美國多事
不少人懷疑美國FBI做乜有權調查一個總部位於瑞士嘅國際機構，兼且美國三大體育項目係美式足球、棒球與籃球，頂多加埋第四項冰上曲棍球，足球（football）在美國不太流行，大球會參加MLS（Major League Soccer），只能招攬歐洲過氣球星，如碧咸、亨利、林柏特、謝拉特等，國際足協關美國乜事呀？
國際足協FIFA執委會委員涉嫌集體收受利益，未落網嘅一啲高層被國際刑警發出紅色追緝令，相信普天之下，難以容身，足球委員識收錢啫，本身並非專業黑幫罪犯，邊度識得逃亡藏匿呀，遲早落網，係必然之事。呢班人為足球轉播權、主辦權收取禮物、回佣、美元現鈔，視若等閒，但長期以來，冇人理，冇人調查，俄羅斯、中國、亞非拉國家等唔會壞人好事，見到都唔會出聲，歐洲諸國亦冇一個夠膽去篤穿內幕，但FIFA太過份嘞，係唔肯俾英國主辦2022年世界盃，情願俾卡塔爾呢個在暑假熱到五六十度嘅國家主辦，擺明內裏有景轟，於是英國報紙條氣唔順，派出卧底記者深入調查，連番揭露FIFA貪污情況，咁就驚動美國FBI查吓有冇美國人牽涉在內，有冇人因貪污而利用美國金融系統洗錢，或在美國交收而陷入美國稅網，如果有，就會俾美國FBI一個調查干預的藉口。這次FIFA委員貪污案，因涉及美國人Chuck Blazer，順藤摸瓜，FBI就不客氣了，直搗黃龍，逼得白禮達倉惶辭職，不再賣嘴刁。
美國再次扮演世界警察角色，干預國際機構事務，全世界突然一片歡呼之聲，為FBI及美國司法部喝彩，奧巴馬總統最近接見訪問美國嘅亞洲青年學生，對學生話：「我上任時，美國受世人尊敬的程度，不如俄羅斯與中國，但現在美國肯定是全世界最受尊敬的國家（the most respected country in the world）」，永遠反對奧巴馬嘅霍士新聞台話奧巴馬跌落天秤，自讚自，誰是誰非，係觀點與角度問題。但俄中體諒FIFA貪污，歐盟不滿但無力干預，亞非拉足協跟白禮達討飯吃，世上如果美國警察唔出現，任由足球貪腐橫行，仲有乜天理？現在美國出手，人人鬆口氣。全世界啲貪官要記住呀，美國人多事多手，千祈唔好領美國護照，去美國住，有調查話多數中國富豪想去美國居留，呢啲人要想清楚自己嘅財富來源至好！
没有评论:
发表评论