http://nextplus.nextmedia.com/news/spot/20141227/129102

《回顧系列》2014潮語逐個數｜壹週Plus｜Next Plus

要追上潮流，一定要學識潮語，如果唔係，你俾人話你「厚多士」，或者俾人問你係咪「hehe」，你都唔知人地講緊乜。

喺踏入新一年之前，等我地為大家介紹幾個2014年熱門嘅潮語啦。

1. 厚多士︰話說早前有位強國阿姐「惡人先告狀」，晌車廂內同個仔兩人霸三個位，更於車廂進食，旁人「睇唔過眼」出言指責。但這位強國阿姐不單沒有收斂，反而破口大罵︰「你厚多士！你厚多士！」之後更指對方「食菜肉」、「你又唔係洋蔥圈」。（解讀︰厚多士＝好多事，「食菜肉」＝食錯藥，「洋蔥圈」＝梁振英）

2. 榴槤乜乜乜︰有位反佔中阿哥接受電視台訪問時，解釋自己點解要帶刀仔去反佔中。佢話自己好鍾意食水果，去到邊都要食，鐘意食「榴槤乜乜乜」，講到自己好合理咁，於是「榴槤乜乜乜」亦成為本年度嘅「萬能key」。

3. HEHE︰HEHE，並唔係笑咁解。雨傘運動期間，學聯秘書長周永康同副秘書長岑敖暉出生入死，網友更話佢地經常眉來眼去，即指兩人係HEHE(亦即係同志咁解)，FB更出現捍衛HEHE團嘅群組。但查實，周永康已經有女朋友，HEHE傳聞，都係得啖笑啫。

4. 鳩嗚︰由雨傘運動衍生出來的另一項抗爭活動。早前，有電視台記者在採訪反佔中遊行期間，訪問遊行者為何現身在遊行隊伍？受訪者竟用半咸淡廣東話回應︰「鳩嗚……買野呀。」自此，「𡰎嗚」有了全新的定義。

回顧2014年度，除了不少奇人異士主動出擊，為政府及中央護航，也有不少「口誅筆伐」者歇力為阿爺出力，其中三位代表人物分別是蔣麗芸、鍾樹根及葉劉淑儀。

民建聯副主席蔣麗芸年初佔領遊輪時已一展氣勢，卻因經常被叫「元秋」而發脾氣，出席城市論壇又被主持人謝志峰連番質問至「口啞啞」，就連黨友曾鈺成也勒令要她少講無謂說話，認真慘情。

民建聯鍾樹根是「開口夾著脷」的表表者，今年中以低質英語怒插港鐵行政總裁韋達誠，爆出金句「shame on you」以及「answer me」，其後又錯講「明張目膽」，更在立法會會議上疑似爆粗，不滿遭立法會議員范國威出言「悔辱」，強調自己「講所有四字詞語都好正」，淪為網民笑柄。

至於行政會議成員兼新民黨主席葉劉淑儀，則經常出席電台節目大談佔中，指佔領運動背後有外國勢力，學聯上京向北京反映只為「搏見報」，又多次表態撐警方執法，感慨有警員要吃別人吃剩的半個飯盒。