爆竊符號之謎 - 馮睎乾
圖片來源：John Camden Hotten：A Dictionary of Modern Slang,Cant,and Vulgar Words（1859）
香港出現神秘符號，都說是竊賊的踩線標記，弄得人心惶惶。家母向來是驚弓之鳥，看了這些駭人耳目的新聞，就時刻留神門外有否蛛絲馬跡，還喋喋不休勸我提防竊賊，最後更在WhatsApp煞有介事傳來那張「踩線密碼圖」。我只好向她曉以大義。
「第一，呢啲唔係新聞，係舊聞，」我說，「二○一四年就有報道：十四鄉村屋爆竊案倍增，有人話見過一男一女扮地產經紀同買家，成日喺村屋外面用粉筆畫圈。嗰度二○一二年有十宗爆竊案，一三年升到廿二宗，犯案者全部係本地人。阿媽，你驚唔係問題，問題係你會唔會驚得太遲呢？」
我繼而問她：若發現門外有神秘符號，應該擔心抑或高興？她罵：「儍咗呀？有咩值得高興？」我說：「根據警方數字，舊年爆竊案有二千五百幾宗，我假設全部都係入屋爆格，而香港有大約二百五十萬個家庭，咁即係話，你屋企俾人爆嘅機會最多只有千分之一，係唔係？但我查舊年新聞，搵唔到一單爆竊案係確認事前俾人做咗記號嘅。即使大前年十四鄉嗰廿二宗，都冇話過幾多宗有符號。當然啦，你可以話新聞冇報道，唔代表冇。但如果真係冇，咁即係話根據過去紀錄，啲賊其實唔會爆自己mark咗嘅屋，反而專爆嗰啲冇記號嘅，呢啲神秘符號嘅功用，分分鐘好似《聖經》記載嗰啲門楣上面嘅羊血，可以幫你消災解難，仲唔值得高興？」
她滿臉困惑：「咩話？」
我接着說：「冇錯，啲賊的確會踩線，亦會留低標記，但係咪留低標記就一定爆你先？如果係，呢啲笨賊應該一早俾人拉清光。𠵱家全港有千幾間屋俾人mark咗，但暫時一間都冇俾人爆。好，我哋假設啲賊每mark一百間屋，真係會爆其中一間，即係話另外九十九間都仲好安全。即使你屋企有標記，你唔會俾人爆嘅機會依然好高，有幾高？0.99乘以0.999，即係0.98901咁高。」
她反駁：「你講咁多做咩？即係都有機會啦。」
我說：「係，我只係話，冇必要太驚啫。另外，呢啲新聞唔單止香港有，外國成日有。例如今個月德國城市Heilbronn，同香港一樣出現咗好多神秘符號，德國人叫做Gaunerzinken，當地市民又懷疑同爆竊有關。但當地警方話，舊年有六十一宗呢類案，大部分同爆竊無關，有啲只係細路仔塗鴉，當中只有兩宗比較可疑。一宗係有人發現門口渠蓋俾人畫咗個好大嘅D字，佢哋估呢個係法文dimanche──即星期日──縮寫，但呢家人冇俾人爆；另外一宗真係爆竊，附近亦發現畫咗三條線，但證明唔到同件案有咩關係。其實幾十年前開始，英國、法國、意大利都成日有呢啲符號，但從來無一處證明到同爆竊有關係。最好笑係一九八二年法國Bordeaux出現大量神秘標記，個個以為有賊，查一大輪先發現係推銷員留低嘅記號。仲有嗰張所謂密碼圖，其實唔同地方都有唔同版本，根本係假嘢。根據法國學者Jean-Bruno Renard所講，呢啲符號可以上溯到十五世紀，係當時縱火賊用嘅符號，十九世紀末嘅賊都仲會用嚟同隊友溝通，但𠵱家只係都市傳說。爆過伊莉莎伯泰萊間屋嘅英國神偷Peter Scott亦話，從來冇聽過現代嘅賊要用呢啲符號溝通。我自己查過，有本十九世紀嘅舊書叫A Dictionary of Modern Slang, Cant, and Vulgar Words，入面有張圖解釋英國有乞兒或小販，都係四處留低類似符號，話俾同行知邊家人慷慨、邊家人孤寒，令同行搵食可以更有效率。睇番歷史同過往新聞，用呢啲符號嘅人仲有推銷員、乞兒同流浪漢，唔見得一定係賊。」
「原來係咁！但係我覺得你始終都係要小心爆竊囉。」這就是家母的結論。完。
上一則: 致創新及叉叉局局長 - 畢明
下一則: 編劇的苦樂 - 沈西城
I
没有评论:
发表评论