�果日�- 曼谷�泰� - 左丁山

曼谷兌泰銖 - 左丁山

去曼谷之時，在飛機上突然碰到「肥佬黎」同一位年青少婦，當堂為之一驚，急急閃在後面，預備偷偷望真啲先至相認，好彩一望之下，先知道呢位係「四十歲肥佬黎」，搵佢做二十年前嘅占美黎替身，略為化裝就可誤導狗仔隊，但今天嘅肥佬黎比機上呢位仁兄大概重多二三十磅，佢唔容易扮做替身咯。到了星期日晚在香格里拉酒店香宮晚膳，一入門又碰到「肥佬黎」，乜咁邪呀，呢次一於企定定，望到「肥佬黎」實，佢完全冇反應，望到佢嘅面形有八九分相似，但身形更肥大，佢一企起身就要揸枴杖，咁又會似七十幾歲嘅肥佬黎喎！

如此巧合，前所未見，回程時又見「四十歲肥佬黎」同機，幾乎想問佢攞卡片。

依家去泰國，使費幾划算，一蚊港紙可兌四銖，到Siam Paragon嘅超市代秘書V買Blue Elephant嘅紅咖喱，將價錢除四，當然係好抵！話泰國零售服務好到加零一，香港冇得比，就係因為佢地伙記多，例如賣咖喱嘅泰國食物部，就有六七位阿嬸着晒整齊制服企響度，為顧客搵貨，換轉在香港任何超市，何曾會見到如此陣容呀，這當然與工資低廉及工人供應充足有關，香港完全無此條件。

但係兌錢要有啲腳骨力至得，機場等行李之時，見各銀行嘅牌價係港元兌3.64，美元兌30.08，一睇就知道唔對路，泰國有黃衫軍示威之後，匯價連番下跌，點會企得咁硬。後來去到香格里拉酒店，見到一美元兌30.8，酒店牌價竟然高過銀行，完全不合常理，可見機場銀行兌換，食水好深。第二日到咗Paragon，樓下麥當勞對上有一小店叫做Western Union，一美元兌31.45，似啲樣嘞，再搵之下，在一樓136號舖（Paul Smith嗰層），要行到尾尾近停車場，行足三四分鐘，有一間P&P Jewelery，掂嘞，美元兌31.75，港元兌4.06，好似樣噃，用港紙兌就蝕底啲，（照除係7.82，香港價係7.75），早料有此一着，在港用港紙兌換了美元，再在P&P用美元兌換泰銖，可以着數少少，奉勸各位去曼谷嘅老友，曼谷機場兌換泰銖，可免則免，畢竟4.06與3.64，相差11.5%，而泰國購物VAT係7%，慳番嘅匯價，已夠俾購物銷售稅。