【旅遊禁忌】檸檬以外 不為人知的入境禁物
好鍾意食生果嘅女子帶咗6個檸檬前往新西蘭，因為未有申報，而遭當局強行遣返，呢件事提醒我哋去旅行要小心，唔好亂帶嘢觸發外國海關神經。其實除咗新西蘭之外，好多國家對外來物品都Check得好嚴，有好多樣「違禁品」仲係你估唔到嘅！
美國：
Kinder出奇蛋
美國認為出奇蛋裏面頭嘅小玩具設計不安全，細路好易唔覺意食咗噎死，仲指出奇蛋係「沒營養的垃圾食品」同「內含危險物品」，據統計，美國海關每年都沒收到上萬隻出奇蛋，而每隻仲要罰成2,500元美金咁多添！
美國加州：
鵝肝
好有愛心嘅加洲人知道鵝肝是人用喉管灌入大量飼料給鵝吃，以無人道嘅方法令鵝肝變得肥大，於是當地動物保護組織強烈反對買賣和進食鵝肝，亦通過於2012年起禁止販賣鵝肝。
澳洲：
月餅？
澳洲對入口食物管制特別嚴，因為要避免外來動植物物種落來生根破壞生態，亦保障國內農牧業健康，所以對蛋、肉類、植物種子和蔬果有嚴格限制，未去皮未煮熟的果仁唔帶得，蜜糖唔帶得（來自紐西蘭經商業包裝及精製的可經申報入境），連中國人過中秋一定要有嘅月餅都不可入境，但無黃的就可以啦！
伊朗：
時尚雜誌
伊朗女人出街都要包到冚，禁止時尚雜誌當然是為了防止巿民產生各種有違伊斯蘭教義的思想。
新加坡：
肉乾
香口膠好多人以為唔帶得，其實遊客帶少量自己𡁻是沒有問題的，反而遊完馬來西亞再到新加坡就要注意，不要在馬來西亞買肉乾，因為新加坡不可帶含豬、牛、羊及家禽熟食或加工食物入境，反而新加坡人過去買餸帶條魚返嚟就無問題。
紐西蘭：
行山鞋都唔得？
紐西蘭對入境物品管制與澳洲相若，甚至仲嚴多少少，記者試過入境時填寫海關申報表，剔了其中包括行山鞋的一項，原來當局怕沾有泥土的行山鞋隨行李入境，泥土中潛藏的昆蟲卵或植物種子或會影響島國生態，於是隨即把行李箱中的行山鞋取走，以為沒收，點知竟然幫忙洗走咗鞋上泥跡，賺咗。
記者：容慧心
I
没有评论:
发表评论