騙菲傭 - 左丁山
英國銀行家，劍橋畢業，只不過31歲，正是薪高糧準，花紅優厚嘅年青才俊，點知患上惡癖，以玩弄外傭為樂，玩弄完畢還要宰殺之，其行為之惡毒，實在不忍卒睹。香港無死刑，呢個殘忍兇手，遭判無期徒刑，香港納稅人要養佢一世。
外國白人男士，不論年紀，特別容易釣上外傭。營業A上一個月與菲傭同意分手，還在搵菲傭中介公司搵緊替代新人，偶然間講起，營業A講：「丁山哥，知道你素來有菲傭命，你個個菲傭都做得長，不生事，你不如介紹一個俾我！」無謂咯，免招來麻煩，不做「媒人三代好」，何況自己又唔係菲傭專家！只不過，左家第一個菲傭做咗二十年先至退休，之後每個菲傭起碼做六年先至告退回鄉結婚，係從未有過菲傭麻煩嘅。營業A位菲傭瑪莉（假名），31歲，貌有中姿，身材豐滿，放假時穿緊身T恤牛仔褲出街，幾易吸引男士眼球。前個月，菲傭放假搭地鐵去中環，撞到一位中年瑞士男，竟然話一見鍾情，之後在星期日就着最短嘅熱褲與黑色魚網絲襪加高跟鞋出街，嚇到營業A個仔掩埋雙眼唔敢睇。一個月前，菲傭話瑞士男求佢辭工與佢同居，營業A心諗講童話咩，於是立即達成和解分手離職協議，祝福佢以後生活幸福。
世界上不如意事常八九，前幾日瑪莉打電話俾營業A哭訴：「Madam，我可唔可以返嚟做，個衰鬼話同居後發覺大家脾性不合，唔夾，要我走，仲要我分擔呢個月嘅食宿費，我依家好徬徨呀！」營業A聽咗為之啼笑皆非，本來心軟軟，但又驚瑪莉返嚟之後，在地鐵碰上另一位法國男、德國男，容乜易歷史重演？於是拒絕之。三日之後，營業A查銀行戶口結餘，發覺父親留下來一間灣仔舊居，租俾美國男住嘅，仲未交租，於是去灣仔舊居巡視，啱啱撞到美國男攬住一個靚菲傭（有時有樣睇）行出大廈，美國男見到佢，知道咩嘢一回事，拉營業A行埋一邊講：「我老婆返咗美國探父母，我唔記得入數俾你，明日補番。」因租客過往交租紀錄良好，營業A話OK啦，之後搵大廈看更阿伯八卦吓，阿伯話：「呢條友好把炮，晚晚有菲傭同佢上樓，佢老婆出門個零月啫，我見過上樓嘅外傭起碼有20位。」所謂見一事長一智，營業A立即搵菲傭中介人開出新聘用條件：來自鄉下，未到過馬尼拉，樣貌普通，談吐不用伶俐醒目……。中介人一味話得，信不信由你。
上一則: 英美反左大革命 - 陶傑
下一則: 有人歡喜有人愁 - 林夕
I
没有评论:
发表评论