外國外來影響 - 左丁山
田大少北俊咁有膽識，身為建制派，反佔中派，竟然要求梁振英自動向中央政府請辭，被全國政協踢走後，好多人豎起手指公稱讚佢，如果今日就有立法會選舉，田大少或參加地區直選，勝出機會高於七成，如果與葉劉淑儀單打獨鬥，葉劉輸去議席嘅成數好大，不過葉劉有比例代表制保護，在中聯辦力保之下，在2016年立法會選舉連任，殆無疑問。
中方砌佔中派，最初指佔中三子等等有外國影響，泛指美國英國，後來梁振英對外國記者講：「佔中有外來勢力支持」，原來外國影響係foreign influence，外來勢力係external forces，有乜分別呢？香港電台英文台訪問葉劉，葉劉話台灣太陽花運動策劃人曾到香港，十月七日在金鐘出現！記者問：「台灣係中國一部份喎？」葉劉答：「所以唔係foreign，而係external」（大意如此），葉劉曾出書教人學英文，用字準確，聽佢咁講，現在佔中（佔領運動）有齊外國，外來影響，為確保香港繁榮穩定，要嚴防「外外外」呀。
據報佔領金鐘人士之中，有不少係外國留學生，從佢地嘅講英文習慣及發音就知道。醫生C係民主運動老手，因1989事件回流香港，佔領金鐘唔少得佢嗰份；今日之事令佢回憶1989，曾勸一啲「外國留學生」及本地學生部署撤退，結果俾人鬧到知難而退，可見代溝嚴重。葉劉出嚟指學生有外國、外來影響，真係浪費時間，點會恐嚇到啲年輕人呀。
探討吓葉劉背景，佢一生所受教育，皆有嚴重外國「腐化文化」影響，讀中學係番書女（聖士提反女校），大學讀港大英文系讀啲英國才子佳人文學，畢業後做港英政府政務官，飽受殖民地官僚訓練，港英又送佢去史丹福大學受訓，回歸後步步高升，做到保安局局長，因2003年二十三條立法而掛冠，私人再到史丹福讀書，師從Larry Diamond（史丹福之「民主、發展暨法治研究中心」所長），回港後言必史丹福，開口埋口講矽谷，搞智庫就搵埋成班史丹福嘅香港尖子埋堆，成個人嘅思想思維根本係由英美影響力塑造嘅，可能佢有在公餘時間閉門讀中文，讀中國歷史啩？但由佢企出嚟指責學生受外國、外來影響，何來有說服力？反而長期愛國不惜忍受低薪，在愛國學校工作而唔去英美攻讀博士學位嘅港大畢業生曾鈺成就對記者話：我睇唔到有外國影響，佢（指CY）睇到，我睇唔到！老愛國係老實一啲嘅。
HH
没有评论:
发表评论