連日謠言滿天飛，上星期五早上有人在WhatsApp放料，指黎智英策劃佔中，預先透過三大行沽空咗1萬張恒生指數期貨，但冇講到在甚麼水位沽空，但似層層咁講肥佬黎呢鋪會賺十億元，計一計數，一萬張沽空期指賺十億，即每張賺十萬元，以每一點係五十元計，即係每張期指賺2000點。究竟肥佬黎在甚麼點數沽空，甚麼點數平倉獲利，放料者全無交代。
上星期五股市大幅度震動，恒指最低見22565.40，最高見23147.95收市報23064.56升131.58點，上下波幅有582點。大市似已喘定，佔中效果反映晒，除非再有大規模衝突或流血事件發生。但資深市場人士皆知華爾街大鱷有一句投資格言：街上流血時，股市掃貨日！啲職業、專業投資者嘅集體智慧就是不怕大亂，不怕停市。
以此推論，如果肥佬黎聰明到老早在（9月3日至9月8日）25200點沽空，叻到在22500點平倉，就會賺足2640點，直情係股神，叻過索羅斯，但不可不知的是，一個戶口沽空一萬張期指，買入一萬張期指平倉，因數目太大，必會影響期指上落，可從期指成交數字睇得到，冇得呃人。可能下一次放風，有心人就會講肥佬黎有好多個人戶口。
左丁山收到呢啲傳言之後，雖然一笑置之，但有人為咗反佔中，以攻擊肥佬黎為樂，還是忍不住，索性將傳言再WhatsApp肥佬一次。十幾分鐘後，肥佬立即回覆，斬釘截鐵否認佢有任何買入或沽空期指，亦無捐過一毫子搞運動。咁又係，香港一切證券交易，皆有電子紀錄，只要有異動行為，證監會向證券行一查便知，交易無所遁形，建制派人士咁憎肥佬黎，夠膽放風指佢沽空一萬張期指獲利，不如索性向證監會投訴肥佬黎涉嫌內幕交易吖，有膽講，怕乜去投訴噃，沽空一萬張期指，最低孖展按金係八億元以上（每張期指要八萬至九萬元），擺低八、九億，收番十五億，賺十億，相等於買中一隻兩倍零熱門馬獨贏，但做孖展旨在以小博大唔係以大博大，呢個係簡單投機道理，建制派人士要放料罵人，怕要首先學習吓先至得。
HH
没有评论:
发表评论