http://hkm.appledaily.com/detail.php?guid=19210995&category_guid=15307&category=daily&issue=20150707
樂香園：救A股的兩難 - 海迪
A股狂瀉，阿爺慌了，連日來不斷出招，招數多到兩隻手都數不完，但效用成疑，反令市場更恐慌。例如中央要求21間券商聯手1,200億元（人仔．下同）入市，呢個金額只佔A股free-floating市值0.3%，咁細數目講嚟做乜？
還有，唔好再講甚麼「打大鱷」了。𠵱家唔係有外星人（外資）侵略你，而係好似侏羅紀咁，你自己製造咗隻恐龍（大量孖展）出來咬自己。上海交易所上周單日淡倉金額，只佔大市總市值1%都唔夠，請問點激戰？先唔講官報所說的有外資沽空期指質低A股，在現實中根本不可能做到，就算真的有「國內反對勢力」在short，他們頂多是推波助瀾，順勢賺一筆，絕非今次股市崩盤的源頭。你禁沽空，反而令真正透過short期指來對沖自己position的機構投資者，再無工具可用，咁點算？咪惟有沽現貨囉。
歸根究柢，今次A股股災的根本原因，就是股市在缺乏基本因素支持下、靠大量孖展槓桿炒上去的泡沫終於到達臨界點而爆破。在A股崩盤之前，上海交易所數據顯示，券商借出的孖展數目累計高達2.2萬億元，高盛估計這水平佔A股free-floating市值佔比高達12%，還未計場外配資平台的非法孖展。所以問題不是short sell，而是佔A股成交達90%的散戶現在信心崩潰，是long緊嘅人在sell。
海迪大部份buy-side朋友，都相信A股今次是神仙難救。阿爺如決心不惜一切代價救市，可能要人行長期提供流動性無限量接盤，即變相QE。但如此一來，還談甚麼改革、資本賬開放？要入MSCI更加是想都不用想。
海迪
没有评论:
发表评论