壹週刊 - 1309 - hotpot 搭廉航玩迷你兵 大阪

登機證

搭廉航玩迷你兵　大阪

廉航大戰，大阪向來是主戰場。 Jetstar最近再加開香港直飛大阪航道，最平$499都有交易。難得大阪又配合，不停出現新搞作，女士主導的十二層高購物商場 Lucua 1100剛開幕，正常吖，特別在連大阪少見的魚市場加即燒海鮮餐廳都出現埋。
不過，如果係一家大細齊出發，唔使諗，環球影城依然是首選，趁大熱動畫《迷你兵團》（ Minions）即將於七月全球上畫，特別加設全新園區「 Minion Plaza」，有 Minion嘢食有 Minion game玩有 Minion騷睇仲有大量 Minion精品發售。
建議阿爸阿媽幫個仔扮成 Minion入場之前，自己都投入少少，著到成個壞蛋獎門人咁就差唔多。

迷你兵有個迷你區

動畫《壞蛋獎門人》（ Despicable Me）於 2010年上畫，全球票房五億四千萬美金，紅咗配角迷你兵團。到續集，戲份加重，全球票房更暴升到八億三千萬美金。一隻識生金蛋的雞誕生了，難怪今年配角變主角。
大阪環球影城嗱嗱臨整個新場區，面積完全唔大，嚴格嚟講，只係一架賣 Minion狀小食的餐車，加一個重現電影情節的攤位遊戲，加一間精品店，加一條排隊買爆谷的人龍，講完。你唔好理，啲爆谷，兩小時未夠已經掃清，香蕉味爆谷唔好食唔重要，最緊要個 Minion爆谷盒夠可愛。到表演開始，幾隻大大嚿迷你兵走出來唱唱《 Banana Song》之嘛，圍滿觀眾，原來，個騷做乜都唔重要，最重要係散場後， Minion留低任你集郵，嘩，開心到啲小朋友呀、少女呀、阿媽呀，癲咗一樣，似港女在百貨店見到 Le Creuset大減價，又似 Tree Gun見到日本櫻花。
那一刻，我的反應是，點解迪士尼唔拍番齣用三眼仔做主角的《反斗奇兵》外傳？

 

 

有睇過《壞蛋獎門人》，應該記得呢個射罐遊戲。電影中，三個養女射極唔中，射中都唔跌，嬲到壞蛋獎門人拎支大炮來一鑊熟。可惜，啲獎品唔係獨角獸，無跟足原著。

唔好行完 Minion Plaza就心滿意足，在其他園區的餐廳，都可以搵到 Minion踪影。香蕉夾杧果 cupcake$30（前）、香蕉夾朱古力 cupcake$30（後）、 Lemonade$33。最後排企喺度的公仔，就係搶到癲嘅爆谷盒，賣$161。

 

所謂的 Minion餐廳只係餐車一架。 Minion豬肉包$33，一串三粒甜品$26味道竟然唔太差。

 

精品店就真係成間鋪咁大，大部分精品已經斷貨，剩低的，以下面本記事簿最吸引，賣$130；又或者買左邊的曲奇當手信，$104有兩包，好過又係固力果。

 

表演完畢，大人細路都衝出去合照，不少人也非常有誠意地 cosplay上陣。

 

阿媽，我睇唔到嘢呀！

最新芝麻街遊戲　八歲以上禁

迷你兵太紅，又潮，搶晒鏡。其實環球影城今期的重心推介，本來係芝麻街。仲芝麻街？係，仲芝麻街。小朋友專區環球奇境 Wonderland，裝修後重新開幕，用 Hello Kitty、 Snoopy同芝麻街做主角，加咗兩項新遊戲： Elmo GoGo滑板，同埋 Moppy熱氣球之旅。 Well，講明小朋友玩，當然係零驚險有啲悶啦。如果你的同行成員全部八歲以上，建議即刻去排 Harry Potter或者 Spiderman比較划算。

Moppy熱氣球之旅，升你上去，轉轉轉，玩完。勝在顏色美麗，立體咁滯，唔係，係真係立體，小朋友當然玩得開心。

 

Moppy熱氣球的爆谷盒，都幾靚吖，但銷情遠遠不及 Minion嗰個，小朋友的喜好都有分潮流的。

 

另一個遊戲， Elmo GoGo滑板，盪上去，盪返落嚟，可作為玩唔玩到海盜船的指標。

日本環球影城
地址：大阪府大阪市此花區櫻島 2丁目 1番 33號
電話：+81-570-200-606
開放時間： 9am-9pm（每日不同）
票價：一天入場券成人$469，小童$324，長者$421。可另購特快入場券，每日票價不同。
網址： http://www.usj.hk 
前往方法：於大阪或難波站，乘坐 JR前往西九条站，轉乘夢咲線直達環球城車站

最新女人商場行兩日兩夜

去大阪，最多華人去的地方，肯定是道頓崛上的藥房。一入去，只聽到國語，你以為自己去了土瓜灣或屯門。
難道大阪就只有 0.01安全套、 M巾、電飯煲同埋面膜適合遊客？日圓低水，以前貴到唔捨得買的，現在可以了，在 JR大阪站，前身是三越伊勢丹的百貨公司，被改裝成 Lucua 1100，剛剛於四月二日開幕。總數一百五十八間商店，並非像領匯般只歡迎見慣見熟的名字，反而吸納大量初到關西甚至初到日本的品牌，跟日本的多層百貨公司無乜分別，都係底下超市最高層食肆，中間賣衫褲鞋襪。 Lucua 1100的賣點係開宗明義女性主導，睇裝修睇廣告都知男人要行埋一邊。結果，賣男裝的，只佔一層咁多。然後，我聽到模特兒黃小姐大讚商場好行，啲貨夠多夠靚唔娘，並非心齋橋質素，應該可以行足兩日兩夜。
一個商場入面開兩間 Starbucks，有原因的。

B2樓層，超市，大粒過香港買到的士多啤梨好多，賣$130一盒，超市內仲設有近十間餐店，有位坐，唔使吓吓上十樓餐廳層先可以抖一抖。

 

 

位於大阪站出口，門口前地板大大個花朵圖案，擺明車馬主攻女性。

綠茶雪糕$12、棉花糖綠茶$20，因為杯綠茶無落糖，所以要放支棉花糖落去加甜。

 

男裝，真慘，得一層，但有限量版，像呢個真皮背囊，彩藍色少見，賣$4,360。

 

由 B1到 5/F都係女裝，其中一樓的手作市場區域，產品最有趣，像真花手機殼，第二處未見過。但黃小姐就睇中條圍裙。想知究竟仲有什麼鋪頭？留意「壹週 Plus」啦。

 

 

Lucua 1100
地址：大阪市北區梅田 3-1-3
電話：+81- 6-6151-1111
營業時間：商場 10am-9pm，餐廳 11am-11pm
前往方法： JR大阪站直達
網址： http://www.lucua.jp/lucua1100 

大阪難得海鮮 BBQ

去東京，係咪必去築地市場？咁，如果你去大阪，一定想去新開的中之島漁港。
咁，你必定失望。因為，中之島漁港的規模細九倍，咪話同築地市場比較，同台北的上引水產比，都輸晒。但喺大阪無得揀呀，得佢，你只可以選擇去，或唔去。似香港電視業。
中之島漁港係個街市 only，真係要買返屋企煮嗰隻。叻在喺隔籬開咗一個小食檔，賣吓燒魷魚、魚生飯咁。真正吸引是檔海邊 BBQ，採訪當日，落大雨，搞到無得坐露天位，兼且落晒簾，海景變膠景，一樣有大量日本人排隊等入場，喺點名簿留名，都要等約一個小時至入到席。暫時未被遊客攻陷，海鮮分量夠大，尤其推介吞拿魚魚生飯，厚切程度是我生平未見。如果，你唔好俾大阪築地市場呢個朵錯誤引導，只當中之島漁港是一間餐廳，期望變得合理，肯定會由大失所望轉化成喜出望外。

外形似個帳幕，入面就真係個街市。

 

 

食個飯啫，點解要換件風褸，仲人人都換，似制服呢？原來，因為落雨，窗邊落膠布，焗。驚你的大衣沾上油煙味，餐廳細心地提供風褸來擋味。

 

唔幫襯 BBQ都可以喺門口 order燒魚$20同燒魷魚$33，後面碟魚生飯只賣$52，一場來到，食埋個 BBQ啦。

 

有鹿兒島鮮魚，有北海道鮮蟹，你會買返酒店煮嗎？

個人終極推介，吞拿魚魚生飯$130，既鮮又甜仲大大粒，滿足感超越一般魚生飯一千倍。

 

燒帶子，$39隻，物超所值。

中之島漁港
地址：大阪市西區川口 2丁目 9番
電話：+81-6-6581-3166（食堂）
營業時間：漁港 10am-6pm，食堂 11am-10pm
前往方法：可乘地下鐵中央線•千日前線，阿波座站下車步行十分鐘。或乘坐京阪中之島線，於中之島站步行 17分鐘
網址： http://www.nakanoshima-gyoko.jp 

限定版夜景+3D投影

 

要睇櫻花，要開始北上北海道。去大阪，睇煙花又如何？去年年底在東京鐵塔搞過的夜景 3D投影表演「 City Light Fantasia by Naked」搬咗去大阪阿倍野展望台，展期只係去到 5月 31日。有得睇趁手！

地址：大阪市阿倍野區阿倍野筋 1-1-43 Abeno Harukas展望台
開放時間：
即日至 10/4 6:30pm-9:40pm• 11-30/4 6:45pm-9:40pm
1-15/5 7pm-9:40pm• 16-31/5 7:15pm-9:40pm
展望台入場費：成人$98，中學生$78，小學生$46，幼兒$33。另有指定日期特別門票，包 DVD一隻，成人$163。
前往方法： JR天王寺站
網址： http://clf.naked-inc.com/harukas 

有用資料

捷星日本已於日本營運十年，在日本營運 18條航線，來往國內 11個航點，每日超過一百班航機升降，是全日本擁有最大網絡的廉航。搭過，座位比很多廉航闊落，空姐亦頗友善，算難得。

 

簽證：持特區護照及 BN（ O）均毋須簽證
機票：捷星日本（ Jetstar Japan）每星期三班由香港飛往大阪關西國際機場，逢星期三、五、日出發及回程，七月擬增至每星期五班。出發時間為 21:25、凌晨 2:05到達；回程時間為 17:30、 20:15抵港。票價由$499起，逐程收費更有彈性。行李每件$190，如額外購買$180加值套票，可以免費更改時間日期、免費揀位、$65機上禮券及賺取澳航積分。連行李、稅項及附加費每位由$1,935起，比傳統航空公司至少平一半。
網址： http://www.jetstar.com/hk 
查詢： 3192 7451
貨幣： 100日圓約兌港幣$6.5
鳴謝：捷星日本（ Jetstar Japan）