故意騎呢 - 曾志豪
足球術語有一句叫「故意漏」。今天香港也有一種叫「故意騎呢」。譬如FFx那首Sugar Baby。落筆時，其在YouTube的hit rate已經超過1,641,351，160幾萬！豪宅首期！而之前你完全不知道FFx是誰。
這個組合的賣點是甚麼？騎呢。由服裝、造型、歌技、舞姿，都只可以用「騎呢」形容，「畫虎不成反類犬」，扮K Pop結果變成沙Pop——咁騎呢都出歌真係沙Pop。
朋友間開始以「有無睇過《Sugar Baby》」來傳閱那條沙Pop Video，轉眼已推到幾十萬hit rate。然後過幾日，約都無咁準，夾都無咁蹺報紙消息，原來這個video所費只是九百幾，低成本柴娃娃之作。大家恥笑「九百幾嘅MV見過未」，於是又多幾十萬hit rate。這個組合，可能是「故意騎呢」。
騎呢成為近年市場「賣點」。譬如李逸朗的哭腔版《傻女》。歌手出發點是「認真」，效果慘變「騎呢」，結局卻又無端端紅咗。迷你倉那個「鬼佬」，用力吶喊電話號碼，結果「騎呢」爆紅。特別朗誦效果的學生、有震懾效果的「睇X住」、「能得利能得利」洗腦賀年歌，全部sell「騎呢」。
Tree根元秋人氣永遠高企，因為他們夠騎呢。網民寧願share騎呢金句，也未必會看甚麼警世良言。批評永遠容易，欣賞卻很艱難。社會要的是「話題」，我們要惡搞揶揄嘲笑，而不是佩服欣賞羡慕。
四四正正的MV，引不起大眾興趣。觀眾很現實，如果你高格調扮韓流，咁點解我唔睇正版韓國天團，而要支持你A貨？反正無論你如何揼本，都是A貨。若是如此，我是老闆，也會想一想，不要奢求掌聲，但求噓聲如何呢？噓你也等於留意你，留意你便是「人氣」。
於是故意漏故意山寨故意求其故意近鏡嚇你……結果sell出一隊組合。表面俾人X，實際在呃like。
I
没有评论:
发表评论