生在香港幾幸福 - 左丁山
中秋節前夕，在家迎月之時，收到金融L嘅短訊，佢剛自歐洲公幹回港，在歐洲睇電視新聞報導敍利亞難民在匈牙利邊境嘅新聞，不勝感慨，傳來圖片之餘，還加多一句：「我們生於香港，長於香港，原來是大大的幸福。慶幸今夕可人月團圓。」估唔到管理投資理性到極嘅金融L又幾感性喎，於是約吃午飯，等佢吐吓世情感慨，唔駛鬱在心中。
同時間，又收到高錕慈善基金（Charles K. Kao Foundation）電郵，知道為咗慶祝高錕慈善基金成立五周年，舉辦一個高錕畫作展，名為「由科學發明到藝術創作──光纖之父高錕教授首次個人巡迴畫展」，設有導賞講解，幫助參觀人士更加瞭解高教授嘅創作。高錕已患上腦退化症，人所共知，但回港生活後，得太太悉心照料，生活愉快，並拿上畫筆，如返老還童，以赤子之心，畫出人間色彩，今次舉辦展覽同時，基金會為咗大眾增加對腦退化病患者生活之認識，特設免費導賞團，想參加嘅話，可上網預先登記，電郵聯絡地址係info@charleskaofoundation.org，參觀日期及時間係九月二十八日下午三時正，十月一日中午十二時正，十月二日晚上七時正，十月三日下午四時正，須預先登記報名，額滿即止，地點在又一城LG2。
腦退化症難以預防，人過70歲之後，此症可說防不勝防，可突然而來。高太黃美芸女士以科學態度及藝術胸懷面對天才型丈夫之腦退化症，盡力令高教授享受post-Alzheimer生活，令人敬佩。
回想當年，高錕亦係避秦南來人士，比難民好一啲咁啦。金融L年紀稍輕，生於香港，長於香港，出世至今未經愁苦，大概唔記得1950年代香港滿街難民之事，好多年青香港人之上一代或阿爺阿公嗰代，其實都係逃港難民，與今天敍利亞人下海逃亡往歐洲並無太大不同，只係好在當年港英有抵壘政策，難民入到市區就可拿身份證而已。陳佐洱突然之間講香港應該去殖化，不知港英一啲政策其實造福咗不少來港難民，其中已有不少由陶傑（真係觀察入微）所講由欽州街基隆街搬咗上羅便臣道、白加道。去殖喎，冇咁易，一啲好嘢係長懷在心中嘅。
I
没有评论:
发表评论