人民幣信心跌 - 左丁山
近星期全球股市常大幅度波動，令投資者，投機人士無所適從，炒即日鮮如果炒中，仲緊張過在馬場買中大冷馬，喺炒房內工作嘅交易員呢排真係心血少啲都唔掂，一日高低波幅有幾百點至一千點，而且經常係在午飯後單日轉向，下午一時許股市往往由升轉跌，或由跌轉升，好似九月八日咁，午飯後恒指一小時內狂升800點左右，散戶點追呀，十一點幾買入熊證嘅，即時打靶啦。
九月九日有校友午餐例會，幾位平時出席開嘅證券界校友都唔見蹤影，是可以理解的，其中一位分析師M老早同左丁山講過：「師兄，呢排日日食飯盒，唔敢出街呀，否則老闆在緊張時候見唔到我，炒我都似！」但屬於一間大型證券公司嘅高層主管嘅C校友就有到場噃，坐到兩點幾㖭，佢有好多經紀手下睇住個市，係可以行開啲嘅，但緊張時刻，點解仲要用兩個鐘頭出席校友會午餐例會？原因簡單，呢日主講嘉賓講中國經濟當前形勢吖嘛，中國係現今世界股市焦點，中國傳媒不時指外國唱衰中國，其心可誅，但中國傳媒素來服務於政治需要，難講真心話，往往報喜不報憂，股民易受中國官媒誤導，內地海歸派分析師亦受制於傳統聽話習慣，不敢直接批評中國經濟管理。於是乎呢，我地閂埋門聽本港學校出身，受外國名牌大學訓練嘅經濟師講嘢，先至聽到一啲不留情面嘅評論，呢日聽完，幾乎所有校友都話主講人講得精彩，想再搵佢講埋下集。
詳情不必細表嘞，左丁山其實心領神會，平時已有類似看法，此日得到主講嘉賓提供數據證實一啲想法啫。大家最關注嘅係自己荷包，人人都有或多或少嘅人民幣存款（左丁山則斗零都冇），驚住人民幣貶值。一位資金管理界師弟話，近三年，大量客戶（高淨值人士）買入人民幣Accumulator，人民幣不斷貶值嘅話，佢地嘅損失不下於雷曼迷你債，甚或過之，一啲銀行嘅private bank已為此感到頭痛，要拜神保祐人民幣匯價不要再跌。李克強在大連世界經濟論壇強調人民幣沒有持續下跌的基礎，大家信唔信？以前就信嘅，但自從中國暴力救市失敗，8月份人民幣突然貶值3%之後，市場已經信心漸失，大人物愈講不會貶值，央行愈係力托匯價，大家愈係沽人民幣買美金！
I
没有评论:
发表评论