富家子破產 - 左丁山
十二月二十四日聖誕前夕，下午三時過後，人人準備離開寫字樓返屋企或者參加聖誕聚餐派對，左丁山還在寫稿，諗住遲少少離開中環，交通冇咁擠塞箒。大編輯手機就傳來一張圖片，話灣仔交通大亂，塞車驚人，發生乜嘢事？原因係告士打道有一架解款車跌咗錢箱落馬路，現鈔跌出箱外，其他司機停車落馬路執錢，交通警察趕到維持秩序，於是後面梗係塞車啦。跌錢箱之人唔通扮聖誕老人，特登撒錢為樂還是另有別情？
寫寫吓，突然還有電話到，就係賓架P，佢話是日虎報第26頁有一份通告（破產進程），列舉2015年1月2日至3月13日之八個破產個案在高院召開債權人會議，其中在1月9日召開之個案就係Lam Rogerio Sou Fung，賓架P問：「你估係唔係名公子林秀峰呢？」應該係嘞啩，林公子嘅英文名就係Rogerio吖嘛，都唔出奇吖，較早前係有報導，有債權人向高院申請林公子破產嘅，問賓架P有無借錢畀林公子，賓架P答得妙：「此乃私隱，不能回答你，不過我地銀行對不少人有紀錄，有長久記憶（long memory）。」銀行有晒紀錄，梗係有long memory啦，不過賓架P自己就係著名記憶力驚人嘅賓架，又經常翻閱香港名人錄，Dictionary of Who's Who之類，佢唔記得之人，好打有限。回心一諗，聖誕前夕下午近四時，還在銀行睇英文虎報嘅法律通告？係唔係下屬剪報呀？賓架P答：「梗係自己睇報紙啦，所有有關破產嘅法律通告我都會睇勻。」咁鬼勤力又有記性，佢啲下屬做Credit Administration（信貸管理）嘅，唔勤力有鬼，做少啲準備工夫，都會俾賓架P問到口啞啞呀。講起破產呢回事，有啲人怕怕箒，有啲人就驚都未驚過。破了產係好唔方便，但所有債務一筆勾銷，最多踎監，十年八年好未，屆時叻仔者又係一條好漢，爛人呢就繼續咁爛下去，你幫佢手賺自己激氣。一啲富幾代破產喎，更輕鬆，頂多踎幾年，出到嚟自有家庭信託照顧，衣食無憂，餐餐「有人請」，仍然大吃大喝，啱啱遇到債權人坐在隔籬枱，債權人會激氣到食唔落日本和牛。好多年前，賓架X就受到教訓，佢捉住一位富三代公子L為公司貸款簽擔保，後來公司財困，賓架X要公子L還錢，點知公子L話：「我屋企信託有錢，每個月畀錢我使，但我私人冇錢冇資產，你bankrupt我啦。」激到賓架X退休後多年仍然提起此事就要講粗口。
I
没有评论:
发表评论