黑材料伺機而爆 - 左丁山
上星期日陳惜姿專欄提及五年前舊事，指有人刻意收料放料，揀好時間，定向發射，令傳媒收到唐英年在九龍塘公館僭建地下室嘅消息曝光，首先由明報發難，其他傳媒跟進，卒之逼到唐英年埋咗牆角，難以招架。陳惜姿回想起，成件事件似係有計劃嘅。
當然係有計劃有預謀㗎啦，如果唔係，去邊處搵埋啲陳年相片（裝修僭建之時嘅圖片）嚟做證據呀，普通裝修佬、承建商會有咁好心機收藏相片經年，留作後用？搵人信都幾難。「唐宮僭建」新聞大賣之後，曾有人通知傳媒，梁振英山頂大屋亦有僭建，但大概因為無可靠圖片及較詳細資料，加上五年前嘅記者多數擁梁，大學生亦擁梁反唐，視梁為勤奮專業精英，唐為富二代玩家。啲報紙邊度願意花精神去揭梁府僭建吖，咪等到梁振英當選，成為無可更改之事後，明報先至做佢新聞囉。
最近特朗普之色情談話曝光，令人懷疑唔似得係NBC節目人員「突然記起」咁簡單，CNN之特朗普電台訪問，以前又唔見CNN講？假使呢啲陳年舊事係在2015年六七月共和黨初選開始嘅時候「面世」，特朗普必然飽受共和黨其他候選人猛烈攻擊，分分鐘一早敗走返紐約繼續搞佢嘅真人騷咯。一個陰謀論就係其他共和黨候選人矇查查，唔做功課，或者一早睇特朗普唔起，冇起佢底，反而民主黨人在特朗普領先之後就挖佢黑材料，收收埋埋，隱而不發，直至今天大選臨近嘞，先至重鎚出擊，置特朗普於死地。
搵正時間去爆料，十分緊要。唐宮僭建之事，早已發生，有心人如在唐英年做政務司長時爆料，玩殘唐唐，就會另外有人參加競選特首，該位候選人未必有黑材料嘅噃，有乜好得過等到唐唐成為大熱門，以為做硬特首之後，先至向佢放箭啫，一矢中的，對手就自然黃袍加身啦！現在，美國總統競選亦有類似情況，如果去年就爆料爆死特朗普，打殘呢隻狂牛，共和黨容乜易選出告魯士、布殊、祁食呢類人出嚟㗎。以今日情況睇，因希拉莉有電郵門及克林頓基金會捐款唔清唔楚之累，假如佢嘅競選對手係杰布殊或祁食，希拉莉輸嘅機會好大，好彩現在唯一對手係粗鄙佬特朗普，黑材料多籮籮，留番投票前一個月先至揭露，共和黨人陣腳大亂，無轉彎餘地，啲時機拿揑準到無得彈。香港特首選舉已剩番唔夠六個月時間，仲係無人宣佈參選，好可能係受過上次教訓，一於敵不動，我不動，有人一動，黑材料就蜂擁而出，搵傳媒做殺手！
上一則: 泰國的現代化 - 陶傑
下一則: 我不會負責 - 林夕
Z88
没有评论:
发表评论