�果日�- ���商人 - 左丁山

黃絲帶商人 - 左丁山

外省商人A自上海回港，搵左丁山在中環飲下午茶，要聽吓香港最新情況喎，商人A為咗貿易生意，經常在上海駐紮，往往一去就幾個星期，佢話上面媒體封鎖消息，上網睇唔到啲敏感話題，故此急不及待要搵左丁山八一八佔中新聞。


有乜好八吖，習近平已經標籤咗梁振英係「忠臣」，其他人若膽敢在中央放冷箭，篤「忠臣」背脊，必然係小人啦，難怪田北俊早前講咗句要梁振英考慮向中央辭職，就立即被貶為庶民，以後冇資格上京開會。商人A話：「即係我以後在上海見官，都唔好彈香港特首咯噃？講吓都唔得，我地呢口氣幾難啃，回想2012年我地外省幫個個挺唐，初時我喺上海聽到嘅消息係唐唐坐定粒六，中央力挺咁話，香港外省商人唔知幾高興，點知習近平訪美之後，風雲變色，我地啲上海幫選委朋友紛紛接到指示，要轉軚挺梁，大家幾乎同聲一哭。總之北京想邊個做就係邊個做，啲選委係奉命投票嘅啫。當時習近平還未登位，由董伯伯陪同訪美，外省籍選委傳言，係董伯伯力薦CY，加上胡溫即將退場、江澤民指示再無人理會咯，於是北京派劉延東到深圳見啲香港大人物，要佢地棄唐保梁，藉口係梁有更高民意支持度，辦事有能力咁講。你話吖，鍾庭耀真係亥時出世，嗰陣調查到梁振英民望低咪好囉！」


諷刺嘅係，現在梁營有人不斷大駡鍾庭耀「製作民意」，民意調查係「假科學」。與商人A傾咗成個鐘頭，左丁山問佢有冇同子女不和，因為佢個仔在美國留學，女就在科大讀書，分分鐘係黃絲帶噃。點知商人A細細聲話：「我一返嚟，個女就要質問我係黃抑係藍，我同佢講，爸爸生意在大陸，不能公開支持佔中，在商界場合，我一味避得就避，但如果阿女去金鐘露宿，我唔反對，經過2012年特首競選一役，我邊會相信中央會俾香港真普選吖，邊個可以入閘，都係中央決定嘅，選委或甚麼提名委員只是舉手機器。唉，如果係阿唐做特首，相信香港唔會搞成咁。」──嚡乜鬼噃，阿唐已經係政壇過氣人物，仲講嚟做乜，佢𠵱家唔知幾好福氣嘆世界，十分優游，可講係幾生修到。拜拜之時，商人A忽然話：「都係你地廣東人有義氣，我越來越佩服李嘉誠，佢在2012年始終冇轉軚棄唐，睇人係有眼光嘅！」

I