【動醒晨】佔路風波成新聞主角 茶店店主：香港人活得最辛苦
後巷「佔道」風波，與世無爭的中環品茶小店，登上港聞版，有律師唔做、寧願回歸大平山街小社區「日入而息」的店主陳穆儀(Nana)，無端成為新聞主角，「只係喺facebook吐吓苦水，無諗過咁大迴響」。這個寶島出生、香港成長，又在英、法兩地生活過的Nana，千帆過盡，回到她又愛又感到歎息的香港，直言四地之中，營役又忙碌的香港人，活得最辛苦。
記者：呂麗嬋
因為愛茶愛到身光頸靚夠膽死衝入街坊茶餐龐，纏著水吧阿叔拜師學沖「港式絲襪奶茶」，又為印度行山時遇上的一杯地道奶茶，大為感動，Nana這個人，就是奇。三年前落戶太平山街的「Teakha茶‧家」，是她開的店，也是文化人的聚腳點。蘇絲黃在她的專欄，形容這裡出品的Scone，全港no.1。剛過去的週末，就有獨立音樂人自發到門外的公共空間自彈自唱，吸引不同國籍的人駐足欣賞。
觀眾之中，既有手拿小店熱茶的客人，也有只來聽歌的街坊，人人席地而坐，氣氛自由。只是，這個秘密花園，卻因屢被投訴佔用行人路，遭食環署檢控，面臨停業一星期，Nana說很無奈。「係好氣憤，之前發起簽名行動，抗議食環署做法，但說佔領，就有點言重，我只係呼籲市民帶坐墊或椅子到現場享用公共空間，爭取應有嘅權利」。
長髮飄逸，說話陰聲細氣，Nana有齊寶島女生的特徵，對於有人批評她以「公共空間」為擋箭牌，佔路只為多做生意，小妮子很委屈。「如果係咁，之前就唔會租埋毗連嘅地舖，後巷已有告示，寫明係公共空間，任何人都可以用。」她伸冤。「之前諗過喺台灣開，嗰邊地方大，或無今次風波，但只係一百間小店入面嘅其中之一；喺香港，意義唔同，呢度點解就唔可以有另一種生活方式？」
大抵，寶島溫柔女生的外形，只是愰子，港女「偏向虎山行」式的強悍，才是本色。Nana卻笑統統也不是，是怯！「好多人問我點解咁大勇氣，可以放棄唔做律師，現實係我掙扎咗幾年，擔心走出安穩嘅環境，第二日無收入究竟會點？」出生小康的Nana，是家中大家姐，對下還有弟妹。母親是台灣人，出生及完成小學，即隨港人爸爸移居香港，再到英國讀法律。
平平穩穩的康莊大道，畢業回港做律師，一做四年，「其實唔係好適合自己，儲咗啲錢，下咗好大決心先敢辭職」。07年，放自己一個悠長假期，選定到花都進修，不過科目，仍是選了熱門實用的MBA！只是，這一年，走出趕忙的香港，在罷工最盛行、一個晚餐可食足五小時的異地，她終於找到真正想過的生活。「法國人好注重生活享受，係真正嘅慢活」。畢業回港，愛旅行又愛上造甜點的她，邊以兼職形式替英文雜誌寫飲食旅遊稿賺生活費，對於從小到大開茶店的夢想，她念念不忘。
「有朋友帶我嚟呢一區閒逛，原本呢度係車房，咁啱招租，後會有條小巷，一見到就好鍾意」。小店開了，位置偏僻，座位也不多，想不到口耳相傳，很快便聚集了一班同樣厭倦營役生活的香港人。「有啲嘢好微細，但你會覺得好窩心，坐隔離唔識嘅客人，可以因為嗰餅好靚，share食物；有人話俾我聽，我以前只係鍾意飲咖啡，因為呢度，我鍾意埋飲茶」。
小小社區，不定期舉行音樂、手作為主題的活動，小店之間又合作搞露天電影放映會、無炭單車團，茶店五天營業，她甚至出版了實體的「茶書」刊物，每月介紹兩款茶的故事，附上小茶包，郵寄給同樣愛茶的人，「就好似一封關於茶嘅信，打開信箱見到，希望提醒人慢落嚟，飲一杯茶」。理想與現實之間，有人認為是妥協，Nana卻信可以是一種選擇，信不信由你。 
I
没有评论:
发表评论