拒絕新客 - 左丁山
師兄H食興大發，來電話要到上海總會食火朣翅，叫左丁山訂位。左丁山回應：「師兄，兩個人食飯，點食火朣翅呀，叫半份都要六條大漢先至飲得晒。」師兄H二話不說，打一輪電話就搵到中小企老闆A、會計師L等，叫埋小G，夾夠六個人到上海總會，由左丁山發辦。
咁就易事啦，預訂半份火朣翅，半份清蒸河鰻，臨時叫多兩客生煎包，素菜包、瀾湖白肉、醉雞、烤夫、高力豆沙，兩個貴價菜式配一啲比較便宜嘅，食到飽一飽又唔會令師兄H好肉痛。
大家果然食得盡興，會計師盛讚河鰻夠大夠鮮甜夠滑，要加兩碗白飯俾六個人分，用來撈汁也。既然食得痛快，話題自也就無拘無束，中小企老闆A呢個時候就吐苦水，話銀行收得好緊，開新戶口非常困難，借貸亦不易，佢開闢新市場，搵到一帶一路國家客仔來港開設分公司，互相合作，客仔只識兩間銀行名，一間叫做匯豐，一間叫做渣打，但兩間銀行都唔肯收中亞細亞新客，拒絕開新戶口。老闆A後來向同行查詢，發覺此問題十分普遍，於是搵齊中小企代表，由商會出面邀請金管局高層食晚飯摸底兼申冤，請大人了解民間疾苦，金管局高層話一向鼓勵銀行不可一刀切，要方便中小企諸如此類，答得非常漂亮。
會計師L聞說，冷笑一聲，指銀行對伊朗及緬甸客特別緊張，佢間會計師樓碰過幾次釘之後，已經停止為外來新客提供服務，以免浪費時間精力，佢話：「一帶一路喎，甩帶甩路就真，金管局反洗黑錢之指引一日不放寬修正，一日銀行都會捻死一帶一路新客戶。」反洗黑錢，聞之色變！金管局正在要辦反洗黑錢訓練課程，銀行焉敢怠慢。師兄H最近不大滿意某銀行服務，搬戶口去恒生，點知遇到一位中大師弟問佢如何發達，問到佢口啞啞，填表填到失暈，嬲起上嚟，鬧師弟麻煩過甚，師弟話：「大師兄我知得你好清楚，但金管局所有指示必須fulfill填報不漏，否則我職位難保，鎖你，鎖你。」左丁山問師兄H駛唔駛搵陸庭龍，佢話唔駛咯，卒之開咗戶口，依家想知道如何投資筆退休金，令佢保本之餘又有每年五六厘收益回報箒。咁困難之事，左丁山不能回應，如有需要，最多替佢搵陸庭龍同佢食餐飯親自教路。一路食一路傾，搞到近下午3時先至埋單落樓，返到公司打個電話俾賓架Y，問佢有冇收到金管局關於開戶口新指示。賓架Y哼一聲，話新指示形同廢紙，佢地一於從嚴辦理，嚴守反洗黑錢守則，以免一旦出事，就俾金管局抽秤也。
上一則: 預言成真 - 陶傑
下一則: 「硬」咽之星 - 林夕
I
没有评论:
发表评论