【即時文摘】四萬元年薪（左丁山）
李純恩打電話來問，上世紀七十年代初年薪四萬元是甚麼樣的概念？反問李純恩：「點解有此一問？」佢話一代球星胡國雄逝世，有資料話胡國雄當年年薪四萬，故有此一問，因為佢那時候還在上海讀中學。
當年四萬銀年薪，應該係一個唔錯數目，絕對係高級中產。胡國雄生於1949，踢青年軍成名，1971年22歲被招攬上山踢南華，1972年受精工挖角下山，所謂年薪四萬，應該係精工班主黃創山大手筆，用錢銀打動胡國雄轉會嘅。1972年，記得中大畢業生到萬國寶通銀行（現稱花旗）做見習生，月薪係千二，到永隆銀行做就月薪八百（港大生有千二），以此比較，年薪四萬係齊頭數，相等於月薪三千一百元（以13個月計）左右，應該係外資銀行經理級起碼嘅人工，左丁山先父在中華電力工作40年，於1970年退休，退休時月薪只不過係千零蚊啫。到咗1974年，中大MBA畢業生入美國銀行做trainee，月薪係2500元，以此伸算，胡國雄踢精工時，係一級球星，收年薪四萬，可過安穩生活。1976年嗰陣，太古城新樓細單位記得係賣十五萬元，胡國雄供得起。相形之下，今天香港甲組足球員年薪不知多少，但即使係唔錯嘅薪水（譬如月薪四萬），亦難以負擔一個太古城細單位。
香港第一批（三人）外援球員居里係胡國雄之精工隊友，佢對胡國雄評價極高，話佢係香港球員中，後無來者，可與尹巴士頓比較，之前亦恐怕無人能及。左丁山唔係咁諗噃，居里大概未見過姚卓然踢波，老一輩球迷相信如將胡國雄與姚卓然（同是十號仔）比較，姚卓然嘅腳下功夫與傳球技術更加細膩，香港足球黃金時代不在胡國雄代表香港年代（1971至1986），而係在胡國雄成名之前。點解咁講呢，胡國雄嗰代足球健將，未曾在國際賽為香港贏得任何冠軍，而姚卓然、莫振華、黃志強、林尚義、何應芬、陳輝洪、朱永強那一輩分別在1954和1958年亞運會代表中華民國兩奪亞運金牌，於60年代贏馬來西亞麥迪卡杯，威震亞洲。在1960年姚卓然等香港球員出席羅馬奧運，對英國以二比三僅負，姚卓然個人射入兩球，這些戰績，是後來胡國雄的香港隊無法比擬的。姚卓然在50年代曾被中華體育會挖角下山，當時報紙瘋傳，中華班主陳南昌開出年薪四萬元的天價，但姚卓然最後還是留在南華。50年代中的四萬元又比70年代的四萬元昂貴得多了！
没有评论:
发表评论