【星光耀峇里】張曼玉透黑Bra 邱淑貞細女繼續搶鏡

2014-08-27 21:13:00

曼玉現身機場時，透出黑bra。

鍾鎮濤及范姜日前喺峇峇里完婚，賓客都相當盡興，而佢哋班老友包括張學友﹑張家輝及周麗淇，噚晚率先由峇里返港，而其他老友包括邱淑貞﹑羅志祥﹑上山詩鈉﹑張曼玉﹑梁家輝一家及葉童夫婦等，今午亦現身峇里機場，準備坐飛機返港。

今午兩點，羅志祥與男友人現身機場，問到佢接咗花球係咪開心？佢笑言：「好好玩。」但同女士鬥爭花球，係咪心急結婚先？佢只係話只是好玩而已。

周汶錡（Kathy）同老公之後現身，Kathy表示已送咗份大禮畀B哥哥，又話喺B哥哥婚禮舉行前，已同老公到峇里玩，咁有冇造人先？Kathy即尷尬話：「順手啦﹗哈哈。」

而梁家輝及曾志偉現身機場時，唔少旅客認出兩人，爭相同佢哋合照，志偉表示：「（婚禮）好開心，冇得頂﹗個個都有喊，未參加過一個咁特別婚禮，最感動係佢哋仔女做見證，個個都好高興，先會為B哥哥喊。（劉嘉玲冇到？）佢就唔到期。」

兩點十五分，大隊殺到機場，包括邱淑貞一家﹑上山詩鈉﹑杜德偉夫妻﹑梁家輝一家﹑鍾鎮濤兒子﹑鍾懿﹑鍾幗﹑葉童夫婦等，辦理登記手續，而兩點廿分，張曼玉亦到達機場，佢甫見記者即左閃右避，杜德偉就帶佢去排隊，之後曼玉仍大方影相，並透出黑bra，相當性感，佢就話玩得開心，咁有冇感動到喊？佢就點頭示意，之後同記者講咗句多謝，仲話唔該晒，然後再潛入大隊裡面，繼續低調。

另外沈嘉偉細女沈晨繼續搶晒一眾哥哥姐姐鏡，精靈活潑，佢拎住玩具玩，又喺櫃位左望右望，表現好奇，但峇里機場就未見鍾鎮濤及范姜兩公婆。

另外，葉童老公陳國熹噚晚high爆舉中指？佢就話：「B哥哥結婚，開心冇所謂。」