【米芝蓮巡禮】公佈前輕鬆吓 分享米芝蓮趣聞
《米芝蓮指南 香港澳門2016》今天正式公佈，飲食籽們固然期待，各位廚師亦必定相當緊張非常。其實現在緊張都無補於事了，不如跟大家分享幾個米芝蓮趣聞，食住花生等公佈吧！
食過無得翻尋味？
米芝蓮評審可以天天在各地餐廳盡情開公數食好西，不過尋到心水餐廳卻不能帶親朋好友共享！皆因為確保公平，不會被過往記憶影響評審，各評審嚐過的餐廳於數年間不能再幫趁，話知你幾鍾意啦！
地獄廚神跌星喊出嚟！
各位廚師睇得星星何其重要，除了因為絕對影響生意外，還因為關係到個人榮辱問題！好像最近來港開新第二間餐廳的地獄廚神Gordon Ramsay，因去年位於紐約的二星級餐廳「The London」給摘除星星，難過得哭起來，更直言「感覺就像失去了女朋友，很想能挽回她」，聽到都覺得陰公。
4歲食評家挑戰米芝蓮？
無論你信服與否，《米芝蓮指南》的確在業界舉足輕重，不過去年三藩市線上雜誌The Bold Italic就邀請了只有4歲的Lyla Hogan，到享譽全球的三星餐廳The French Laundry一試其Tasting Menu，結果小女孩面對賣相矜貴的生蠔配白鱘魚子醬，以及太平洋黃尾魚露出不滿表情，因「賣相不佳」而拒絕試食，亦指出緬因龍蝦肉配黑無花果醬「貨不對版」，因為小小一年明明是蝦，教大家啼笑皆非。不過最後還是因為各式美味甜品，挽回餐廳名聲，吸引小食評家想再次光臨。
米芝蓮人一早識飲?
指南中除了一至三粒星外，還有一個名為「Bib Gourmand」的推介餐廳名單，Bib是甚麼呢？原來就是米芝蓮的本名—Bibendum的簡稱。Bibendum為拉丁名，意思為Drinking to be done,，本來是創辦人想以此宣揚品牌出品的輪胎於「Drink up obstables」，意思即是能消除路面障礙，但出奇不意就與飲食拉上第一條紅線。
一個城巿未必只有一本米芝蓮?
米芝蓮曾經為23個國家推出米芝蓮指南，除了大家熟悉的中日英美意法德之外，捷克、丹麥、芬蘭、挪威、波蘭等都有推出，不過未必每年也有。同時，部份地區則有多於一本指南，例如西班牙及葡萄牙的《35歐元餐廳精選指南》、東京的《優秀小型餐廳指南》，還有英國及愛爾蘭的《識飲識食在酒吧》，嘗試品評小店。
如果香港多出一本指南，《掃街美食指南》如何呢米芝蓮先生？
記者：黃穎妮
（網上圖片）
上一則: 【飲食籽】西餐廳魚缸養魚 法式本地鮮
下一則: 【出閘搜新】步槍底裝散彈 遠射近攻二合一
I
没有评论:
发表评论