蘋果日報- i6新配件晒冷　玩藍牙飛燈

i6新配件晒冷　玩藍牙飛燈

iPhone 6推出已一個多月，唔知大家入手未？經過一輪炒賣，踏入10月下旬即成為用家樂園，好似新到一堆accessories，樣靚又實用，如新推出的一款藍牙閃光燈，就能夠喺30呎內「飛燈」，仲可以45度玩side light自拍，一改手機一定要正面閃燈的缺點，也不會令影像過份曝光。
記者：陳國輝
攝影：陳永威

一個月時間唔算長，但講到iPhone 6配件，唔少廠商都爭住出！例如搶閘機殼品牌有美國Element Case、德國Laut，連瑞典Happy Plugs都有份。要留意唔係隻隻機款都齊全，好似美國OtterBox就暫時只得i6型號，大芒版i6+就要等到11月先到貨，另來自日本嘅Roberu皮革保護套，亦即將於本月尾到貨，如果你手上已經有機，最好忍一忍手啦！

■當同時有幾盞Nova閃光燈在附近，手機會自動連接最近的一盞，想玩兩盞就要裝多個app。

一次駁兩盞　40種閃法
新i6配靚鏡頭，而且Plus更加入光學防手震技術，影相梗係靚啦！只可惜，閃燈位依舊設於鏡頭側邊，呢個定律始終不變，搞到自拍人士嬲到震，皆因閃得太近，塊面實爆晒光。

唔識美國Nova唔緊要，但無線閃燈一定要知，佢好簡單咁透過藍牙連接，能夠喺30呎範圍內玩「飛燈」，畀錢裝多個app的話仲可以一次過駁兩盞，打side light、back light基本上毫無難度！雖然只係普通LED而非專業閃光燈，但影半身足夠有餘。現場試玩，仲發現個app內置Gentle、Warm、Neutral以及Bright四種預設模式，另有逐級手動調校，總共多達40種閃法，細細件平時出街或拎去旅行用，啱晒！

■最多可駁兩盞作同步，但留意LED無法持續發光，即係話唔能夠用作拍片打燈用。

側光實戰

玩自拍易Over
LED始終是強光，你睇模特兒塊面爆到冇乜detail就知；唔建議自拍，不過搵人拎住打燈，效果會靚好多。

微距質感豐富
當環境唔夠光，影微距或比較困難，今次示範影植物，在一定距離打側光，葉片質感豐富，很有立體感。

Nova藍牙閃光燈
支援系統：iOS、Android OS

無線範圍：約30呎

連接：藍牙4.0LE

電池備用：14日

持續使用：50至300次

價錢：約$460（a）

重口味煎雙蛋
潮牌Candies上幾代憑Sleepie、Massage Hero以及Crack'a Cracker等浮誇機殼設計，深得潮人歡心；其i6產品再走同一路線，Black Swan已玩上三尖八角，Splat Sunny Eggs嘅設計更唔知點樣放入褲袋，反而手袋設計比較美觀實用，仲可以插多張信用卡。若喜歡優雅一點，玩"Handmade in Japan"嘅Roberu可能啱你多啲，全皮革物料，有深淺顏色選擇，更值得留意當然係人手嘅車線以及剪裁啦！

■Splat Sunny Eggs 約$234（b）

■Roberu iPhone 6/6 Plus Leather Case售價待定（c）

■Black Swan約$195（b）

■Wrislet Clutch Temptress約$429（b）

兩米防跌保護性強
除咗藍牙閃燈，i6配件暫時也集中於機殼，講保護性強可選OtterBox，其中最硬淨嘅Defender有三層設計，聲稱能抵受兩米落地撞擊，但拎上手又厚又重，平日拎住行街未必方便；反而其餘兩款就以薄身堅固為賣點，易襯衫。

同屬美國的Element Case亦推出咗ION及Soft-Tec，前者採用耐用度高嘅樹脂物料，再搭上碳纖維背板；後者則主攻防跣以及人造麂皮物料，藉以提升握手感。