆運動型耳機應市，又話防汗又話夠輕，總之講到跑步戴住聽歌包無甩拖，到底是否事實？
講多無謂，落場跑步測試最實際，試完先知邊款真正 fit for run。加上有防水耳機推出，可以一邊游水一邊聽歌，一於搵游水教練試聽！忌隔音太好
聽到要試耳機，四位跑手同埋蘇凱男都好雀躍，七嘴八舌交流揀耳機心得。聽到其中一款採用骨傳導技術，蘇教練即刻霸住試，「聽過這種技術，但一直未有機會試，毋須塞住隻耳都聽到歌，感覺好似幾新奇好玩。」
平時買耳機最緊要隔音做得好，蘇教練話跑街卻是另一回事，「因為要留意路面情況，隔音做得太好，反而未必聽到馬路狀況，一不小心好易被車撞到，好危險！」其次是耳機重量，太重不單只會戴得攰，跑步時亦會較易甩。另外，藍牙無線耳機會較適合跑步，因為不用插住手機，跑得較舒服之餘，亦不怕汗水沿耳機線滲進手機的插頭位，增加金屬零件氧化的風險；不過，由於傳輸信號較易受干擾，音質會不及有線款式穩定，正宗魚與熊掌。無線跑
蘇凱男，前香港田徑代表隊成員，香港長跑紀錄保持者，現為香港田徑總會註冊教練。今次由他率領兩男兩女學員，戴住五款最新款運動耳機（三款無線兩款有線），於中環海旁試跑半個鐘。除了測試佩戴舒適程度及音質，無線耳機更會試埋電量，睇睇電量是否夠長跑用。
耳聽八方
recommend：外形似頭箍多過耳筒
AfterShokz Bluez 2
採用「骨傳導」技術，耳機毋須塞入耳，只要將兩塊金屬片緊貼耳骨，就能靠震動將「聲音」傳送到聽覺神經，聽歌之餘更可聽埋周遭環境的聲音，夠安全。測試員蘇凱男（跑齡： 10+年）
跑後評語
戴得好穩陣，全程無跣下來，同埋好輕身，基本上好似無戴一樣，不會阻礙運動。骨傳導感覺幾得意，聲音不是直接入耳，似聽住喇叭播歌，如果音量可以再大聲點就更好。
壹評語
音樂雖然未算大聲，但跑街算聽得清楚，而且非入耳式，毋須擔心附送耳塞不合耳形，聽落亦不會侷促。揀歌掣在耳筒外側，好易㩒，但聲量掣細得來又放在內側，比較難㩒到。
以為 Bluez 2會戴得不穩陣，點知蘇凱男試完話無問題，跑步時可以完全緊貼。
萬一頭形真的較細，可以加條橡筋帶在耳機內側。
規格
剩餘電量：約 80%*
防水性能：未有提供
頻率範圍： 20Hz至 20kHz
敏感度： 100dB
阻抗：未有提供
重量： 43g
售價：$799
網址： http://www.aftershokz.com
*連續播歌一個鐘，再檢查耳機剩餘電量。磁貼
耳機內置磁石，放近即吸實。
Jabra Rox Wireless
配備 Dolby Digital Plus音效技術，音色比其他無線耳機優勝，貼心之處是耳機兩邊均有磁石，吸實時會自動進入待機模式之餘，仲可將耳機當頸鏈掛，方便攜帶。
試聽完 Rox Wireless， Tim鍾意它夠靚聲。
測試員 Tim（跑齡： 3年）
跑後評語
鍾意聽節奏感強的音樂跑步，用開的 Plantronics比較弱， Rox Wireless音質明顯好好多，低音夠強勁。不過，可能我大汗，跑的時候兩邊耳機都試過跣出來，有點論盡。
壹評語
試用後發現問題不大，最重要是裝上合適的耳托（有三款大小供選擇），跑了成個鐘都無飛脫。按掣同 Plantronics設計相若，好易用，記得在手機裝埋 Jabra Sound App，先發揮到 Dolby Digital Plus的強勁音效。不過防水性能較弱，用後不要拎耳機去水喉沖洗。規格
剩餘電量：約 85%
防水性能： IP2
頻率範圍： 20Hz至 20kHz
敏感度： 92dB
阻抗： 32Ω
重量： 19g
售價：$899
網址： http://www.jabra.com
源源供電
有軟膠頂住耳骨位，防止耳機跣出來。
Plantronics BackBeat GO 2 LE
採用 P2i軍用級納米塗層防水技術，外國傳媒曾測試過具備 P2i塗層的數碼產品，放在水中一小時後仍能運作，遠超其他防水技術的三十分鐘時限，防水能力十分高。耳機只重 14g，非常輕，最正是附送內置充電池的收納袋，用完袋住耳機時可順便充電，充廿分鐘就夠播一個鐘，就算忘記充電，都可做耐少少熱身「急補」。測試員 Ceci（跑齡： 2年）
跑後評語
低音好勁，如果鍾意聽節奏強勁的 party song，應該會幾 Like。耳機輕得好緊要，戴住跑可以話無重量。不過，跟機送的耳塞不太適合自己耳形，試勻幾款都有點鬆，間中要用手托一托。
壹評語
試用中 size耳塞跑步，亦無鬆脫情況，而且有軟膠頂住耳骨位，算幾穩陣，附送三款不同大小的耳塞，除非耳形真的很特別，否則問題應該不大。按掣設在耳機帶上，好易就㩒到， Like！
Ceci嫌耳塞 size不太適合自己，但就大讚耳機夠輕。
連接耳機至充電袋，一按袋面電量掣，就知耳機的剩餘電量狀態。
規格
剩餘電量：約 60%
防水性能： P2i
頻率範圍： 20Hz至 20kHz
敏感度： 104dB
阻抗：未有提供
重量： 14g
售價：$798有線跑
跑住試五款耳機，出來的表現各有千秋。
試完三款無線耳機表現，仲有兩款有線耳機，不過始終受制於條耳機線，整體表現不夠無線耳機好，但就毋須擔心無電同埋接收問題，一樣有捧場客。
顏色誘惑
recommend：軟膠設計得好 perfect，跟足耳形。
Bose FreeStyle
耳塞採用專利 StayHear設計，平均分散壓力，佩戴時幾舒適，而且仲有冰藍色及靛藍色兩個選擇，感覺夠潮。測試員 Mickey（跑齡： 1年）
跑後評語
好 colorful，一見就好鍾意，耳塞柔軟舒服，而且有個軟膠頂住耳骨位，跑全程都無甩出來，超 fit！不過條耳機線真的太長，跑的時候左 fing右 fing，有點干擾。
壹評語
耳機線的確頗長，就算將線夾在領口，依然有一大截會在跑步時亂 fing。
耳機顏色夠搶眼， Mickey話好吸引。
隨耳機附送的便攜袋一樣 colorful，但略嫌體積比較大。
飛人代言
膠勾與耳朵有小量虛位，佩戴時有點鬆。
SOUL FLEX
專登搵牙買加飛人保特做代言人， SOUL耳機無非想強調專為跑步而生。雖然採用有線設計，但扁平耳機線不會打結，跑步時未算太論盡。
對聽歌頗有要求的 Lawrence，認為 FLEX耳機音色不俗。
測試員 Lawrence（跑齡： 3年）
跑後評語
有玩開高音質 NuForce入耳式耳機，聽 FLEX時發現音質沒有給比下去，幾驚喜！不過可能我隻耳太細，繞住耳頂那個位不夠貼，跑的時候有少少鬆，好在無甩出來。
壹評語
耳頂那塊膠無得伸縮，試戴時的確未能勾實耳朵，跑步時間中要出手調整。規格
防水性能： IP5
頻率範圍：未有提供
敏感度：未有提供
阻抗：未有提供
重量： 18g
售價：$699
網址： http://www.soulelectronics.com水中聽樂 Sony NWZ-W273S
想做運動又嫌熱怕曬，可以去泳池游水，不過游泳池都幾悶，有音樂聽，先至可以游多幾個塘。想聽歌，可以揀 Sony的防水 MP3播放器 NWZ-W273S，最多可以落到兩米水深，去泳池一定夠用。實際戴住游水又點？今次就搵來卓毅游泳會兩位游泳教練測試。
封閉靚聲
耳機跟埋一般耳塞及游水用耳塞，不過因為游水用耳塞的出聲孔多了一層薄膜，會令音量減半。
落水前，二人先試耳機音質， Jack讚 Sony的播歌質素不錯，「平時都有用藍牙耳機駁手機聽歌，對音質都有要求。這隻耳機音質比想像中好，高音夠清脆，中音亦夠準，只是低音不太夠力。」阿希就最 buy隔音效能，「戴住聽歌，幾乎聽不到外界雜音，可以專心投入音樂世界。」
落水換塞
原以為可以直接跳落水試聲，但當 Jack得知要先換游水專用耳塞，就話有點麻煩，「專用耳塞多了一層防水薄膜，會減低音量同埋影響音質，平時不會用；最怕落水前忘記更換，整壞耳機。」
講到尾，二人更關心練水時會否好易甩，不過，試齊自由式、蛙式、蝶式及背泳後， Jack大讚掛頸設計都夾得好穩陣，「就算轉塘掉頭時，耳機都無鬆脫跡象，可以放心戴住游。」
Jack
26歲
資深游泳教練
Jack最 like快充功能，充三分鐘電就可以播一個鐘歌，快過食杯麵。
阿希
26歲
資深游泳教練
戴住耳機游足廿幾分鐘，阿希話戴得頗舒適。先天問題
快速連游幾個塘，耳機都無鬆脫，不會影響練水節奏。
雖然都可以聽到音樂，不過，阿希話始終在水底呼氣都幾大聲，即使將耳機校到最大音量，最會受到干擾，「相信都無辦法可以解決，但如果慢慢游，上水面先換氣，就不會有此問題，都適合游水用。」耳機未算完美，但二人都異口同聲話六百零蚊買來做運動同練水，不用再袋手機播歌，非常抵用及方便，試完心郁郁想買番隻。
規格
記憶體： 4GB
防水效能： IP5/ IP8
連續播放時間：約 8小時
充電時間： 1.5小時
重量： 29g
售價：$680
網址： http://www.sony.com.hk共享音樂
Avantree Priva（紅圈）又細又輕（重 23g），帶埋出街亦不太累贅。
約埋朋友一齊跑步，如果想帶少部手機都有歌聽，可以考慮買 Avantree Priva藍牙發射器。將發射器插入手機的耳筒位，不單可將音樂無線發射到藍牙耳機，由於可同一時間配對兩隻耳機，更可同朋友一齊分享音樂。不過，音樂始終經藍牙傳輸，二人跑步時不能相距太遠（官方數字話 10m），要遷就一下。
售價：$340
網址： http://www.avantree.com防水性能
好多運動耳機都會標明 IP（ International Protection Rating）防水效能等級，其實 IP主要可分為 8級，每個級別代表不同的防水能力。不過，頭 4級只抵擋到小量水滴及汗水，如果想落雨依然聽住歌跑步，揀耳機時就至少要第 5級別或以上，游水的話，就更加達第 8級先得。
5級：每分鐘噴射 12.5公升水往機身任何位置， 3分鐘內器材仍可正常運作。
6級：每分鐘噴射 100公升水往機身任何位置， 3分鐘內器材仍可正常運作。
7級：可於 1米水深正常運作 30分鐘
8級：可於 1米至 3米水深正常運作 30分鐘
只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。
没有评论:
发表评论